مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی مرد کسی مرد کے ساتھ ، یا کوئی عورت کسی عورت کے ساتھ مباشرت نہ کرے ( یعنی اس طرح نہ لیٹیں کہ دونوں کے جسم پر کوئی کپڑا نہ ہو ، اور ان کے جسم ایک دوسرے کے ساتھ ملے ہوں ) ۔ “
یہ روایت امام أحمد امام بزار اور امام طبرانی نے معجم صغیر میں نقل کی ہے امام أحمد کی دو اسناد میں سے ایک کے رجال صحیح کے رجال ہیں ، امام بزار کے رجال کا معاملہ بھی اسی طرح ہے ۔

سیدنا جابر بن عبداللہ رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : کوئی شخص ایک ہی کپڑے میں دوسرے شخص کے ساتھ مباشرت نہ کرے اور کوئی عورت ایک ہی کپڑے میں دوسری عورت کے ساتھ مباشرت نہ کرے ( یعنی وہ اس طرح سے اکٹھے نہ ہوں کہ ان کے جسم پر صرف ایک ہی کپڑا ہو ، جسم پر اور کچھ نہ ہو ) راوی کہتے ہیں : میں نے سیدنا جابر رضی اللہ عنہ سے دریافت کیا : کیا آپ لوگ گناہوں کے ارتکاب کو شرک شمار کرتے تھے ؟ انہوں نے جواب دیا : اس بات سے اللہ کی پناہ ہے ۔
یہ روایت امام أحمد نے نقل کی ہے اور امام طبرانی نے معجم اوسط میں اختصار کے ساتھ نقل کی ہے ۔ اس کی سند میں ایک راوی عبدالرحمن بن ابوزناد ہے ، اور وہ ضعیف ہے ۔

ابوزبیر بیان کرتے ہیں : میں نے سیدنا جابر رضی اللہ عنہ سے ایسے شخص کے بارے میں دریافت کیا : جو دوسرے شخص کے ساتھ مباشرت کرتا ہے ، تو سیدنا جابر رضی اللہ عنہ نے بتایا : نبی اکرم صلی اللہ علیہ وسلم نے اس سے منع کیا ہے ، میں نے سیدنا جابر رضی اللہ عنہ سے ایسی عورت کے بارے میں دریافت کیا : جو دوسری عورت کے ساتھ مباشرت کرتی ہے ، تو انہوں نے بتایا : نبی اکرم صلی اللہ علیہ وسلم نے ایسا کرنے سے منع کیا ہے ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اور اس میں ضعف پایا جاتا ہے ، اور وہ حسن الحدیث ہے ۔ اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مرد کسی مرد کے ساتھ ، یا عورت کسی عورت کے ساتھ مباشرت نہ کرے ۔ “
یہ روایت امام طبرانی نے معجم اوسط میں اپنے استاد محمد بن عثمان بن سعید ابوعمر ضریر کے حوالے سے نقل کی ہے ، میزان الاعتدال میں یہ بات مذکور ہے یہ راوی محمد بن عثمان بن سعید مصری ہے ، اگر تو یہ وہی ہے تو پھر یہ ضعیف ہے ۔ اس روایت کے بقیہ رجال صحیح کے رجال ہیں ۔

سیدنا ابوموسیٰ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو عورت دوسری عورت کے ساتھ مباشرت کرتی ہے تو وہ دونوں زنا کرنے والی شمار ہوتی ہیں اور جو مرد دوسرے مرد کے ساتھ مباشرت کرتا ہے وہ دونوں زنا کرنے والے شمار ہوتے ہیں ۔ “
یہ روایت امام طبرانی نے معجم کبیر اور معجم اوسط میں اپنے استاد علی بن سعید رازی کے حوالے سے نقل کی ہے ، جس میں کمزوری پائی جاتی ہے ۔ اس روایت کے بقیہ رجال ثقہ ہیں ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم خواتین کو اس بات سے منع کرتے تھے کہ وہ ایک دوسرے کے ساتھ یوں لیٹیں کہ ان کے درمیان کوئی کپڑا نہ ہو ، البتہ ان کے درمیان کوئی کپڑا ہو تو حکم مختلف ہے ، اور اس بات سے بھی منع کیا ہے کہ کوئی شخص دوسرے شخص کے ساتھ یوں لیٹے کہ ان کے درمیان کوئی کپڑا نہ ہو ، البتہ اگر ان کے درمیان کوئی کپڑا ہو تو حکم مختلف ہے ۔ “
یہ روایت امام طبرانی نے نقل کی ہے اور اس کی سند میں ایسے راوی ہیں جن سے میں واقف نہیں ہوں ۔
یہ روایت امام بزار نے نقل کی ہے ۔ اس کی سند میں ایک راوی یوسف بن خالد سمتی ہے اور وہ ضعیف ہے ۔