مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : انصار سے تعلق رکھنے والا ایک شخص نبی اکرم صلی اللہ علیہ وسلم کے پاس آیا اور اس نے عرض کی : یا رسول اللہ ! یہودیوں نے میرے بھائی کو شہید کر دیا ہے ، تو نبی اکرم صلی اللہ علیہ وسلم نے ارشاد فرمایا : ” میں جھنڈا ایک ایسے شخص کو دوں گا ، جو اللہ اور اس کے رسول سے محبت کرتا ہے ، اور اللہ اور اس کا رسول اس سے محبت رکھتے ہیں ، اللہ تعالیٰ اس کے ہاتھ پر فتح نصیب کر دے گا ، اور تمہیں تمہارے بھائی کے قاتل پر ق ابودیدے گا ۔ “ ( راوی بیان کرتے ہیں : ) تو نبی اکرم صلی اللہ علیہ وسلم کے اصحاب اس بات کے لئے خواہش مند رہے ۔ نبی اکرم صلی اللہ علیہ وسلم نے سیدنا علی رضی اللہ عنہ کو پیغام بھیجا اور آپ نے ان کے لئے جھنڈا باندھا ، انہوں نے عرض کی : یا رسول اللہ ! جیسا کہ آپ ملاحظہ فرما رہے ہیں مجھے آشوب چشم کی شکایت ہے ، راوی کہتے ہیں : اس وقت انہیں آشوب چشم کی شکایت تھی ، تو نبی اکرم صلی اللہ علیہ وسلم نے ان کی آنکھوں میں لعاب دہن ڈالا تو اس کے بعد انہیں کوئی شکایت نہیں رہی ، اور پھر وہ چلے گئے ۔
یہ روایت امام طبرانی نے نقل کی ہے ۔ اس کی سند میں ایک راوی أحمد بن سہل بن علی باہلی ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

جمیع بن عمیر بیان کرتے ہیں : میں نے سیدنا عبداللہ بن عمر رضی اللہ عنہما سے کہا: آپ مجھے سیدنا علی رضی اللہ عنہ کے بارے میں بتائیے تو انہوں نے بتایا : میں نے نبی اکرم صلی اللہ علیہ وسلم کو غزوہ خیبر کے دن یہ ارشاد فرماتے ہوئے سنا : ” میں جھنڈا ایک ایسے شخص کو دوں گا جو اللہ اور اس کے رسول سے محبت رکھتا ہے ، اور اللہ اور اس کا رسول اس سے محبت رکھتے ہیں ۔ “ راوی کہتے ہیں : یہ منظر گویا آج بھی میری نگاہ میں ہے کہ نبی اکرم صلی اللہ علیہ وسلم کے پاس وہ جھنڈا تھا ، آپ نے اسے اپنے ساتھ لگایا ہوا تھا ، اس وقت سیدنا علی بن ابوطالب رضی اللہ عنہ کو قلعے کے دھوئیں کی وجہ سے آشوب چشم کی شکایت تھی ، نبی اکرم صلی اللہ علیہ وسلم نے وہ جھنڈا ان کے حوالے کیا ، تو اللہ کی قسم ! ابھی گھڑ سوار زیادہ بھی نہیں ہوئے تھے کہ اللہ تعالیٰ نے سیدنا علی رضی اللہ عنہ کے ہاتھ پر قلعے کو فتح کر دیا ۔
یہ روایت امام طبرانی نے نقل کی ہے ۔ اس کی سند میں ایک راوی جمیع بن عمیر ہے ، اور وہ ضعیف ہے ، ویسے اس کی توثیق کی گئی ہے ۔

