مجمع الزوائد ومنبع الفوائد

سیدنا ابوذر غفاری رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت اس وقت تک قائم نہیں ہو گی جب تک کوئی بے وقوف ، جو بے وقوف کا بچہ ہو ، وہ دنیا پر غالب نہیں آ جائے گا ، اور لوگوں میں سب سے زیادہ فضیلت والا وہ مومن ہو گا ، جو نیک ماں باپ کی اولاد ہو ۔ “
یہ روایت امام طبرانی نے معجم اوسط میں نقل کی ہے ۔ اس کے رجال کی توثیق کی گئی ہے ۔ اس کے بعض راویوں میں ضعیف ہونا پایا جاتا ہے ۔ ( علامہ ہیثمی فرماتے ہیں : ) میں یہ کہتا ہوں اس سے پہلے ایک باب گزر چکا ہے ، جو اسی مفہوم کے بارے میں ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب آخری زمانے میں ایسے لوگ آئیں گے ، جن کے چہرے آدمیوں کے چہروں کی مانند ہوں گے ، اور ان کے دل شیاطین کے دلوں کی مانند ہوں گے وہ چیر پھاڑ کرنے والے بھیڑیوں کی مانند ہوں گے ، ان کے دلوں میں ذرا بھی رحمت نہیں ہو گی ، وہ بہت زیادہ خون بہانے والے ہوں گے ، ہر قبیح چیز کے مرتکب ہوں گے ، اگر تم ان کی پیروی کرو گے ، تو وہ تمہیں چھپا دیں گے ، اگر تم ان سے چھپ جاؤ گے ، تو وہ تمہاری غیبت کریں گے ، اگر وہ تمہارے ساتھ بات چیت کریں گے تو وہ تمہارے ساتھ جھوٹ بولیں گے ، اگر تم انہیں امین بناؤ گے ، تو وہ تمہارے ساتھ خیانت کریں گے ، ان کا بچہ گناہ گار ہو گا ، ان کا جوان شاطر ہو گا ، ان کا بوڑھا نہ نیکی کا حکم دے اور نہ برائی سے منع کرے گا ، ان کے حوالے سے عزت حاصل کرنا ، درحقیقت ذلت ہو گا اور جو کچھ ان کے پاس موجود ہے ۔ اس کے حصول کی خواہش غربت ہو گی ، ان کے درمیان بردبار شخص بہکا ہوا ہو گا ، اور ان کے درمیان نیکی کا حکم دینے والا شخص تہمت یافتہ ہو گا ، ان کے درمیان مومن شخص کمزور ہو گا ، اور ان کے درمیان فاسق شخص نمایاں حیثیت کا مالک ہو گا ، ان کے درمیان سنت ، بدعت شمار ہو گی اور ان کے درمیان بدعت ، سنت شمار ہو گی ، اس وقت اللہ تعالیٰ ان لوگوں پر اپنے بدترین لوگوں کو مسلط کرے گا ، اس وقت ان کے نیک لوگ دعا کریں گے ، لیکن ان کی دعا قبول نہیں ہو گی ۔ “
یہ روایت امام طبرانی نے نقل کی ہے ۔ اس کی سند میں ایک راوی محمد بن معاویہ نیشاپوری ہے اور وہ متروک ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت قریب ہونے کی نشانیوں میں یہ بات شامل ہے کہ برے لوگوں کو بلندی عطا کی جائے گی اور نیک لوگوں کو پست کیا جائے گا ، قبیح بات کی جائے گی ، عمل روک لیا جائے گا اور لوگوں میں مثناة کو پڑھا جائے گا ، میں نے دریافت کیا : مثناة سے مراد کیا ہے ؟ آپ نے فرمایا : اللہ کی کتاب کے علاوہ جو کچھ بھی لکھا گیا ہو ۔ “
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

سیدنا سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک پہاڑ اپنی جگہ سے ہٹ نہیں جائیں گے ، اور تم بڑے بڑے امور کو دیکھو گے کہ تم نے اس سے پہلے انہیں نہیں دیکھا ہو گا ۔ “
یہ روایت امام طبرانی نے نقل کی ہے ۔ اس کی سند میں ایک راوی عفیر بن معدان ہے ، اور وہ ضعیف ہے ۔

