مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے سیدنا موسیٰ علیہ السلام کے ساتھ جو کلام کیا تھا ، وہ تین دن میں ، ایک لاکھ چالیس ہزار کلمات پر مشتمل تھا ، جب سیدنا موسیٰ علیہ السلام نے انسانوں کا کلام سنا ، تو انہیں اس پر غصہ آیا ، کیونکہ ان کی سماعتوں میں پروردگار کا کلام پہنچ چکا تھا ، پروردگار نے ان کے ساتھ جو کلام کیا تھا ، اُس میں یہ بھی ارشاد فرمایا تھا : ” میری خاطر کام کرنے والوں نے ، دنیا سے بے رغبتی اختیار کرنے کی مانند کوئی کام نہیں کیا ہو گا ، اور میرا قرب حاصل کرنے والوں نے پرہیزگاری کی طرح کی کسی چیز کے ذریعے میرا قرب حاصل نہیں کیا ہو گا ، جو ان چیزوں سے پرہیز ہو ، جو میں نے ان پر حرام قرار دی ہیں ، اور عبادت گزاروں نے میرے خوف کی وجہ سے رونے جیسی کسی چیز کے ذریعے عبادت نہیں کی ہو گی ۔ “ سیدنا موسیٰ علیہ السلام نے عرض کی : اے تمام مخلوق کے پروردگار ! اے قیامت کے دن مالک ! اے جلال اور اکرام والے ! تو نے ان کے لئے کیا تیار کیا ہے ؟ اور تو انہیں کیا جزا دے گا ؟ تو پروردگار نے فرمایا : ” جہاں تک دنیا سے بے رغبتی اختیار کرنے والوں کا تعلق ہے ، تو میں نے ان کے لئے جنت کو مباح قرار دے دیا ہے ، وہ اس میں جہاں چاہیں گے رہائش اختیار کریں گے جہاں تک پرہیزگار لوگوں کا تعلق ہے ، جو اُس چیز سے بچتے ہیں جو میں نے ان پر حرام قرار دی ہے ، تو جب قیامت کا دن ہو گا ، تو ہر بندے سے میں حساب لوں گا ، البتہ پرہیزگار لوگوں کا معاملہ مختلف ہے ، کیونکہ مجھے اُن سے حیاء آئے گی ، میں اُن کی عزت افزائی کروں گا اور میں انہیں حساب کے بغیر جنت میں داخل کر دوں گا ، جہاں تک میرے خوف کی وجہ سے رونے والے لوگوں کا تعلق ہے ، تو ان لوگوں کے لئے رفیق اعلیٰ ہو گا ، اس بارے میں دوسرے لوگ اُن کے شراکت دار نہیں ہوں گے ۔ “
یہ روایت امام طبرانی نے نقل کی ہے ، اس کی سند میں ایک راوی جویبر ہے ، اور وہ انتہائی ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ نے سیدنا موسیٰ علیہ السلام کے ساتھ کلام کیا ، تو وہ دس فرسخ کے فاصلے سے تاریک رات میں چٹان پر چلتی ہوئی چیونٹیوں کو بھی دیکھ سکتے تھے ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی حسن بن ابوجعفر جفری ہے ، اور وہ متروک ہے ۔

