مجمع الزوائد ومنبع الفوائد

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو مسلمان کسی عورت کے محاسن کی طرف دیکھنے کے بعد اپنی نگاہ جھکا لیتا ہے ، تو اللہ تعالیٰ اسے ایسی عبادت عطا کرتا ہے ، جس کی حلاوت وہ ( شخص ) محسوس کرتا ہے ۔ “
یہ روایت امام أحمد نے اور امام طبرانی نے نقل کی ہے ، تاہم انہوں نے یہ الفاظ نقل کئے ہیں : ” عورت کی طرف پہلی مرتبہ نظر پڑتی ہے ۔ “ اس کی سند میں ایک راوی علی بن یزید الہانی ہے ، اور وہ متروک ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم نے ان سے فرمایا : ” اے علی ! تمہارے لئے جنت میں خزانہ ہے ، اور تم دو قرنوں والے ہو ، تو تم ایک نظر کے بعد دوسری نظر نہ ڈالنا کیونکہ تمہیں پہلی کا حق ہے ، لیکن دوسری کا حق نہیں ہے ۔ “
یہ روایت امام أحمد نے نقل کی ہے ۔ اس کی سند میں ایک راوی ابن اسحاق ہے ، اور وہ مدلس ہے ۔ اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تو تم لوگ اپنی نگاہیں جھکا کے رکھو ، اور اپنی شرمگاہوں کی حفاظت کرو ، اور اپنے چہروں کو ٹھیک رکھو ( راوی کو شک ہے یا شاید یہ الفاظ ہیں : ) اپنے چہروں کو کھلا رکھو ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے اور وہ متروک ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ( اللہ تعالیٰ فرماتا ہے : ) ” نظر شیطان کے تیروں میں سے زہر میں بجھا ہوا ایک تیر ہے ، جو شخص میرے خوف کی وجہ سے اسے ترک کر دیتا ہے ، میں اس کو بدلے میں ایسا ایمان عطا کروں گا کہ جس کی حلاوت وہ اپنے دل میں محسوس کرے گا ۔ “
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن اسحاق واسطی ہے ، اور وہ ضعیف ہے ۔