ان کے حوالے سے یہ بات منقول ہے ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت قائم ہونے سے پہلے تم ایسی چیزیں دیکھو گے ، جنہیں تم بڑا منکر سمجھو گے ، تم کہو گے : کیا ہمیں ان کے بارے میں بتایا گیا تھا ؟ جب تم ان چیزوں کو دیکھو تو اللہ کا ذکر کرو اور یہ بات جان لو کہ یہ قیامت ( قریب آنے ) کا آغاز ہے ، یہاں تک کہ آپ نے یہ فرمایا : ” عنقریب تم پہاڑوں کو دیکھو گے کہ وہ صور پھونکے جانے سے پہلے اپنی جگہ سے ہٹ جائیں گے ۔ “ ( راوی بیان کرتے ہیں ) نبی اکرم صلی اللہ علیہ وسلم ہم سے یہ بھی فرمایا کرتے تھے : ” قیامت اس وقت تک قائم نہیں ہو گی ، جب تک کوئی پتھر یہودی کے خلاف رہنمائی نہیں کرے گا ، جو یہودی اس کے پیچھے چھپا ہوا ہو گا ، اسے کسی مسلمان نے پیچھے جانے پر مجبور کیا ہو گا ، وہ سامنے سے آئے گا ، وہ یہودی چھپا ہوا ہو گا ، وہ پتھر کہے گا : اے اللہ کے بندے ! یہ ہے وہ شخص جسے تم تلاش کر رہے ہو ۔ “
یہ روایت امام طبرانی نے نقل کی ہے امام بزار نے اختصار کے ساتھ نقل کی ہے ۔ اس کی سند ضعیف ہے اور اس کی سند میں ایسے راوی ہیں جن سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : قیامت کی نشانیوں میں یہ بات شامل ہے کہ کنجوسی اور فحاشی پھیل جائے گی ، خائن شخص کو امین بنایا جائے گا ، امین کو خائن قرار دیا جائے گا ، ایسے لباس ظاہر ہوں گے ، جنہیں عورتیں پہنیں گی تو وہ لباس پہننے کے باوجود برہنہ ہوں گی ، لوگ تحوت اور وعول لوگوں پر غالب ہو جائیں گے ۔ راوی بیان کرتے ہیں : انہوں نے دریافت کیا : اے سیدنا عبداللہ بن مسعود رضی اللہ عنہ کیا آپ نے میرے محبوب کی زبانی اسی طرح سنا ہے ۔ انہوں نے فرمایا : رب کعبہ کی قسم ! جی ہاں ، ہم نے دریافت کیا : تحوت سے مراد کیا ہے ؟ انہوں نے فرمایا : گھٹیا لوگ اور تنگ گھروں میں رہنے والے لوگ ، وہ لوگ اپنے نیک لوگوں کے اوپر آ جائیں گے ، اور وعول سے مراد نیک گھرانے کے لوگ ہیں ۔ ( علامہ ہیثمی فرماتے ہیں ) میں یہ کہتا ہوں ” صحیح“ میں صرف سیدنا ابوہریرہ رضی اللہ عنہ کے حوالے سے حدیث منقول ہے ، اور وہ بھی کچھ حصہ مذکور ہے ۔ اس روایت کے رجال صحیح کے رجال ہیں ، صرف محمد بن حارث بن سفیان کا معاملہ مختلف ہے ، اور وہ ثقہ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت اس وقت تک قائم نہیں ہو گی جب تک فتنے ظاہر نہیں ہو جائیں گے ، جھوٹ ظاہر نہیں ہو جائے گا ، بازار سمٹ جائیں گے ، زمانہ سمٹ جائے گا اور ہرج بکثر ہو گا ۔ راوی کہتے ہیں : میں نے دریافت کیا : ہرج سے مراد کیا ہے ؟ آپ نے ارشاد فرمایا : قتل و غارت گری ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت ” صحیح “ میں مذکور ہے ، تاہم اس میں یہ الفاظ نہیں ہیں : ” جھوٹ بکثرت ہو جائے گا اور بازار سمٹ جائیں گے ۔ “
یہ روایت امام أحمد نے نقل کی ہے ، اور اس کے رجال صحیح کے رجال ہیں ، صرف سعید بن سمعان کا معاملہ مختلف ہے ، اور وہ ثقہ ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک فحاشی اور رشتے داری کے حقوق کو پامال کرنا عام نہیں ہو جائے گا ، برا ہمسایہ ہو گا ، امین شخص کو خائن قرار دیا جائے گا ، عرض کی گئی : یا رسول اللہ ! اس وقت مومن کا عالم کیا ہو گا ۔ نبی اکرم صلی اللہ علیہ وسلم نے ارشاد فرمایا : شہد کی مکھی کی مانند ہو گا کہ اگر وہ ( کھانے کی چیز میں ) گر جائے ، تو اسے خراب نہیں کرتی اور اگر کھا لی جائے تو توڑی نہیں جاتی ہے ۔ وہ پاکیزہ چیز باہر نکالتی ہے ، اور ( مومن کی مثال ) سونے کے ٹکڑے کی مانند ہو گی ، جو آگ میں داخل ہو جائے ، تو جب اسے نکالا جائے ، تو اس کی عمدگی میں اضافہ ہو چکا ہوتا ہے ۔ “
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن مغراء ہے ، جسے ابوزرعہ اور ایک جماعت نے ثقہ قرار دیا ہے ، علی بن مدینی نے اسے ضعیف کہا: ہے ۔ اس روایت کے بقیہ رجال صحیح کے رجال ہیں ۔

