مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : ابوجہل نے کہا: اگر میں نے محمد ( صلی اللہ علیہ وسلم ) کو خانہ کعبہ کے پاس نماز ادا کرتے ہوئے دیکھا ، تو میں ان کے پاس جاؤں گا اور ان کی گردن پر پاؤں رکھ دوں گا ، نبی اکرم صلی اللہ علیہ وسلم نے ارشاد فرمایا : اگر اس نے ایسا کیا ، تو فرشتے کھلے عام اسے پکڑ لیں گے اور اگر یہودی موت کی آرزو کریں ، تو وہ اُسی وقت مر جائیں گے ، اور جہنم میں اپنا ٹھکانہ دیکھ لیں گے ، اور جو نبی اکرم صلی اللہ علیہ وسلم سے مباہلہ کرنے کے لئے نکلے تھے ، اگر وہ مباہلہ کر لیتے ، تو جب انہوں نے واپس جانا تھا ، تو انہیں اپنے اہل خانہ اور مال میں سے کچھ بھی نہیں ملنا تھا ۔ ( علامہ ہیثمی فرماتے ہیں : ) میں یہ کہتا ہوں : ” صحیح“ میں اس روایت کا ابتدائی حصہ مذکور ہے ۔
یہ روایت امام أحمد ، امام ابویعلیٰ نے نقل کی ہے ، امام ابویعلیٰ کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ابوجہل نے کہا: کیا میں نے آپ کو منع نہیں کیا تھا ؟ نبی اکرم صلی اللہ علیہ وسلم نے اسے جھڑکا ، تو اُس نے کہا: اے محمد ( صلی اللہ علیہ وسلم ) ! آپ مجھے کیوں جھڑک رہے ہیں ؟ اللہ کی قسم : آپ کسی ایسے شخص کو نہیں جانتے ہوں گے ، جس کے ساتھ بیٹھنے والے لوگ مجھ سے زیادہ ہوں ، راوی کہتے ہیں : سیدنا جبرائیل علیہ السلام نے کہا: اُسے چاہیے کہ وہ اپنے ساتھی لوگوں کو بلا لے ۔ سیدنا عبداللہ بن عباس رضی اللہ عنہما فرماتے ہیں : اللہ کی قسم ! اگر وہ شخص اپنے ساتھیوں کو بلا لیتا ، تو فرشتوں نے عذاب کے ہمراہ اسے پکڑ لینا تھا ۔ ( علامہ ہیثمی فرماتے ہیں : ) میں یہ کہتا ہوں صحیح میں اس کا کچھ حصہ مذکور ہے ۔
یہ روایت امام أحمد نے ذکوان کے حوالے سے عکرمہ سے نقل کی ہے ، اور میں ذکوان سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا طلحہ بن عبیداللہ رضی اللہ عنہ بیان کرتے ہیں : مشرکین سے تعلق رکھنے والے کچھ افراد خانہ کعبہ کے اردگرد موجود تھے ، ان میں ابوجہل تھا ، اللہ تعالیٰ اس پر لعنت کرے ، اسی دوران نبی اکرم صلی اللہ علیہ وسلم تشریف لائے ، آپ ان لوگوں کے پاس آ کر ٹھہر گئے ، آپ نے فرمایا : یہ چہرے قبیح ہو جائیں ، تو وہ سب لوگ گونگے ہو گئے ، ان میں سے کوئی بھی کوئی بات نہیں کر رہا تھا ، راوی کہتے ہیں : میں نے ابوجہل کو دیکھا کہ وہ نبی اکرم صلی اللہ علیہ وسلم کے سامنے معذرت پیش کرنے لگا اور بولا: ہم سے رک جائیں ، نبی اکرم صلی اللہ علیہ وسلم نے فرمایا : میں تم سے نہیں رکوں گا ، بلکہ میں تمہیں قتل کر دوں گا ، تو ابوجہل نے کہا: آپ اس بات پر قدرت رکھ پائیں گے ؟ نبی اکرم صلی اللہ علیہ وسلم نے فرمایا : اللہ تعالیٰ تم لوگوں کو قتل کروائے گا ۔
یہ روایت امام بزار نے ، اپنے استاد عبداللہ بن شبیب کے حوالے سے نقل کی ہے ، اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا جابر بن سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک شیطان میرے پاس آیا اور مجھ پر آگ کے شرارے ڈالنے لگا ، اگر میرے بھائی سیدنا سلیمان علیہ السلام کی دعا کا خیال نہ ہوتا ، تو میں نے اُسے پکڑ لینا تھا ۔ “
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں گھر میں داخل ہوا ، تو وہاں ایک شیطان دروازے کے پیچھے موجود تھا ، میں نے اس کا گلہ دبانا شروع کیا ، یہاں تک کہ اس کی زبان کی ٹھنڈک مجھے اپنے ہاتھ پر محسوس ہوئی ، اگر ایک نیک بندے کی دعا کا خیال نہ ہوتا ، تو اس نے صبح بندھے ہوئے ہونا تھا اور لوگ اُسے دیکھ لیتے ۔ “
یہ روایت امام طبرانی نے نقل کی ہے ، اور اس کی سند حسن ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم مکہ میں سجدے کی حالت میں تھے ، اسی دوران شیطان آیا اور اس نے آپ صلی اللہ علیہ وسلم کی گردن پر پاؤں دیا ، تو سیدنا جبرائیل علیہ السلام نے اسے پھونک ماری ، انہوں نے اپنے پروں کے ذریعے اسے پھونک ماری تھی ، تو وہ زمین پر اپنے پاؤں نہیں جما پایا ، یہاں تک کہ اردن پہنچ گیا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عثمان بن مطر ہے ، اور وہ ضعیف ہے ۔