مجمع الزوائد ومنبع الفوائد

سیدنا عبداللہ بن عباس رضی اللہ عنہما فرماتے ہیں : تم کسی نابینا شخص سے حاجت طلب نہ کرو ! ( یعنی اس کے سامنے اپنی ضرورت پیش نہ کرو ) اور تم رات کے وقت ضرورت پیش نہ کرو ! جب تم نے ضرورت پیش کرنی ہو ، تو سامنے والے شخص کی طرف منہ کرو ، کیونکہ حیاء آنکھوں میں ہوتی ہے ، اور دن کے ابتدائی حصے میں حاجت پیش کرو ، کیونکہ نبی اکرم صلی اللہ علیہ وسلم نے ارشاد فرمایا ہے : ” اے اللہ ! میری امت کے صبح کے کاموں میں برکت رکھ دے ! “ ۔
یہ روایت امام طبرانی نے نقل کی ہے ، اس کی سند میں ایک راوی عمرو بن مساور ہے اور وہ ضعیف ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خوبصورت چہرے والوں کے پاس بھلائی تلاش کرو ۔ “
یہ روایت امام بزار نے نقل کی ہے ، اور امام طبرانی نے معجم اوسط میں نقل کی ہے ، اس کی سند میں ایک راوی عمر بن صہبان ہے ، اور وہ متروک ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کو اللہ تعالیٰ نے خوبصورت چہرہ عطا کیا ہو ، خوبصورت نام دیا ہو ، اور اُسے ایسی جگہ پر رکھا ہو ، جہاں رُسوائی نہ ہو ، تو وہ شخص اللہ تعالیٰ کی مخلوق میں اُس کا منتخب بندہ ہو گا ۔ “ سیدنا عبداللہ بن عباس رضی اللہ عنہما فرماتے ہیں : شاعر نے کہا: ہے : ” آپ نبی اکرم صلی اللہ علیہ وسلم کی بیان کردہ شرط کے مطابق ہیں جب آپ صلی اللہ علیہ وسلم نے ارشاد فرمایا تھا : ” بھلائی خوبصورت چہرے والوں کے پاس تلاش کرو ! “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی خلف بن خالد بصری ہے اور وہ ضعیف ہے ۔

مجاہد نے سیدنا عبداللہ بن عباس رضی اللہ عنہما کے حوالے سے
یہ روایت نقل کی ہے ، میرا خیال ہے انہوں نے اسے ” مرفوع “ حدیث کے طور پر نقل کیا ہے : ” خوبصورت چہرے والوں کے پاس بھلائی تلاش کرو !“ ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن خراش بن حوشب ہے ، جسے ابن حبان نے ثقہ قرار دیا ہے ، وہ کہتے ہیں : یہ بعض اوقات غلطی کر جاتا ہے ، دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خوبصورت چہروں کے پاس ضروریات تلاش کرو ( یعنی اُن ضروریات کی تکمیل کا ذریعہ تلاش کرو ) ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی طلحہ بن عمرو ہے ، اور وہ متروک ہے ۔

یزید بن خصیفہ اپنے والد کے حوالے سے ، اپنے دادا کے حوالے سے ، نبی اکرم صلی اللہ علیہ وسلم کا یہ فرمان نقل کرتے ہیں : ” خوبصورت چہرے والے لوگوں کے پاس بھلائی تلاش کرو !“ ۔
یہ روایت امام طبرانی نے یحیی بن یزید بن عبدالملک نوفلی کی ، اس کے والد کے حوالے سے نقل کردہ روایت کے طور پر نقل کی ہے ، اور یہ دونوں ضعیف ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” خوبصورت چہرے والے لوگوں کے پاس بھلائی تلاش کرو !“ ۔
یہ روایت امام ابویعلیٰ نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری اُمت کے رحم کرنے والے لوگوں کے پاس بھلائی تلاش کرو ! تم ان کے زیر سایہ رہو ! تم وہ بھلائی ، سخت دل لوگوں کے پاس تلاش نہ کرو ، کیونکہ وہ لوگ میری ناراضگی کے منتظر ہوں گے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن مروان سدی صغیر ہے ، اور وہ متروک ہے ۔