ان کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک لوگ راستوں میں اس طرح ( کھلے عام ) صحبت نہیں کریں گے ، جس طرح گدھے جنسی عمل کرتے ہیں ۔ “
یہ روایت امام بزار نے اور امام طبرانی نے نقل کی ہے ، اور امام بزار کے رجال صحیح کے رجال ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کی نشانیوں میں فحاشی ، فحش کلامی ، رشتے داری کے حقوق کو پامال کرنا اور خائن شخص کو امین بنانا شامل ہے ۔ “ راوی کہتے ہیں : میرا خیال ہے روایت میں یہ الفاظ بھی ہیں : ” امین شخص کو خائن قرار دینا “ یا اس کی مانند کوئی اور کلمہ ہے ۔
یہ روایت امام بزار نے نقل کی ہے ۔ اس کی سند میں ایک راوی شبیب بن بشر ہے ، اور وہ کمزور ہے ۔ ابن حبان نے اسے ثقہ قرار دیا ہے ، وہ کہتے ہیں : یہ غلطی کر جاتا ہے ۔ اس روایت کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک ہر قبیلے کا سردار اس کا منافق شخص نہیں بن جائے گا ۔ “
یہ روایت امام بزار نے نقل کی ہے ، اور امام طبرانی نے نقل کی ہے ۔ اس میں پورا واقعہ ہے ۔ اس کی سند میں ایک راوی حسین بن قیس ہے ، اور وہ متروک ہے ۔

