مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس موجود دو افراد کو چھینک آئی ، ان میں سے ایک شخص دوسرے سے نمایاں حیثیت رکھتا تھا ، نمایاں حیثیت رکھنے والے شخص نے چھینکا تو اس نے اللہ تعالیٰ کی حمد بیان نہیں کی ، تو نبی اکرم صلی اللہ علیہ وسلم نے اسے جواب بھی نہیں دیا ، دوسرے شخص نے چھینکا ، اس نے اللہ تعالیٰ کی حمد بیان کی ، تو نبی اکرم صلی اللہ علیہ وسلم نے اسے جواب دیا ( یعنی جوابی دعا دی ) تو اس نمایاں حیثیت کے شخص نے کہا: میں نے آپ کے پاس چھینکا لیکن آپ نے مجھے جواب نہیں دیا ، لیکن اس شخص نے آپ کے پاس چھینکا تو آپ نے اسے جواب دیا : نبی اکرم صلی اللہ علیہ وسلم نے ارشاد فرمایا : اس شخص نے اللہ کا ذکر کیا تھا تو میں نے اس کا ذکر کیا اور تم اللہ تعالیٰ ( کا ذکر کرنا ) بھول گئے تھے ، تو میں بھی تمہیں بھول گیا ( یعنی میں نے تمہیں تمہارے حال پر چھوڑ دیا ) ۔
یہ روایت امام أحمد نے اور امام طبرانی نے معجم اوسط میں نقل کی ہے ، اور امام أحمد کے رجال صحیح کے رجال ہیں ، صرف ربعی بن ابراہیم کا معاملہ مختلف ہے اور وہ ثقہ اور مامون ہے ۔

سیدنا سہل بن سعد رضی اللہ عنہ بیان کرتے ہیں : عامر بن طفیل نبی اکرم صلی اللہ علیہ وسلم کے پاس مدینہ منورہ آیا ، وہ نبی اکرم صلی اللہ علیہ وسلم کے ساتھ بحث کرنے لگا ، اس کی آواز بلند ہو گئی ، اس وقت سیدنا ثابت بن قیس رضی اللہ عنہ نبی اکرم صلی اللہ علیہ وسلم کے پاس کھڑے ہوئے تھے ۔ انہوں نے کہا: اے عامر ! نبی اکرم صلی اللہ علیہ وسلم کے سامنے اپنی آواز کو پست رکھو ، اس نے کہا: تمہارا اس بات کے ساتھ کیا واسطہ ہے ، سیدنا ثابت رضی اللہ عنہ نے کہا: اس ذات کی قسم ! جس نے نبی اکرم صلی اللہ علیہ وسلم کو عزت عطا کی ہے ، اگر یہ بات نبی اکرم صلی اللہ علیہ وسلم کو ناگوار نہ گزرتی ہوتی تو میں نے اس تلوار کے ذریعے تمہارا سر اڑا دینا تھا ، عامر نے نبی اکرم صلی اللہ علیہ وسلم کی طرف دیکھا آپ تشریف فرما تھے اور سیدنا ثابت رضی اللہ عنہ کھڑے ہوئے تھے ۔ اس نے کہا: اللہ کی قسم ! اے ثابت اگر تم اپنے آپ کو میرے مقابلے میں پیش کرو ، تو تم ضرور مجھ سے پھر جاؤ گے ، تو سیدنا ثابت رضی اللہ عنہ نے کہا: اللہ کی قسم ! اے عامر اگر تم اپنے آپ کو صرف میری زبان کے مقابلے میں پیش کر دو ، تو تمہیں میری زندگی بری لگے گی ، اس وقت عامر بن طفیل کے بھتیجے کو چھینک آئی ، اس نے اللہ تعالیٰ کی حمد بیان کی ۔ نبی اکرم صلی اللہ علیہ وسلم نے اس کو چھینک کا جواب دیا : پھر عامر بن طفیل کو چھینک آئی ، اس نے اللہ تعالیٰ کی حمد بیان نہیں کی ، تو نبی اکرم صلی اللہ علیہ وسلم نے اسے جواب نہیں دیا ، تو عامر نے کہا: آپ نے اس بچے کو جواب دیدیا ہے ، اور مجھے نہیں دیا ، تو نبی اکرم صلی اللہ علیہ وسلم نے ارشاد فرمایا : اس نے اللہ تعالیٰ کی حمد بیان کی تھی ۔ ( علامہ ہیثمی فرماتے ہیں : ) میں یہ کہتا ہوں اس کے بعد راوی نے پوری حدیث ذکر کی ہے ، جو طویل حدیث کے طور پر غزوہ بئر معونہ میں موجود ہے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالمہیمن بن عباس ہے اور وہ ضعیف ہے ۔