مجمع الزوائد ومنبع الفوائد

سیدنا ہانی بن یزید ابوشریح رضی اللہ عنہ بیان کرتے ہیں : میں نے عرض کی : یا رسول اللہ ! میری کسی ایسے عمل کی طرف رہنمائی کیجئے جو مجھے جنت میں داخل کروا دے ، آپ نے ارشاد فرمایا : ” مغفرت کو واجب کرنے والی چیزوں میں سلام کو پھیلانا اور عمدہ گفتگو کرنا شامل ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی ابوعبیدہ بن عبداللہ اشجعی ہے ، امام أحمد بن حنبل اور دیگر حضرات نے اس سے روایات نقل کی ہیں ، کسی نے اسے ضعیف قرار نہیں دیا ہے ۔ اس روایت کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” السلام ، اللہ تعالیٰ کے اسماء میں سے ایک اسم ہے ، جسے اس نے زمین میں رکھا ہے ، تو تم اسے اپنے درمیان پھیلاؤ ، مسلمان شخص جب کسی قوم کے پاس سے گزرے تو وہ انہیں سلام کرے اور وہ اس کو جواب دیں تو اس شخص کو ان لوگوں پر ایک درجہ کی فضیلت حاصل ہوتی ہے کہ اُس نے ان لوگوں کو اس نام کی یاد دلائی ہے ، اور اگر وہ لوگ اسے جواب نہ دیں تو اس ( سلام کرنے والے کو ) وہ جواب دیتا ہے ، جو ان لوگوں سے زیادہ بہتر اور زیادہ پاکیزہ ہو ۔ “
یہ روایت امام بزار نے دو اسناد کے ساتھ نقل کی ہے اور امام طبرانی نے مختلف اسانید کے ساتھ نقل کی ہے ، جن میں سے ایک کے رجال صحیح کے رجال ہیں ، جو امام بزار اور امام طبرانی کی نقل کردہ روایت میں ہے ۔

سیدنا براء بن عازب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سلام کو پھیلاؤ ! تم سلامت رہو گے ، اور ” اشرہ “ شر ہے ۔ “
یہ روایت امام أحمد اور امام ابویعلیٰ نے نقل کی ہے ۔ وہ کہتے ہیں : ابومعاویہ نے یہ بات بیان کی ہے : ” اشرہ “ سے مراد بارش کا بکثرت ہونا ہے ۔ اس روایت کے رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” السلام ، اللہ تعالیٰ کے اسماء میں سے ایک اسم ہے ، جسے اس نے ہمارے دین کے افراد کے لئے تحیت کے طور پر زمین میں رکھا ہے ، اور ہمارے ذمیوں کے لئے امان کے طور پر رکھا ہے ۔ “
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی عصمہ بن محمد انصاری ہے م اور وہ متروک ہے ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ نے سلام کو ہماری امت کے لئے تحیت اور ہمارے ذمیوں کے لئے امان بنایا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایسا راوی ہے ، جس سے میں واقف نہیں ہوں اور ایک راوی عمرو بن ہاشم بیروتی ہے ، جس کی توثیق کی گئی ہے ، اور اس میں ضعف پایا جاتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سلام ، اللہ تعالیٰ کے اسماء میں سے ایک اسم ہے ، تم اُس کو اپنے درمیان پھیلاؤ ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی بشر بن رافع ہے ، اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم سلام کو پھیلاؤ کیونکہ یہ اللہ تعالیٰ کی رضامندی کا باعث ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سالم بن عبدالاعلیٰ ابوالفیض ہے اور وہ متروک ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ جنت میں اس وقت تک داخل نہیں ہو گے جب تک تم مومن نہیں ہوتے ، اور تم اس وقت تک مومن نہیں ہو گے ، جب تک تم ایک دوسرے سے محبت نہیں رکھتے ، کیا میں تمہاری رہنمائی اس چیز کی طرف نہ کروں ؟ جب تم وہ کام کر لو گے ، تو تم آپس میں ایک دوسرے سے محبت رکھو گے ، اپنے درمیان سلام کو پھلاؤ ( یا وہ کام تمہارے درمیان سلام کو پھیلانا ہے ) ۔ “
یہ روایت امام طبرانی نے نقل کی ہے ۔ اس کی سند میں ایک راوی عطاء بن مسلم ہے اور وہ ثقہ ہے ۔ اس میں ضعف پایا جاتا ہے ۔ اس روایت کے بقیہ رجال ثقہ ہیں ۔

سیدنا ابوموسیٰ اشعری رضی اللہ عنہ بیان کرتے ہیں ۔ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم لوگ اس وقت تک مؤمن نہیں ہو گے جب تک ایک دوسرے سے محبت نہیں رکھتے ، کیا میں تمہاری رہنمائی اس چیز کی طرف نہ کروں ؟ جس کی وجہ سے تم ایک دوسرے سے محبت رکھو گے ، لوگوں نے عرض کی : یا رسول اللہ ! جی ہاں ، نبی اکرم صلی اللہ علیہ وسلم نے ارشاد فرمایا : تم اپنے درمیان سلام کو پھیلاؤ ، اس ذات کی قسم ! جس کے دست قدرت میں میری جان ہے ، تم لوگ اس وقت تک جنت میں داخل نہیں ہو گے ، جب تک ایک دوسرے پر رحم نہیں کرتے ، لوگوں نے عرض کی : جی ہاں ہم سب رحم کرنے والے ہیں ، نبی اکرم صلی اللہ علیہ وسلم نے ارشاد فرمایا : اس سے مراد یہ نہیں ہے کہ کوئی شخص اپنے ساتھی پر رحمت کرے ، بلکہ یہ عمومی رحمت مراد ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن صالح ہے ، جس کی توثیق کی گئی ہے ، اور ایک جماعت نے اسے ضعیف قرار دیا ہے ۔ اس روایت کا ایک طریق کتاب التوبہ میں بھی ہے ۔

سیدنا زبیر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم سے پہلے کی امتوں کی بیماری تم میں بھی آ جائے گی ، اور وہ آپس میں بغض رکھنا اور حسد رکھنا ہے ، اور بغض مونڈ دینے والی چیز ہے ، یہ بالوں کو مونڈنے والی چیز نہیں ہے ، بلکہ دین کو مونڈنے والی چیز ہے ۔ اس ذات کی قسم ! جس کے دست قدرت میں میری جان ہے ، تم لوگ اس وقت تک جنت میں داخل نہیں ہو گے ، جب تک تم مومن نہیں ہو جاتے اور تم اس وقت تک مومن نہیں ہو گے ، جب تک تم ایک دوسرے سے محبت نہیں رکھتے ، کیا میں تمہیں اس چیز کے بارے میں نہ بتاؤں ؟ جو تمہارے لئے اس چیز ( یعنی باہمی محبت ) کو ثابت کر دے ؟ تم اپنے درمیان سلام کو پھیلاؤ ۔ “
یہ روایت امام بزار نے نقل کی ہے ، اور اس کی سند عمدہ ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم سلام کو پھیلاؤ تاکہ تم غالب آ جاؤ ۔ “
یہ روایت امام طبرانی نے نقل کی ہے ، اور اس کی سند حسن ہے ۔