مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مؤمن الفت رکھتا ہے اور اس سے الفت رکھی جاتی ہے ، ایسے شخص میں بھلائی نہیں ہے جو الفت نہیں رکھتا اور اس سے الفت نہیں رکھی جاتی ۔ “
یہ روایت امام أحمد اور امام بزار نے نقل کی ہے ، امام أحمد کے رجال صحیح کے رجال ہیں ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مومن الفت رکھتا ہے اور اس سے الفت رکھی جاتی ہے ، اور ایسے شخص میں کوئی بھلائی نہیں ہے ، جو الفت نہیں رکھتا اور اس سے الفت نہیں رکھی جاتی ۔ “
یہ روایت امام أحمد اور امام طبرانی نے نقل کی ہے ، اور اس کی سند میں ایک راوی مصعب بن ثابت ہے ، جسے ابن حبان اور دیگر حضرات نے ثقہ قرار دیا ہے ۔ یحیی بن معین اور دیگر حضرات نے اسے ثقہ کہا: ہے ۔ اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : ” مومن الفت رکھتا ہے ، اور ایسے شخص میں کوئی بھلائی نہیں ہے ، جو الفت نہیں رکھتا اور اس سے الفت نہیں رکھی جاتی ۔ “
یہ روایت امام طبرانی نے نقل کی ہے اس کی سند میں ایک راوی مسعودی ہے ، جس میں ضعف پایا جاتا ہے ۔ اس روایت کے بقیہ رجال صحیح کے رجال ہیں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مومن الفت رکھتا ہے ، اور اس سے الفت رکھی جاتی ہے ، اور ایسے شخص میں بھلائی نہیں ہے ، جو الفت نہیں رکھتا اور اس سے الفت نہیں رکھی جاتی ۔ “
یہ روایت امام طبرانی نے معجم اوسط میں علی بن بہرام کے حوالے سے عبدالملک بن ابوکریمہ سے نقل کی ہے ، اور میں ان دونوں سے واقف نہیں ہوں ۔ اس روایت کے بقیہ رجال صحیح کے رجال ہیں ۔