مجمع الزوائد ومنبع الفوائد

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے علی ! قیامت کے دن تمہارے پاس جنت کے عصاؤں میں سے ایک عصا ہو گا ، جس کے ذریعے تم منافق لوگوں کو میرے حوض سے پرے کرو گے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلام بن سلیمان مدائنی ہے اور ایک راوی زید عمی ہے ، اور یہ دونوں ضعیف ہیں ویسے ان دونوں کی توثیق کی گئی ہے ان دونوں کے بقیہ رجال ثقہ ہیں ۔

عبداللہ بن اجارہ بن قیس بیان کرتے ہیں : میں نے امیر المؤمنین سیدنا علی بن ابوطالب رضی اللہ عنہ کو منبر پر یہ ارشاد فرماتے ہوئے سنا : ” میں اپنے ان دونوں چھوٹے ہاتھوں کے ذریعے نبی اکرم صلی اللہ علیہ وسلم کے حوض سے کافروں اور منافقین کو یوں پرے کروں گا ، جس طرح پانی پلانے والے اجنبی اونٹوں کو اپنے حوض سے پرے کرتے ہیں ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن قدامہ جوہری ہے اور وہ ضعیف ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے مجھ سے ارشاد فرمایا : ” اے علی ! کیا تم اس بات سے راضی نہیں ہو ؟ کہ جب اللہ تعالیٰ تمام انبیاء کرام کو ایک میدان میں اکٹھا کرے گا یوں کہ ان کے پاؤں میں جوتے نہیں ہوں گے جسم پر لباس نہیں ہوں گے وہ پیدل ہوں گے ، اور پیاس نے ان کی بری حالت کی ہوئی ہو گی سب سے پہلے سیدنا ابراہیم علیہ السلام کو بلایا جائے گا اور انہیں دو سفید کپڑے پہنائے جائیں گے پھر وہ عرش کے دائیں طرف کھڑے ہو جائیں گے پھر جنت میں سے ایک پرنالہ پھوٹے گا جو میرے حوض کی طرف آئے گا ، اور میرا حوض اس سے زیادہ بڑا ہے جتنا بصریٰ اور صنعاء کے درمیان فاصلہ ہے اس کے کنارے پر آسمان کے ستاروں کی تعداد میں چاندی کے بنے ہوئے پیالے ہوں گے میں اس میں سے پیوں گا اور وضو کروں گا ، مجھے دو سفید کپڑے پہنائے جائیں گے پھر میں عرش کے دائیں طرف کھڑا ہو جاؤں گا پھر تمہیں بلایا جائے گا ، اور تم پیو گے اور تم وضو کرو گے ، اور تمہیں دو سفید کپڑے پہنائے جائیں گے تم میرے ساتھ کھڑے ہو جاؤ گے مجھے جس بھی بھلائی کی طرف بلایا جائے گا تمہیں بھی اس بھلائی کی طرف بلایا جائے گا ۔ “
یہ روایت امام طبرانی نے معجم اوسط میں نقل کی ہے ، اور اس کی سند میں ایک راوی عمران بن میثم ہے اور وہ کذاب ہے ۔