مجمع الزوائد ومنبع الفوائد

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ( رات کو ہونے سے پہلے ) اپنے دروازے بند کر دو ، اپنے برتن ڈھانپ دو ، اپنے مشکیزوں کے منہ بند کر دو ، اپنے چراغوں کو بجھا دو ، کیونکہ ان کو یہ اجازت نہیں دی گئی کہ وہ ( ایسی صورت میں ) تم پر حملہ آور ہوں ۔ “
یہ روایت امام أحمد نے نقل کی ہے اور اس کے رجال ثقہ ہیں ، صرف فرج بن فضالہ کا معاملہ مختلف ہے ، ویسے اس کی توثیق کی گئی ہے ۔

سیدنا عبداللہ بن سرجس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کوئی شخص بل میں ہرگز پیشاب نہ کرے اور جب تم سونے لگو تو چراغ بجھا دو کیونکہ کوئی چوہا بعض اوقات ( چراغ کی ) بھی پکڑ لیتا ہے اور اس کے ذریعے گھر کو جلا دیتا ہے ، تم لوگ مشکیزوں کے منہ بند کر دو اور مشروبات کو ڈھانپ دو اور دروازے رات کے وقت بند کر دو ۔ “ لوگوں نے قتادہ سے دریافت کیا : نبی اکرم صلی اللہ علیہ وسلم نے بل میں پیشاب کرنے کو کیوں مکروہ قرار دیا ہے ، تو انہوں نے جواب دیا : بات کہی جاتی ہے کہ یہ بل جنات کا مسکن ہوتے ہیں ۔
یہ روایت امام أحمد اور امام طبرانی نے نقل کی ہے ، اور امام أحمد کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : ایک صاحب جن کا نام ابوحمید تھا وہ نبی اکرم صلی اللہ علیہ وسلم کی خدمت میں دن کے وقت بقیع سے ایک برتن لے کے آئے ، جس میں دودھ موجود تھا ، نبی اکرم صلی اللہ علیہ وسلم نے فرمایا : تم نے اسے ڈھانپ کیوں نہیں لیا ، خواہ اس پر کوئی لکڑی ہی رکھ دیتے ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں صرف ابراہیم بن سلیمان دباس کا معاملہ مختلف ہے اور وہ ثقہ ہے ۔

سیدنا جابر بن عبدالله رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عشاء کے ابتدائی وقت کے حوالے سے بچ کے رہو ۔ “ راوی بیان کرتے ہیں : گویا کہ نبی اکرم صلی اللہ علیہ وسلم کو یہ اندیشہ تھا کہ اس وقت جنات ( یا شیاطین وغیرہ ) حاضر ہوتے ہیں ۔
یہ روایت امام أحمد نے نقل کی ہے ، اور اس کی سند میں ایک ایسا راوی ہے ، جس کا نام بیان نہیں کیا گیا ہے ۔ اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کی ایک مخلوق ہے جسے وہ رات ہونے پر پھیلا دیتا ہے جیسے وہ چاہتا ہے ، تو تم مشکیزوں کے منہ بند کر دو ، دروازے بند کرو ، برتنوں کو ڈھانپ دو کیونکہ وہ ( مخلوق میں سے کوئی فرد ) کوئی دروازہ کھول نہیں سکتا ، کسی ڈھانپی ہوئی چیز پر سے ہٹا نہیں سکتا اور کسی بند مشکیزے کا منہ کھول نہیں سکتا ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت امام ابن ماجہ نے اختصار کے ساتھ نقل کی ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی عبداللہ بن سعید مقبری ہے اور وہ ضعیف ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں یہ حکم دیا ہے کہ ( ہم رات کو سونے سے پہلے ) دروازے بند کر دیں ، برتن ڈھانپ دیں ، مشکیزوں کے منہ بند کر دیں اور چراغ بجھا دیں ۔
یہ روایت امام طبرانی نے معجم اوسط میں اپنے استاد محمد بن عباس کے حوالے سے نقل کی ہے اور میں اس سے واقف نہیں ہوں ۔ اس روایت کے بقیہ رجال ثقہ ہیں ، البتہ کہیل ابوسلمہ بن کہیل کا معاملہ مختلف ہے ، اس سے میں واقف نہیں ہوں ۔

سیدنا عبداللہ بن عباس رضی اللہ عنہما نے شاید مرفوع حدیث کے طور پر یہ بات نقل کی ہے ( نبی اکرم صلی اللہ علیہ وسلم نے ارشاد فرمایا ہے : ) ” جب سورج غروب ہو جائے تو اپنے بچوں کو ( گھروں میں ) روک لو کیونکہ وہ ایک ایسی گھڑی ہوتی ہے ، جس میں شیاطین پھیل جاتے ہیں ۔ “
یہ روایت امام طبرانی نے نقل کی ہے ۔ اس کی سند میں ایک راوی لیث بن ابوسلیم ہے اور وہ مدلس ہے ۔ اس روایت کے بقیہ رجال ثقہ ہیں ۔

سیدنا وحشی بن حرب رضی اللہ عنہ بیان کرتے ہیں : ( ایک مرتبہ ) نبی اکرم صلی اللہ علیہ وسلم رات کے وقت کسی کام کے سلسلے میں باہر تشریف لے گئے ، آپ دروازے کو کھلا ہوا چھوڑ گئے ، جب آپ واپس تشریف لائے تو آپ نے ابلیس کو پایا کہ وہ گھر کے درمیان میں کھڑا ہوا تھا ، تو نبی اکرم صلی اللہ علیہ وسلم نے فرمایا : اے خبیث میرے گھر سے دور ہو جاؤ ، پھر نبی اکرم صلی اللہ علیہ وسلم نے ارشاد فرمایا : ” جب تم لوگ رات کے وقت اپنے گھروں سے نکلو تو ان کے دروازے بند کر دیا کرو ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