سیدنا ابولیلی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جھنڈا اس شخص کو دوں گا جو اللہ اور اس کے رسول سے محبت رکھتا ہے ، اور اللہ اور اس کا رسول اس سے محبت رکھتے ہیں ۔ “ پھر نبی اکرم صلی اللہ علیہ وسلم نے سیدنا علی رضی اللہ عنہ کو بلایا اور وہ جھنڈا انہیں دے دیا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ضرار بن صرد ہے ، اور وہ ضعیف ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جھنڈا اس شخص کو دوں گا جو اللہ اور اس کے رسول سے محبت رکھتا ہے ، اور اللہ اور اس کا رسول اس سے محبت رکھتے ہیں ۔ ( راوی بیان کرتے ہیں : ) تو نبی اکرم صلی اللہ علیہ وسلم نے وہ ( جھنڈا ) سیدنا علی رضی اللہ عنہ کو دے دیا ۔
یہ روایت امام طبرانی نے مختلف اسانید کے ساتھ نقل کی ہے ، جن میں سے سب سے عمدہ سند میں ایک راوی معتمر بن ابوسری عسقلانی ہے ، اور میں اس سے واقف نہیں ہوں ۔ اس روایت کے بقیہ رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے خیبر کی طرف ، راوی کہتے ہیں : میرا خیال ہے روایت میں یہ الفاظ ہیں : سیدنا ابوبکر رضی اللہ عنہ کو بھیجا تو وہ اور ان کے ساتھی پسپا ہو کر واپس آ گئے اگلے دن نبی اکرم صلی اللہ علیہ وسلم نے سیدنا عمر رضی اللہ عنہ کو بھیجا تو وہ پسا ہو کر واپس آ گئے ۔ ان کے اصحاب نے بزدلی دکھائی تھی ، ان کے اصحاب نے انہیں بھی بزدلی دکھانے پر مجبور کر دیا ، تو نبی اکرم صلی اللہ علیہ وسلم نے ارشاد فرمایا : ” کل میں جھنڈا اس شخص کو دوں گا جو اللہ اور اس کے رسول سے محبت رکھتا ہے ، اور اللہ اور اس کا رسول اس سے محبت رکھتے ہیں ۔ وہ اس وقت تک واپس نہیں آئے گا ، جب تک اللہ تعالیٰ اسے فتح نصیب نہیں کر دے گا ۔ “ تو سب لوگ اکٹھے ہو کر آئے ، نبی اکرم صلی اللہ علیہ وسلم نے دریافت کیا : علی کہاں ہے ؟ اس وقت انہیں آنکھوں میں تکلیف کی شکایت تھی ، اس وقت نبی اکرم صلی اللہ علیہ وسلم نے ان کی آنکھوں میں لعاب دہن ڈالا ، پھر انہیں جھنڈا دیا ، انہوں نے اس جھنڈے کو لہرایا ، تو اللہ تعالیٰ انہیں فتح نصیب کر دی ۔
یہ روایت امام بزار نے نقل کی ہے ۔ اس کی سند میں ایک راوی حکیم بن جبیر ہے ، اور وہ متروک ہے وہ کوئی چیز نہیں ہے ۔

سیدنا ابولیلی رضی اللہ عنہ بیان کرتے ہیں : میں نے سیدنا علی رضی اللہ عنہ سے کہا: راوی کہتے ہیں : وہ سیدنا علی رضی اللہ عنہ کے ساتھ رات کے وقت بات چیت کر رہے تھے ( انہوں نے سیدنا علی رضی اللہ عنہ سے کہا: ) لوگ اس حوالے سے آپ پر اعتراض کرتے ہیں کہ آپ گرمی کے موسم میں سردیوں والے کپڑے پہن کر باہر آ جاتے ہیں ، اور سردیوں کے موسم میں ہلکے کپڑے پہن کے آ جاتے ہیں ، تو سیدنا علی رضی اللہ عنہ نے دریافت کیا : کیا تم ہمارے ساتھ نہیں تھے ؟ میں نے جواب دیا : جی ہاں ! سیدنا علی رضی اللہ عنہ نے فرمایا : نبی اکرم صلی اللہ علیہ وسلم نے سیدنا ابوبکر رضی اللہ عنہ کو بلایا تھا ، ان کے لئے جھنڈا باندھا تھا اور پھر انہیں بھیجا تھا ، وہ لوگوں کو لے کر گئے تھے ، لیکن پسپا ہو کے واپس آ گئے تھے ، پھر نبی اکرم صلی اللہ علیہ وسلم نے سیدنا عمر رضی اللہ عنہ کو بلایا تھا ، ان کے لئے جھنڈا باندھا تھا ، وہ بھی گئے تھے اور پھر لوگوں کے ساتھ پسپا ہو کر واپس آ گئے تھے ، تو نبی اکرم صلی اللہ علیہ وسلم نے ارشاد فرمایا تھا ۔ “ ” میں جھنڈا ایسے شخص کو دوں گا جو اللہ اور اس کے رسول سے محبت رکھتا ہے ، اور اللہ اور اس کا رسول اس سے محبت رکھتے ہیں ، اللہ تعالیٰ اسے فتح نصیب کرے گا ، اور وہ فرار نہیں ہو گا ( یعنی لوٹ کے واپس نہیں آئے گا ِ) ۔ “ تو نبی اکرم صلی اللہ علیہ وسلم نے پیغام بھیجا ، میں نبی اکرم صلی اللہ علیہ وسلم کے پاس آیا ، میں کوئی چیز نہیں دیکھ سکتا تھا ، تو نبی اکرم صلی اللہ علیہ وسلم نے میری آنکھوں میں لعاب دہن ڈالا ، پھر آپ نے دعا کی : ” اے اللہ ! گرمی اور سردی کی تکلیف کے حوالے سے اس کے لئے کفایت کر دے ۔ “ ( سیدنا علی رضی اللہ عنہ نے فرمایا : ) تو اس کے بعد کبھی بھی گرمی یا سردی نے مجھے اذیت نہیں دی ۔
یہ روایت امام بزار نے نقل کی ہے ۔ اس کی سند میں ایک راوی محمد بن عبدالرحمن بن ابولیلی ہے ، اور وہ خراب حافظے کا مالک ہے ، اس روایت کے بقیہ رجال ” صحیح “ کے رجال ہیں ۔