مجمع الزوائد ومنبع الفوائد

سیدنا ابوامامہ رضی اللہ عنہ نبی اکرم صلی اللہ علیہ وسلم تک مرفوع حدیث کے طور پر یہ بات نقل کرتے ہیں : ( آپ صلی اللہ علیہ وسلم نے ارشاد فرمایا : ) ” دابۃ الارض نکلے گا جو لوگوں کے ناک پر نشان لگائے گا ، پھر وہ لوگ اسی حالت میں رہیں گے ، یہاں تک کہ کوئی اونٹ خریدے گا تو کہے گا : یہ تم نے کس سے خریدا ہے ، تو وہ جواب دے گا : یہ میں نے ایسے شخص سے خریدا ہے جس پر لگام ڈالی گئی تھی ( یعنی نشان لگایا گیا تھا ) ۔ “

ایک روایت میں یہ الفاظ ہیں : ” پھر وہ لوگ تمہارے درمیان داخل ہو جائیں گے ۔ “
یہ روایت امام أحمد نے نقل کی ہے ، اور اس کے رجال صحیح کے رجال ہیں ، صرف عمر بن عبدالرحمن بن عطیہ کا معاملہ مختلف ہے ، اور وہ ثقہ ہے ۔

سیدنا عبداللہ بن عمر رضی اللہ عنہما کے بارے میں یہ بات منقول ہے ۔ انہوں نے فرمایا : کیا میں تمہیں وہ جگہ نہ دکھاؤں جس کے بارے میں نبی اکرم صلی اللہ علیہ وسلم نے یہ ارشاد فرمایا ہے کہ میں نے یہ چیز دیکھی ہے کہ دابۃ الارض اس میں سے نکلے گا ، پھر نبی اکرم صلی اللہ علیہ وسلم نے اپنا عصا صفا پہاڑ میں موجود اس خالی جگہ پر ڈالا اور فرمایا : وہ جانور پروں والا اور بالوں ( یا کمزور جلد ) والا ہو گا ، اس کا ایک تہائی حصہ یوں نکلے گا ، جتنی تیزی سے تیز رفتار گھوڑا جاتا ہے ، تین دن اور تین راتیں لگیں گے ، وہ لوگوں کے پاس سے گزرے گا ، لوگ اس سے بھاگ کر مساجد کی طرف جائیں گے ، تو وہ ان سے کہے گا : کیا تم یہ سمجھتے ہو کہ مسجدیں تمہیں مجھ سے بچا لیں گی ، پھر وہ ان کو نشان لگانا شروع کرے گا ، ان لوگوں کو بازار میں لایا گیا جائے گا ، تو وہ یہ کہے گا : اے کافر ! اے مومن ۔
یہ روایت امام ابویعلیٰ نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ مدلس ہے ۔ اس روایت کے بقیہ رجال ثقہ ہیں ۔