سیدنا ابوبکرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک ہر قبیلے کا سردار اس قبیلے کا منافق شخص نہیں ہو گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مبارک بن فضالہ ہے ، جسے ایک جماعت نے ثقہ قرار دیا ہے ، اور وہ مدلس ہے ، اور ایک راوی حبیب بن فروخ ہے ، جس سے میں واقف نہیں ہوں ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں صبح کی نماز پڑھائی ، جب آپ نے نماز ادا کر لی تو ایک شخص نے آپ کو بلند آواز میں پکار کر کہا: کہ قیامت کب آئے گی ؟ نبی اکرم صلی اللہ علیہ وسلم نے اسے ڈانٹا اور جھڑکا اور فرمایا : تم خاموش رہو ، پھر جب سفیدی پھیل گئی ، تو آپ نے نگاہ اٹھا کے آسمان کی طرف دیکھا اور فرمایا : برکت والی ہے وہ ذات ، جس نے اسے بلند کیا ہے ، جو اس کی تدبیر کرتی ہے ، پھر آپ نے نگاہ زمین کی طرف کی اور ارشاد فرمایا : برکت والی ہے ، وہ ذات جس نے اسے بچھایا ہے ، اور جس نے اسے پیدا کیا ہے ، پھر آپ نے ارشاد فرمایا : قیامت کے بارے میں سوال کرنے والا شخص کہاں ہے ؟ وہ شخص گھٹنوں کے بل جھک گیا اور عرض کی : یا رسول اللہ ! میں ہوں ، میں نے آپ سے سوال کیا تھا ، نبی اکرم صلی اللہ علیہ وسلم نے ارشاد فرمایا : یہ اس وقت ہو گا ، جب حکمرانوں کو رسوا کیا جائے گا ، نجوم کی تصدیق کی جائے گی ، تقدیر کو جھٹلایا جائے گا ، یہاں تک کہ امانت کو مال غنیمت سمجھ لیا جائے گا ، اور صدقہ کو جرمانہ سمجھا جائے گا ، فحاشی زیادہ ہو جائے گی ، اس وقت تمہاری قوم ہلاکت کا شکار ہو جائے گی ۔ “
یہ روایت امام بزار نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا عبداللہ بن مسعود رضی اللہ عنہ فرماتے ہیں : ” اے لوگو ! تم پر ( حاکم وقت کی ) اطاعت کرنا اور جماعت کے ساتھ رہنا لازم ہے کیونکہ یہ اللہ کی وہ رسی ہے ، جس کے بارے میں اُس نے یہ حکم دیا ہے ، تم لوگ جماعت میں جس چیز کو ناگوار سمجھتے ہو ، وہ اس سے بہتر ہے ، جسے تم علیحدگی میں پسند کرتے ہو ، کیونکہ اللہ تعالیٰ نے جو بھی چیز پیدا کی ہے ۔ اس کے لئے اس نے کوئی آخری حد مقرر کی ہے ، جس پر وہ ختم ہو جاتی ہے ، اسلام جب آیا تو اس کو ثبات حاصل تھا ، اور یہ عنقریب اپنی آخری حد تک پہنچ جائے گا ، یہ قیامت تک کم اور زیادہ ہوتا رہے گا ، اس کی نشانی یہ ہے کہ فاقہ کثرت کے ساتھ ہو گا اور رزق منقطع ہو جائے گا ، یہاں تک کہ فقیر شخص کوئی ایسا شخص نہیں پائے گا ، جو اس کو کچھ دے سکے ، یہاں تک کہ خوشحال شخص یہ سمجھے گا ، جو کچھ اس کے پاس ہے ۔ وہ اس کے لئے کفایت نہیں کرے گا ، یہاں تک کہ کوئی شخص اپنے بھائی یا اپنے چچا زاد کے سامنے اپنی فاقہ کشی کی شکایت کرے گا ، تو وہ اسے کچھ نہیں دے گا ، یہاں تک کہ ایک سائل پورا ہفتہ گھومتا رہے گا ، لیکن اس کے ہاتھ میں کچھ نہیں رکھا جائے گا ، جب اس طرح کی صورت حال ہو جائے گی تو زمین اپنے جگر کے ٹکڑے اگل دے گی ۔ عرض کی گئی : اے ابوعبدالرحمن زمین کے جگر کے ٹکڑوں سے مراد کیا ہے ؟ تو انہوں نے فرمایا : سونے اور چاندی کے ٹکڑے اور اس وقت سے لے کر قیامت تک سونا یا چاندی سے آدمی نفع نہیں لے سکے گا ۔ “
یہ روایت امام طبرانی نے مختلف اسانید کے ساتھ نقل کی ہے ۔ اس کی سند میں ایک راوی مجالد ہے ، جس کی توثیق کی گئی ہے ، اس میں اختلاف پایا جاتا ہے ۔ اس کے ایک طریق کے بقیہ رجال ثقہ ہیں ۔

سیدنا واثلہ بن اسقع رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت اس وقت تک قائم نہیں ہو گی جب تک دس نشانیاں نہیں آ جائیں گی ، مشرق میں زمین میں دھنسایا جانا ، مغرب میں زمین میں دھنسایا جانا ، جزیرہ نما عرب میں زمین میں دھنسایا جانا دجال ( کا خروج ) سیدنا عیسیٰ بن مریم علیہ السلام کا نازل ہونا ، یاجوج ماجوج کا آنا ، دابۃ الارض کا نکلنا ، سورج کا مغرب کی طرف سے طلوع ہونا اور ایک آگ جو عدن کے گڑھے سے نکلے گی ، لوگوں کو ہانک کر محشر کی طرف لے جائے گی ، وہ چھوٹی چیونٹیوں اور بڑی چیونٹیوں کو بھی اکٹھا کرے گی ۔ “
یہ روایت امام طبرانی نے نقل کی ہے ۔ اس کی سند میں ایک راوی عمران بن ہارون ہے ، اور وہ ضعیف ہے ۔

