مجمع الزوائد ومنبع الفوائد

سیدنا سہل بن سعد ساعدی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اہل ایمان سے تعلق رکھنے والا ایک مومن جسم میں موجود سر کی مانند ہے کہ مومن کو اہل ایمان کے حوالے سے تکلیف محسوس ہوتی ہے ، جس طرح جسم کو سر میں موجود ( تکلیف کی وجہ سے ) تکلیف محسوس ہوتی ہے ۔ “
یہ روایت امام أحمد نے نقل کی ہے ، اور اس کے رجال صحیح کے رجال ہیں ، صرف عبداللہ بن ثابت کا معاملہ مختلف ہے اور وہ ثقہ ہے ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال صحیح کے رجال ہیں ، صرف سوار بن عمارہ رملی معاملہ مختلف ہے ، اور وہ ثقہ ہے ۔

سیدنا ابوہریرہ رضی اللہ عنہ اور سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک مومن دوسرے مومن کے لئے ایک عمارت کی حیثیت رکھتا ہے ، جس کا ایک حصہ دوسرے کو مضبوط کرتا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی صالح بن نبہان ہے اور وہ ضعیف ہے ۔ آگے چل کر نیکی اور صلہ رحمی سے متعلق باب میں سیدنا بشیر بن سعد رضی اللہ عنہ کی نقل کردہ حدیث آئے گی ۔