مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے یہ امید ہے کہ اگر میری زندگی طویل ہوئی ، تو میں سیدنا عیسیٰ بن مریم علیہ السلام سے ملاقات کر لوں گا ، اور اگر مجھے جلدی موت آ گئی ، تو تم میں سے جو شخص اُن سے ملے ، تو وہ میری طرف سے انہیں سلام کہہ دے ۔ “
یہ روایت امام أحمد نے مرفوع اور موقوف ( دونوں طرح سے ) نقل کی ہے ، اور ان دونوں کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خبردار ! سیدنا عیسیٰ بن مریم علیہ السلام وہ ہیں ، کہ اُن کے اور میرے درمیان نہ کوئی نبی ہے اور نہ ہی کوئی رسول ہے ، البتہ میرے بعد وہ میری امت میں میرے خلیفہ ہوں گے ، خبردار ! وہ دجال کو قتل کر دیں گے ، صلیب کو توڑ دیں گے ، جزیہ کو ختم کر دیں گے اور اس وقت جنگ ختم ہو جائے گی ، خبردار ! تم میں سے جو ان کا زمانہ پائے ، تو وہ انہیں سلام کہہ دے ۔ “ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا کچھ حصہ مذکور ہے ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی محمد بن عقبہ سدوسی ہے ، جسے ابن حبان نے ثقہ قرار دیا ہے ، اور ابوحاتم نے اسے ضعیف کہا: ہے ۔

سیدنا ابویرہرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا عیسیٰ بن مریم علیہ السلام نزول کریں گے اور لوگوں کے درمیان چالیس سال رہیں گے ۔ “
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا اوس بن اوس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا عیسیٰ بن مریم علیہ السلام دمشق کے مشرقی حصے میں موجود سفید منارے پر نزول کریں گے ۔ “
یہ روایت امام طبرانی نے نقل کی ہے ، اور اس کے رجال ثقہ ہیں ۔

امام شعبی بیان کرتے ہیں : ایک شخص نے سیدنا مغیرہ بن شعبہ رضی اللہ عنہ کے سامنے یہ بات کہی : اللہ تعالیٰ سیدنا محمد صلی اللہ علیہ وسلم پر درود نازل کرے ، جو انبیاء کے سلسلے کو ختم کرنے والے ہیں ، اور ان کے بعد کوئی نبی نہیں ہو گا ، تو سیدنا مغیرہ رضی اللہ عنہ نے فرمایا : تمہارا یہ کہہ دینا کافی تھا کہ وہ انبیاء کے سلسلے کو ختم کرنے والے ہیں ، ہم لوگ یہ بات چیت کیا کرتے تھے کہ سیدنا عیسیٰ بن مریم علیہ السلام ظہور کریں گے اور اگر وہ ظہور کریں گے تو وہ نبی اکرم صلی اللہ علیہ وسلم سے پہلے بھی ہو جائیں گے ، اور بعد میں بھی ہوں گے ۔
یہ روایت امام طبرانی نے نقل کی ہے ، اس کی سند میں ایک راوی مجالد بن سعید ہے ، اور وہ ضعیف ہے ، ایک جماعت نے اسے ضعیف قرار دیا ہے ، ویسے اس کی توثیق بھی کی گئی ہے اور اس روایت کے بقیہ رجال ثقہ ہیں ۔

سیدنا عبداللہ بن سلام رضی اللہ عنہ بیان کرتے ہیں : سیدنا عیسیٰ بن مریم علیہ السلام کو نبی اکرم صلی اللہ علیہ وسلم اور آپ صلی اللہ علیہ وسلم کے دونوں ساتھیوں ( یعنی سیدنا ابوبکر رضی اللہ عنہ اور سیدنا عمر رضی اللہ عنہ ) کے درمیان دفن کیا جائے گا ، تو چوتھی قبر ان کی ہو گی ۔
یہ روایت امام طبرانی نے نقل کی ہے ، اس کی سند میں ایک راوی عثمان بن ضحاک ہے ، جسے ابن حبان نے ثقہ قرار دیا ہے ، اور ابوداؤد نے اسے ضعیف کہا: ہے ، امام مزی نے
یہ روایت ان کے حالات میں نقل کی ہے ، اور اس کی نسبت امام ترمذی کی طرف کی ہے اور وہ یہ کہتے ہیں : یہ حسن ہے ، تاہم ” اطراف “ میں مجھے
یہ روایت نہیں ملی ہے ، باقی اللہ بہتر جانتا ہے ۔

نبی اکرم صلی اللہ علیہ وسلم کی صاحبزادی سیدہ فاطمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے مجھ سے فرمایا : ” بے شک عیسیٰ بن مریم ، بنی اسرائیل میں چالیس سال رہے تھے ۔ “
یہ روایت امام ابویعلیٰ نے حسین بن علی بن اسود کے حوالے سے نقل کی ہے ، جسے ازدی نے ضعیف قرار دیا ہے ، ابن حبان نے اسے ثقہ کہا: ہے ، اور یحیی بن جعدہ نامی راوی نے سیدہ فاطمہ رضی اللہ عنہا کا زمانہ نہیں پایا ہے ۔