طارق بن شہاب بیان کرتے ہیں : ہم لوگ سیدنا عبداللہ بن مسعود رضی اللہ عنہ کے پاس بیٹھے ہوئے تھے ، ایک شخص آیا ، اس نے کہا: نماز کھڑی ہو چکی ہے ۔ وہ کھڑے ہوئے ، ان کے ساتھ ہم بھی اٹھ گئے ، جب ہم مسجد میں داخل ہوئے تو ہم نے مسجد کے آگے والے حصے میں لوگوں کو رکوع کی حالت میں پایا ، سیدنا عبداللہ بن مسعود رضی اللہ عنہ نے تکبیر کہی اور رکوع میں چلے گئے ، ہم نے بھی رکوع کر لیا ، پھر ہم چلتے ہوئے گئے ، ہم نے اس طرح کیا ، جس طرح انہوں نے کیا تھا ، اسی دوران ایک شخص تیزی سے گزرا اور بولا: اے ابوعبدالرحمن السلام علیکم ! سیدنا عبداللہ بن مسعود رضی اللہ عنہ نے فرمایا : اللہ اور اس کے رسول نے سچ فرمایا ہے ، اور اللہ کے رسولوں نے رسالت کی تبلیغ کر دی ہے ، جب ہم نے نماز ادا کر لی اور ہم واپس آ گئے ، تو وہ اپنے گھر واپس چلے گئے ، ہم باہر بیٹھ گئے ، ہم میں سے کسی نے کہا: کیا تم نے سنا نہیں کہ انہوں نے اس شخص کو جواب میں یہ کہا: تھا کہ اللہ اور اس کے رسول نے سچ فرمایا ہے ، اللہ کے رسولوں نے تبلیغ کر دی ہے ، تو تم میں سے کون ان سے اس بارے میں دریافت کرے گا ، تو طارق بن شہاب نے کہا: میں ان سے پوچھوں گا ، جب وہ باہر تشریف لائے ، تو طارق نے ان سے اس بارے میں دریافت کیا ، تو انہوں نے نبی اکرم صلی اللہ علیہ وسلم کے حوالے سے یہ بات ذکر کی ( نبی اکرم صلی اللہ علیہ وسلم نے ارشاد فرمایا ہے : ) ” قیامت سے پہلے مخصوص لوگوں کو سلام کیا جائے گا ، اور تجارت پھیل جائے گی ، تجارت کے بارے میں عورت اپنے شوہر کی مدد کرے گی ، رشتے داری کے حقوق کو پامال کیا جائے گا ، جھوٹی گواہی دی جائے گی ، سچی گواہی کو چھپایا جائے گا اور علم کا ظہور ہو گا ۔ “

ایک روایت میں یہ الفاظ ہیں : نبی اکرم صلی اللہ علیہ وسلم نے ارشاد فرمایا : ” قیامت کی نشانیوں میں یہ بات شامل ہے کہ آدمی سلام کرے گا ، تو وہ صرف جان پہچان والے شخص کو سلام کرے گا ۔ “ یہ تمام روایات امام أحمد نے نقل کی ہیں ، امام بزار نے اس میں سے کچھ روایات نقل کی ہیں ، اور یہ الفاظ زائد نقل کے ہیں : ” ایک شخص مسجد سے گزر جائے گا لیکن وہ اس میں نماز ادا نہیں کرے گا ۔ “

یہ روایت امام طبرانی نے نقل کی ہے ، تاہم انہوں نے یہ الفاظ نقل کیے ہیں : راوی بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت اس وقت تک قائم نہیں ہو گی جب تک سلام صرف جان پہچان کے لوگوں کو نہیں کیا جائے گا ، اس شخص نے تمہارے درمیان میں سے صرف مجھے پہچانا تو مجھے سلام کر دیا ( نبی اکرم صلی اللہ علیہ وسلم نے یہ بھی ارشاد فرمایا ہے : ) مساجد کو راستہ بنا لیا جائے گا ، ان میں اللہ تعالیٰ کو سجدہ نہیں کیا جائے گا یہاں تک کہ ایک لڑکا ایک بوڑھے شخص کو دور دراز کے علاقے میں ڈاکیے کے طور پر بھیجے گا ، یہاں تک کہ تاجر دور دراز کے علاقوں تک پہنچے گا لیکن اسے منافع نہیں ملے گا ۔ “

ان کی نقل کردہ ایک روایت میں یہ الفاظ ہیں : ” عورتیں اور گھوڑے مہنگے ہو جائیں گے ، پھر یہ کم قیمت ہو جائیں گے ، پھر یہ قیامت تک مہنگے نہیں ہوں گے ، اور مرد و عورت سب تجارت کریں گے ۔ “ امام أحمد اور امام بزار کے رجال صحیح کے رجال ہیں ۔

