مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے جھنڈا پکڑ کر اسے لہرایا اور پھر فرمایا : کون اس کے حق کے ہمراہ اسے لے گا ؟ تو سیدنا زبیر رضی اللہ عنہ آئے اور انہوں نے کہا: میں ۔ نبی اکرم صلی اللہ علیہ وسلم نے فرمایا : تم پیچھے ہٹ جاؤ ، پھر ایک اور صاحب آئے ، انہوں نے کہا: میں ۔ نبی اکرم صلی اللہ علیہ وسلم نے فرمایا : تم پیچھے ہٹ جاؤ ۔ پھر ایک اور صاحب کھڑے ہوئے انہوں نے کہا: میں ۔ نبی اکرم صلی اللہ علیہ وسلم نے فرمایا : تم پیچھے ہٹ جاؤ ۔ نبی اکرم صلی اللہ علیہ وسلم نے ارشاد فرمایا : اس ذات کی قسم ! جس نے محمد کو عزت عطا کی ہے ، میں یہ جھنڈا ایک ایسے شخص کو دوں گا جو فرار نہیں ہو گا ، علی آگے آئے ، سیدنا علی رضی اللہ عنہ نے وہ جھنڈا لیا ، پھر وہ گئے ، یہاں تک کہ اللہ تعالیٰ نے فدک اور خیبر ان کے لئے فتح کر دیا ، تو وہ وہاں کی عجوہ اور قدید کھجوریں لے کے آئے ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ، صرف عبداللہ بن عصمہ کا معاملہ مختلف ہے ، اور وہ ثقہ ہے لیکن غلطی کر جاتا ہے ۔

سیدنا امام حسن بن علی رضی اللہ عنہ بیان کرتے ہیں : نبی اکرم صلی اللہ علیہ وسلم نے جب بھی سیدنا علی رضی اللہ عنہ کو کسی مہم پر بھیجا ۔ آپ صلی اللہ علیہ وسلم نے انہیں جھنڈا عطا کیا ۔
یہ روایت امام طبرانی نے نقل کی ہے ۔ اس کی سند میں ایک راوی ضرار بن صرد ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا علی بن ابوطالب رضی اللہ عنہ کو جھنڈا اس وقت عطا کیا جب ان کی عمر بیس سال تھی ۔
یہ روایت امام طبرانی نے نقل کی ہے ، اور اس کی سند حسن ہے ۔