مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : وہ ایک مرتبہ نبی اکرم صلی اللہ علیہ وسلم کے ساتھ سفر کر رہی تھیں ۔ سیدہ عائشہ رضی اللہ عنہا کے اونٹ پر لعنت کی گئی ، تو نبی اکرم صلی اللہ علیہ وسلم نے اس کے بارے میں یہ حکم دیا کہ اسے واپس کر دیا جائے ، آپ صلی اللہ علیہ وسلم نے ارشاد فرمایا : لعنت یافتہ کوئی چیز ہمارے ساتھ نہیں رہے گی ۔
یہ روایت امام أحمد نے اور امام طبرانی نے معجم اوسط میں نقل کی ہے اور اس کے رجال صحیح کے رجال ہیں صرف عمرو بن مالک نکری کا معاملہ مختلف ہے اور وہ ثقہ ہے ۔

سیدہ عائشہ رضی اللہ عنہا کے حوالے سے یہ بات منقول ہے کہ وہ ایک اونٹ پر سوار ہوئیں تو انہوں نے اس اونٹ پر لعنت کی تو نبی اکرم صلی اللہ علیہ وسلم نے فرمایا : تم اس پر سوار نہ ہونا ۔
یہ روایت امام أحمد اور امام ابویعلیٰ نے نقل کی ہے اور اس کے رجال ثقہ ہیں ، البتہ یحیی بن وثاب نامی راوی نے سیدہ عائشہ صدیقہ رضی اللہ عنہا سے سماع نہیں کیا ہے اگرچہ وہ تابعی ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم سفر کر رہے تھے ایک شخص نے اونٹنی پر لعنت کی ، آپ نے دریافت کیا : اونٹنی والا شخص کہاں ہے ؟ ایک شخص نے عرض کی : میں ہوں ، نبی اکرم صلی اللہ علیہ وسلم نے فرمایا : اسے پیچھے کر دو کیونکہ اس کے بارے میں تمہاری ( لعنت مستجاب ) ہوئی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کے ساتھ سفر کر رہا تھا اس نے اپنے اونٹ پر لعنت کی تو نبی اکرم صلی اللہ علیہ وسلم نے فرمایا : ” اے اللہ کے بندے ! تم ہمارے ساتھ ایک لعنت یافتہ اونٹ پر سفر نہ کرو ۔ “
یہ روایت امام ابویعلیٰ اور امام طبرانی نے معجم اوسط میں اس کی مانند نقل کی ہے امام ابویعلیٰ کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : ہم نبی اکرم صلی اللہ علیہ وسلم کے ساتھ سفر کر رہے تھے ایک شخص نے اپنے اونٹ پر لعنت کی ، تو نبی اکرم صلی اللہ علیہ وسلم نے یہ حکم دیا کہ اس اونٹ کو پیچھے کر دیا جائے ۔
یہ روایت امام بزار نے اپنے استاد عبداللہ بن شبیب کے حوالے سے نقل کی ہے اور وہ ضعیف ہے ۔

سیدنا عبداللہ بن مسعود رضی اللہ عنہ بیان کرتے ہیں : ایک مرغ نے نبی اکرم صلی اللہ علیہ وسلم کے پاس بانگ دی ، ایک شخص نے اسے برا کہا: ، تو نبی اکرم صلی اللہ علیہ وسلم نے مرغ کو برا کہنے سے منع کیا ۔
یہ روایت امام بزار نے اور امام طبرانی نے نقل کی ہے ، تاہم انہوں نے یہ الفاظ نقل کئے ہیں : ” تم اس پر لعنت نہ کرو اور اسے برا نہ کہو کیونکہ یہ نماز کی طرف بلاتا ہے ۔ “ امام بزار کی سند میں ایک راوی مسلم بن خالد زنگی ہے جسے ابن حبان اور دیگر حضرات نے ثقہ قرار دیا ہے ۔ اس میں ضعف پایا جاتا ہے ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک مرغ نے نبی اکرم صلی اللہ علیہ وسلم کے پاس بانگ دی تو ایک شخص نے کہا: اے اللہ تو اس پر لعنت کر ، تو نبی اکرم صلی اللہ علیہ وسلم نے فرمایا : رک جاؤ ، خبردار یہ نماز کی طرف بلاتا ہے ۔
یہ روایت امام بزار نے نقل کی ہے ۔ اس کی سند میں ایک راوی عباد بن منصور ہے ، جسے یحیی القطان اور دیگر حضرات نے ثقہ قرار دیا ہے ، جبکہ یحیی بن معین اور دیگر حضرات نے اسے ضعیف کہا: ہے ۔ اس روایت کے بقیہ رجال صحیح کے رجال ہیں ۔

سیدنا انس رضی اللہ عنہ بیان کرتے ہیں ہم لوگ نبی اکرم صلی اللہ علیہ وسلم کے پاس موجود تھے ایک شخص کو پسو نے ڈنگ مار دیا ، اس نے اس پر لعنت کی ، تو نبی اکرم صلی اللہ علیہ وسلم نے فرمایا : تم اس پر لعنت نہ کرو کیونکہ اس نے ایک نبی کو نماز کے لئے بیدار کیا تھا ۔
یہ روایت امام ابویعلیٰ اور امام بزار نے نقل کی ہے ، تاہم انہوں نے یہ الفاظ نقل کے ہیں : ” تم اسے برا نہ کہو کیونکہ اس نے ایک نبی کو صبح کی نماز کے لئے بیدار کیا تھا ۔ “ امام طبرانی نے معجم اوسط میں
یہ روایت نقل کی ہے اور ان کے الفاظ یہ ہیں : ” نبی اکرم صلی اللہ علیہ وسلم کے سامنے پسوؤں کا ذکر کیا گیا تو آپ نے ارشاد فرمایا : یہ نماز کے لئے بیدار کرتا ہے ۔ “ امام طبرانی کے رجال ثقہ ہیں ، اور سعید بن بشیر نامی راوی میں ضعف پایا جاتا ہے ، اور وہ ثقہ ہے ۔ امام بزار کی سند میں ایک راوی سوید بن ابراہیم جسے ابن عدی اور دیگر حضرات نے ثقہ قرار دیا ہے اور اس میں ضعف پایا جاتا ہے ان دونوں کے بقیہ رجال صحیح کے رجال ہیں ۔

سیدنا علی بن ابوطالب رضی اللہ عنہ بیان کرتے ہیں ہم نے ایک جگہ پر پڑاؤ کیا تو پسوؤں نے ہمیں اذیت پہنچائی ، تو ہم نے انہیں برا بھلا کہا: ، تو نبی اکرم صلی اللہ علیہ وسلم نے فرمایا : تم لوگ انہیں برا نہ کہو کیونکہ یہ اچھا جانور ہے ، اس نے تمہیں اللہ کے ذکر کے لئے بیدار کیا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سعد بن طریق ہے ، اور وہ متروک ہے ۔