سیدنا عداء بن خالد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت اس وقت تک قائم نہیں ہو گی ، جب تک آدمی صرف جان پہچان والے لوگوں کو سلام نہیں کرے گا ، اور جب تک مساجد کو راستے نہیں بنا لیا جائے گا ، یہاں تک کہ عورت اور اس کا شوہر تجارت کریں گے ، یہاں تک کہ خواتین اور گھوڑے سستے ہو جائیں گے ، اور پھر وہ قیامت کے دن تک مہنگے نہیں ہوں گے ۔ “
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آزمائش کی علامات اور قیامت کی نشانیوں میں یہ بات شامل ہے کہ عقلیں ماؤف ہو جائیں گی ، سمجھ داری کم ہو جائے گی ، بھلائی کی علامات اٹھا دی جائیں گی اور فتنے ظاہر ہوں گے ۔ “
یہ روایت امام طبرانی نے نقل کی ہے ۔ اس کی سند میں ایک راوی عافیہ بن ایوب ہے اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : ” تم اپنے دین میں جو چیز سب سے پہلے غیر موجود پاؤ گے وہ امانت ہے ، اور تمہارے دین میں سے آخر میں باقی رہ جانے والی چیز نماز ہے ، کچھ لوگ نماز ادا کریں گے ، جن کا کوئی دین نہیں ہو گا ، تم لوگوں کے درمیان میں سے قرآن کو الگ کر دیا جائے گا ، راوی کہتے ہیں : انہوں نے عرض کی : اے ابوعبدالرحمن ! کیا ہم قرآن پڑھتے نہیں ہیں ، کیا ہم نے اسے کتاب کی شکل میں محفوظ نہیں کر لیا ہے ، سیدنا عبداللہ بن مسعود رضی اللہ عنہ نے ارشاد فرمایا : قرآن پر ایک رات ایسی آئے گی جب یہ لوگوں کے سینوں سے رخصت ہو جائے گا اور پھر روئے زمین پر اس میں سے کچھ بھی باقی نہیں رہے گا ۔ “
یہ روایت امام طبرانی نے نقل کی ہے ، اور اس کے رجال صحیح کے رجال ہیں ، صرف شداد بن معقل کا معاملہ مختلف ہے اور وہ ثقہ ہے ۔

قاسم بیان کرتے ہیں : سیدنا عبداللہ بن مسعود رضی اللہ عنہ کے سامنے دریائے فرات کی شکایت کی گئی ، ہم نے کہا: ہمیں یہ اندیشہ ہے کہ وہ ہم پر سیلاب لے آئے گا ۔ اگر آپ اس کی طرف کسی ایسے شخص کو بھیجیں جو اس پر بن باندھ دے تو یہ مناسب ہو گا ۔ انہوں نے فرمایا : میں اس کے پانی کو ضائع نہیں کروں گا ۔ اللہ کی قسم ! لوگوں پر ایسا زمانہ آئے گا کہ اگر تم اس زمانے میں ایک طشت پانی کا تلاش کرو گے ، تو وہ بھی نہیں ملے گا ، ہر پانی اپنے عنصر کی طرف لوٹ جائے گا ، اور وہاں پر پانی ہو گا ، اور ( اس وقت ) مسلمان شام میں ہوں گے ۔ “
یہ روایت امام طبرانی نے نقل کی ہے ، اور اس کے رجال صحیح کے رجال ہیں ، صرف یہ ہے کہ قاسم نے سیدنا عبداللہ بن مسعود رضی اللہ عنہ کا زمانہ نہیں پایا ہے ۔

عروہ بن محمد سعدی اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں : ” تین چیزیں جب تم دیکھو گے ، تو اس وقت ( قیامت قریب ہو گی ) آباد چیز کو برباد کیا جانا ، برباد چیز کو آباد کیا جانا اور جنگ نوکری ہو گی اور آدمی امانت کو یوں کھا جائے گا جس طرح اونٹ درخت سے ( پتے وغیرہ ) کھاتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی یحیی بن عبداللہ بابلتی ہے ، اور وہ ضعیف ہے ۔