سیدنا ابوذر غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم سے یہ سوال کیا جائے کہ سیدنا موسیٰ علیہ السلام نے دو قسم کی مدتوں میں سے کون سی پوری کی تھی ؟ تو تم یہ کہو : کہ جو ان دونوں میں زیادہ بہتر تھی اور زیادہ مکمل تھی اور زیادہ نیکی والی تھی ، اور اگر تم سے یہ سوال کیا جائے : کہ دونوں خواتین میں سے کس کے ساتھ انہوں نے شادی کی تھی ؟ تو تم یہ کہو : کہ جو ان دونوں میں سے چھوٹی تھیں ، یہ وہی خاتون ہیں ، جو آئی تھیں اور انہوں نے یہ کہا: تھا : اے ابا جان ! آپ انہیں ملازم رکھ لیں ، کیونکہ یہ بہتر ملازم ثابت ہوں گے ، یہ طاقتور اور امین ہیں ، تو سیدنا شعیب علیہ السلام نے دریافت کیا تھا : تم نے اس کی قوت کہاں دیکھی ہے ؟ تو اس خاتون نے بتایا : انہوں نے ایک وزنی پتھر پکڑ کر اسے کنویں سے ہٹا دیا تھا ، سیدنا شعیب علیہ السلام نے دریافت کیا : تم نے اس کی امانت کہاں دیکھی ہے ؟ تو اس نے بتایا : انہوں نے یہ کہا: کہ تم میرے پیچھے چلتی ہوئی آؤ ! تم میرے آگے نہ چلنا ۔ “
یہ روایت امام طبرانی نے معجم صغیر میں نقل کی ہے ، اور معجم اوسط میں نقل کی ہے ، امام بزار نے اسے اختصار کے ساتھ نقل کیا ہے ، امام طبرانی کی سند میں ایک راوی عوید بن ابوعمران جونی ہے ، جسے یحیی بن معین اور دیگر حضرات نے ضعیف قرار دیا ہے ، ابن حبان نے اسے ثقہ کہا: ہے ، طبرانی کے بقیہ رجال ثقہ ہیں ۔ اس موضوع سے متعلق کچھ احادیث سورہ قصص سے متعلق باب میں گزر چکی ہیں ۔

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کیا گیا : سیدنا موسیٰ علیہ السلام نے دو قسم کی مدتوں میں سے کون سی مکمل کی تھی ؟ تو نبی اکرم صلی اللہ علیہ وسلم نے ارشاد فرمایا : جو زیادہ تھی ۔
یہ روایت امام طبرانی نے معجم اوسط میں ، اپنے استاد موسیٰ بن سہل کے حوالے سے نقل کی ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ، اس کے بعض راویوں میں ضعف پایا جاتا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں گویا اس وقت بھی ، سیدنا موسیٰ علیہ السلام کی طرف دیکھ رہا ہوں کہ وہ دو قطوانی چادروں میں احرام باندھے ہوئے اس وادی میں موجود ہیں ۔ “
یہ روایت امام طبرانی نے نقل کی ہے اس کی سند میں ایک راوی یزید بن سنان رہاوی ہے اور وہ متروک ہے ۔

سیدنا عبداللہ بن مسعود رضی اللہ عنہ بیان کرتے ہیں : سیدنا موسیٰ علیہ السلام کا قد بارہ گز تھا اور ان کا عصاء بارہ گز لمبا تھا اور وہ بارہ گز اچھلے تھے اور انہوں نے عوج بن عناق پر ضرب لگائی تھی اور وہ ضرب اس کے ٹخنے پر لگی تھی ۔
یہ روایت امام طبرانی نے نقل کی ہے اس کی سند میں ایک راوی مسعودی ہے جو اختلاط کا شکار ہو گیا تھا ، اس روایت کے بقیہ رجال ثقہ ہیں ۔

