مجمع الزوائد ومنبع الفوائد

سیدنا عمرو بن امیہ بن ضمری رضی اللہ عنہ بیان کرتے ہیں : نبی اکرم صلی اللہ علیہ وسلم نے تین افراد کو بھیجا ، ایک کو قیصر کی طرف ، ایک کو کسریٰ کی طرف اور ایک کو اسکندریہ کے حکمران کی طرف بھیجا ، آپ نے سیدنا عمرو رضی اللہ عنہ کو نجاشی کے پاس بھیجا ، جب سیدنا عمرو رضی اللہ عنہ نجاشی کے پاس آئے ، تو انہوں نے یہ صورت حال پائی کہ جو لوگ بھی نجاشی کے پاس آتے تھے ، وہ ایک چھوٹے دروازے میں سے داخل ہوتے تھے ، جب سیدنا عمرو رضی اللہ عنہ نے اس چھوٹے دروازے کو اور ان لوگوں کے داخل ہونے کے طریقے کو دیکھا تو انہوں نے پیٹھ پھیر لی اور پھر الٹے قدم چلتے ہوئے اندر داخل ہوئے ، جب وہ اندر داخل ہو گئے ، تو سیدھے ہو گئے ، حبشی لوگ اس بات پر مشتعل ہو گئے ، انہوں نے سیدنا عمرو رضی اللہ عنہ کو قتل کرنے کا ارادہ کیا ، ان لوگوں نے کہا: تم اس طرح کیوں نہیں داخل ہوئے جس طرح ہم داخل ہوتے ہیں ؟ تو سیدنا عمرو رضی اللہ عنہ نے فرمایا : ہم اپنے نبی کے ساتھ بھی ایسا نہیں کرتے ہیں ، جو اس بات کے زیادہ حق دار ہیں کہ ان کے ساتھ اس طرح کیا جائے ، تو نجاشی نے کہا: اسے چھوڑ دو یہ ٹھیک کہہ رہا ہے ۔
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ، اس کے بعض راویوں کے بارے میں ایسا کلام کیا گیا ہے ، جو نقصان دہ نہیں ہے ۔

سیدہ ام سلمہ رضی اللہ عنہا بیان کرتی ہیں : مکہ میں جب مسلمانوں کے خاندانوں نے انہیں تنگ کرنا شروع کیا تو نبی اکرم صلی اللہ علیہ وسلم نے مسلمانوں سے فرمایا کہ تم زمین میں ادھر ادھر چلے جاؤ ، تو وہ لوگ حبشہ کی سرزمین کی طرف چلے گئے ، قریش نے عبداللہ بن ابوربیعہ اور عمرو بن العاص کو بھیجا ، عمرو اور عبداللہ نے نجاشی سے جو باتیں کی تھیں ، ان میں یہ بات بھی شامل تھی کہ یہ لوگ آپ کو اس طرح سلام نہیں کریں گے ، جس طرح ہم میں سے آپ کے پاس آنے والا شخص آپ کو سلام کرتا ہے ، نجاشی نے سیدنا جعفر رضی اللہ عنہ اور ان کے ساتھیوں سے دریافت کیا : کیا وجہ ہے کہ تم لوگ مجھے اس طرح سلام نہیں کرتے ہو ، جس طرح دوسرے لوگ کرتے ہیں ؟ تو انہوں نے جواب دیا : ہم آپ کو اس طرح سلام کرتے ہیں جس طرح ہمارے نبی کو سلام کیا جاتا ہے ، اور یہ اہل جنت کا سلام کرنے کا طریقہ ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن یعقوب زہری ہے ، جسے ایک سے زیادہ افراد نے ثقہ قرار دیا ہے ، اور اس کی تدلیس کی وجہ سے اسے ضعیف بھی قرار دیا گیا ہے ، تاہم اس نے ایک ایسے شیخ کے حوالے سے تحدیث کی صراحت کی ہے ، جو ثقہ ہے ۔ اس روایت کے بقیہ رجال ثقہ ہیں ۔ اس سے پہلے کچھ احادیث گزر چکی ہیں ، جن میں نبی اکرم صلی اللہ علیہ وسلم کا یہ فرمان مذکور ہے : ” اگر میں نے کسی کو کسی دوسرے کو سجدہ کرنے کی اجازت دینی ہوتی ، تو میں عورت کو یہ حکم دیتا کہ وہ اپنے شوہر کو سجدہ کرے ۔ “ اس روایت کے مختلف طرق کتاب النکاح میں گزرے ہیں ۔