سیدنا ابوسریحہ رضی اللہ عنہ یعنی سیدنا حذیفہ بن اسید بیان کرتے ہیں : نبی اکرم صلی اللہ علیہ وسلم نے ارشاد فرمایا : ” دابۃ الارض تین مختلف زمانوں میں نکلے گا ، ایک مرتبہ وہ یمن کے دور دراز علاقے میں نکلے گا ، یہاں تک کہ اس کا تذکرہ ویرانے میں رہنے والے لوگوں میں ہو گا ، بستیوں میں اس کا تذکرہ نہیں ہو گا ، پھر وہ ایک طویل عرصے تک اس کے بعد چھپا رہے گا ، پھر وہ دوسری مرتبہ مکہ کے قریب نکلے گا ، اس وقت اس کا ذکر ویرانوں میں بھی ہو گا ، اور اس کا ذکر مکہ میں بھی ہو گا ، پھر وہ ایک طویل عرصہ تک ٹھہرا رہے گا ، پھر وہ لوگوں کے پاس اس وقت آئے گا ، جو اللہ کی مساجد میں سے حرمت کے اعتبار سے اللہ تعالیٰ کے نزدیک سب سے زیادہ عظمت والی ہے ، سب سے زیادہ بہتری والی ہے ، اللہ تعالیٰ کے نزدیک سب سے زیادہ معزز ہے ، اور وہ مسجد حرام ہے ، صرف مسجد کا کنارہ ان لوگوں کو سنبھال سکے گا ، بنو مخزوم والے دروازے کی طرف حجر اسود اور مقام ابراہیم کی درمیانی جگہ کی طرف سے وہ آئے گا ، وہ مسجد کے دائیں طرف سے آئے گا ، تو لوگ متفرق ہو کر اس سے دور جائیں گے ، مسلمانوں کا ایک گروہ اس کے سامنے جمع رہے گا ، وہ لوگ یہ بات جان لیں گے کہ وہ اللہ تعالیٰ کو عاجز نہیں کر سکتے ، وہ ان کے سامنے نکلے گا ، اس کے سر سے مٹی جھڑ رہی ہو گی ، وہ ظاہر ہو گا ، ان کے چہرے پریشان ہوں گے ، یہاں تک کہ وہ انہیں چھوڑے گا ، تو ان کے چہرے چمکتے ہوئے ستاروں کی مانند ہوں گے ، پھر وہ زمین میں جائے گا ، کوئی پیچھا کرنے والا اس تک نہیں پہنچ سکے گا ، اور کوئی بھاگنے والا اس سے بچ نہیں سکے گا ، یہاں تک کہ ایک شخص کھڑا ہو گا ، اور نماز کے ذریعے اس سے بچنا چاہے گا ، تو وہ اس کے پاس آئے گا اور کہے گا : اے فلاں اب تم نماز پڑھ رہے ہو ؟ پھر وہ سامنے سے اس کی طرف آئے گا ، اور اس کے چہرے پر نشان لگا دے گا ، پھر وہ جائے گا ، تو لوگ اپنے علاقوں سے باہر نکل جائیں گے ، سفر کرنے لگیں گے ، اموال میں شراکت دار ہوں گے ، مومن کے مقابلے میں کافر کو پہچان لیا جائے گا ، یہاں تک کہ مومن شخص کافر سے کہے گا : اے کافر تم میرا حق مجھے ادا کرو اور کافر شخص مومن سے کہے گا : اے مومن تم میرا حق مجھے ادا کرو ۔
یہ روایت امام طبرانی نے نقل کی ہے ۔ اس کی سند میں ایک راوی طلحہ بن عمرو ہے اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” پہاڑ کا اچھا راستہ ہی برا ہو گا ، یہ بات آپ نے دو یا تین مرتبہ ارشاد فرمائی ، عرض کی گئی : یا رسول اللہ ! اس کی وجہ کیا ہے ؟ نبی اکرم صلی اللہ علیہ وسلم نے ارشاد فرمایا : اس سے دابۃ الارض نکلے گا اور تین مرتبہ چیخے گا ، تو دونوں کناروں کے درمیان موجود ہر چیز اسے سن لے گی ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ریاح بن عبیداللہ بن عمر ہے اور وہ ضعیف ہے ۔

سیدنا حذیفہ بن اسید رضی اللہ عنہ سے یہ روایت منقول ہے راوی کہتے ہیں : میرا خیال ہے ۔ انہوں نے یہ روایت مرفوع حدیث کے طور پر نقل کی ہے ( نبی اکرم صلی اللہ علیہ وسلم نے ارشاد فرمایا ہے : ) ” دابۃ الارض سب سے بڑی مسجد سے نکلے گا ، ابھی وہ لوگ وہاں ہوں گے کہ اسی دوران زمین ہل جائے گی اور ابھی وہ لوگ اسی حالت میں ہوں گے کہ وہ تھرتھراے گی ۔ “ ابن عیینہ بیان کرتے ہیں : یہ اس وقت نکلے گا جب اس وقت کا حاکم مزدلفہ سے روانہ ہو گا ، حاجیوں سے پہلے جانے والوں کو اسی لئے مقرر کیا گیا ہے ، تاکہ وہ لوگوں کو یہ بتا دیں کہ ابھی دابۃ الارض نہیں نکلا ہے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔ سیدنا عبداللہ بن عمر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب سورج مغرب سے نکل آئے گا ، تو ابلیس سجدے میں گر جائے گا ، اور وہ بلند آواز میں پکار کر کہے گا : اے میرے معبود ! تو مجھے حکم دے جسے تو چاہتا ہے ، میں اسے سجدہ کر دوں گا ۔ نبی اکرم صلی اللہ علیہ وسلم فرماتے ہیں : تو اس کے ساتھی اس کے پاس اکٹھے ہوں گے اور کہیں گے : اے آقا ! یہ گریہ و زاری کس وجہ سے ہے ؟ وہ کہے گا : میں نے اپنے پروردگار سے یہ دعا مانگی تھی کہ وہ مجھے ایک متعین وقت تک کی مہلت دے ، تو یہ وہ متعین وقت ہے ۔ نبی اکرم صلی اللہ علیہ وسلم نے ارشاد فرمایا ہے : پھر دابۃ الارض صفا پہاڑ میں موجود ایک سوراخ سے نکلے گا ، اور اس کا پہلا قدم انطاکیہ میں ہو گا ، پھر وہ ابلیس کے پاس آئے گا اور اس کو تھپڑ مارے گا ۔ “
یہ روایت امام طبرانی نے معجم کبیر میں اور معجم اوسط میں نقل کی ہے ۔ اس کی سند میں ایک راوی اسحاق بن ابراہیم بن زبریق ہے ، اور وہ ضعیف ہے ۔