مجمع الزوائد ومنبع الفوائد

معاویہ بن قرہ بیان کرتے ہیں : میرے والد نے مجھ سے کہا: جب تم کسی محفل سے گزرو تو اس محفل والوں کو سلام کرو ، اگر وہ بھلائی کر رہے ہوں گے تو تم ان کے شراکت دار بن جاؤ گے ، اور اگر وہ اس کے علاوہ صورت حال پر ہوں گے تو تمہیں تمہارا اجر مل جائے گا ۔ میں نے نبی اکرم صلی اللہ علیہ وسلم کو اسی طرح ارشاد فرماتے ہوئے سنا ہے : ۔
یہ روایت امام طبرانی نے نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

معاویہ بن قرہ اپنے والد کے بارے میں نقل کرتے ہیں : انہوں نے فرمایا : اے میرے بیٹے ! جب تم کسی محفل میں ہو ، اور تمہیں اس کی بھلائی کی امید ہو ، اور تمہیں کسی کام کے سلسلے میں جلدی اٹھنا پڑے ، تو تم السلام علیکم کہو ، کیونکہ اس محفل میں ان لوگوں کو جو بھی اجر و ثواب حاصل ہو گا ، تم اس میں شریک ہو گے ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ، صرف بسطام بن مسلم کا معاملہ مختلف ہے ، اور وہ ثقہ ہے ۔