سیدنا جابر رضی اللہ عنہ بیان کرتے ہیں : جب اللہ تعالیٰ نے طور کے دن ، سیدنا موسیٰ علیہ السلام کے ساتھ کلام کیا تو یہ اس کلام سے مختلف تھا ، جس کلام کو اس نے اُس دن کیا تھا ، جب انہیں پکارا تھا ، تو سیدنا موسیٰ علیہ السلام نے کہا: اے میرے پروردگار ! یہ تیرا وہی کلام ہے ؟ جس کے ساتھ تو نے میرے ساتھ کلام کیا تھا ، تو اس نے فرمایا : اے موسیٰ ! میں نے دس ہزار زبانوں کی قوت کے ہمراہ ، تمہارے ساتھ کلام کیا ہے ، اور مجھے تمام زبانوں کی قوت حاصل ہے ، بلکہ اس سے بھی زیادہ قوت حاصل ہے ، جب سیدنا موسیٰ علیہ السلام بنی اسرائیل کی طرف واپس تشریف لائے ، تو بنی اسرائیل نے کہا: اے موسیٰ ! آپ رحمان کے کلام کی صفت ہمارے سامنے بیان کیجئے ، تو سیدنا موسیٰ علیہ السلام نے کہا: تم اس کی استطاعت نہیں رکھتے ، کیا تم نے بجلی چمکنے کی آواز سنی ہے ؟ جب وہ آتی ہے ، جب بجلی زور سے چکی ہو ، کیا تم اسے سن پاتے ہو ؟ تو وہ آواز اس کے قریب تھی ، لیکن ویسی نہیں تھی ۔
یہ روایت امام بزار نے نقل کی ہے ، اس کی سند میں ایک راوی فضل بن عیسیٰ رقاشی ہے اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پہلے ملک الموت علیہ السلام لوگوں کے پاس عیاں طور پر آ جایا کرتا تھا ، نبی اکرم صلی اللہ علیہ وسلم فرماتے ہیں : وہ سیدنا موسیٰ علیہ السلام کے پاس آئے سیدنا موسیٰ علیہ السلام نے انہیں طمانچہ رسید کیا اور ان کی آنکھیں پھوڑ دیں ، وہ پروردگار کے پاس آئے اور بولے : اے میرے پروردگار ! تیرے بندے موسیٰ نے میری آنکھ پھوڑ دی ہے ، اگر تو نے اسے عزت عطا نہ کی ہوئی ہوتی ، تو میں اسے سزا دیتا ، یہاں ایک راوی نے ایک لفظ مختلف نقل کیا ہے ، پروردگار نے ان سے فرمایا : تم میرے بندے کے پاس جاؤ ! اور اس سے کہو کہ وہ اپنا ہاتھ کسی چمڑے پر رکھے ، یا کسی بیل کی کھال پر رکھے ، تو ہر ایک بال جو اس کے ہاتھ کے نیچے آئے گا ، اس کے بدلے میں اسے جائے گا ، ملک الموت سیدنا موسیٰ علیہ السلام کے پاس آئے ( اور یہ بات بیان کی ) تو سیدنا موسیٰ علیہ السلام نے دریافت کیا : پھر اس کے بعد کیا ہو گا ؟ انہوں نے جواب دیا : موت ہو گی ، تو سیدنا موسیٰ علیہ السلام نے کہا: پھر ابھی ( تم میری روح قبض ) کر لو ! تو انہوں نے سیدنا موسیٰ علیہ السلام کو ایک چیز سونگھائی اور ان کی روح قبض کر لی ۔ “ یہاں یونس نامی راوی نے یہ لفظ نقل کیے ہیں : ” اللہ تعالیٰ نے ملک الموت کی آنکھ اُسے واپس کر دی تھی اور اس کے بعد وہ لوگوں کے پاس پوشیدہ طور پر آنے لگا ۔ “ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ایک حصہ مذکور ہے ۔
یہ روایت امام أحمد اور امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے سیدنا موسیٰ علیہ السلام کو سرخ ٹیلے کے پاس ، اپنی قبر میں نماز ادا کرتے ہوئے دیکھا ۔ “
یہ روایت امام بزار نے اور امام طبرانی نے معجم اوسط میں نقل کی ہے ، اس روایت کی سند میں ایک راوی صلہ بن سلیمان ہے اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا گزر سیدنا موسیٰ علیہ السلام ( کی قبر ) کے پاس سے ہوا ، وہ اپنی قبر میں کھڑے ہوئے نماز ادا کر رہے تھے ۔
یہ روایت امام طبرانی نے نقل کی ہے ، اس کی سند میں ایک راوی فیاض بن محمد ہے اور راویوں کی ایک جماعت ایسی ہے ، جن سے میں واقف نہیں ہوں ، فیاض سے
یہ روایت تین افراد نے نقل کی ہے : موسیٰ بن اسماعیل ۔ محمد عبداللہ نجار رقی ۔ اور ابویوسف صیدلانی ۔

امام شعبی سیدنا جابر بن عبداللہ رضی اللہ عنہ اور دیگر صحابہ کرام کے حوالے سے یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : ” ( قیامت کے دن ) مجھے سب سے پہلے ہوش آئے گا ، میں اپنا سر اٹھاؤں گا ، تو ایک شخص میرے اور عرش کے درمیان ہو گا ، تو بتایا جائے گا : یہ سیدنا موسیٰ علیہ السلام ہیں ، اگر تو وہ زمین میں تھے ، تو انہیں مجھ سے پہلے ہوش آ گیا ہو گا ۔ “
یہ روایت امام بزار نے نقل کی ہے ، اس کی سند میں ایک راوی مجالد بن سعید ہے ، اور اس کے بارے میں اختلاف پایا جاتا ہے اس روایت کے بقیہ رجال ” صحیح “ کے رجال ہیں ۔