سیدنا کعب بن عجرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک ایک مرد پچاس خواتین کے معاملات کا نگران نہیں ہو گا ۔ “
یہ روایت امام طبرانی نے نقل کی ہے ۔ اس کی سند میں ایک راوی محمد بن عیسیٰ رملی ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا عوف بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دجال سے پہلے کچھ سال ایسے آئیں گے جو قحط سالی کے ہوں گے ، ان میں بارش کثرت سے ہو گی ، لیکن پیداوار کم ہو گی ، اس دوران سچے شخص کو جھوٹا قرار دیا جائے گا ، اور جھوٹے کی اس وقت میں تصدیق کی جائے گی ، اس دوران خائن شخص کو امین بنایا جائے گا ، اور امین شخص کو خائن قرار دیا جائے گا ، اور اس دوران رویبضہ کلام کریں گے ۔ عرض کی گئی : یا رسول اللہ ! رویبضہ سے مراد کیا ہے ؟ نبی اکرم صلی اللہ علیہ وسلم نے فرمایا : وہ شخص جس کی کوئی پرواہ نہ کی جاتی ہو ۔ “
یہ روایت امام طبرانی نے مختلف اسانید کے ساتھ نقل کی ہے ، جن میں سب سے بہتر سند میں ایک راوی ابن اسحاق ہے ، اور وہ مدلس ہے ۔ اس روایت کے بقیہ رجال ثقہ ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی ( جب تک یہ صورت حال نہ ہو کہ ) لوگوں پر ایک سال بارش ہوتی رہے گی اور زمین کوئی بھی چیز پیدا نہیں کرے گی ۔ “
یہ روایت امام أحمد ، امام بزار اور امام ابویعلیٰ نے نقل کی ہے ۔ وہ بیان کرتے ہیں : سیدنا انس رضی اللہ عنہ نے یہ بات بیان کی ہے : ” ہم یہ بات چیت کیا کرتے تھے کہ قیامت اس وقت تک قائم نہیں ہو گی ( جب تک یہ صورت حال نہ ہو کہ ) آسمان سے بارش ہو گی لیکن زمین سے پیداوار نہیں ہو گی ، جب تک پچاس خواتین کا نگران ایک مرد نہیں ہو گا ، اور اس وقت تک قائم نہیں ہو گی جب تک کوئی عورت کسی مرد کے پاس سے گزرے گی وہ مرد اس عورت کو پکڑ کر اسے دیکھے گا ، اور یہ کہے گا : کبھی اس عورت کا بھی ایک مرد ہوتا تھا ۔ “ اس کے بعد راوی نے اس کو اسی طرح نقل کیا ہے حماد نے اسے ثابت کے حوالے سے سیدنا انس رضی اللہ عنہ کے حوالے سے نبی اکرم صلی اللہ علیہ وسلم سے نقل کیا ہے ، جس میں کوئی شک نہیں ہے ۔ انہوں نے یہ بات بھی بیان کی ہے کہ یہ ثابت کے حوالے سے سیدنا انس رضی اللہ عنہ کے حوالے سے نبی اکرم صلی اللہ علیہ وسلم سے منقول ہے ، جو میرے خیال کے مطابق ہے ۔ ان تمام روایات کے رجال ثقہ ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت اس وقت تک قائم نہیں ہو گی جب تک زمین میں اللہ اللہ کہا: جاتا رہے گا ، اور جب تک یہ عالم نہیں ہو گا کہ لوگوں پر بارش ہو گی لیکن زمین پیداوار نہیں دے گی ، یہاں تک کہ پچاس خواتین کا نگران ایک شخص ہو گا ، یہاں تک کہ ایک عورت جوتا پہن کر گزرے گی اور یہ کہے گی کہ اس عورت کا بھی ایک مرد ہوتا تھا ۔ “ ( علامہ ہیثمی فرماتے ہیں : ) میں یہ کہتا ہوں ” صحیح “ میں اس کا کچھ حصہ مذکور ہے ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا عبدالرحمن انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت قریب ہونے کی نشانیوں میں بارش کا بکثرت ہونا اور پیداوار کا کم ہونا ، قاریوں کا زیادہ ہونا ، فقہاء کا کم ہونا ، امراء کا زیادہ ہونا اور امین لوگوں کا کم ہونا شامل ہیں ۔ “
یہ روایت امام طبرانی نے نقل کی ہے ۔ اس کی سند میں ایک راوی عبدالغفار بن قاسم ہے ، اور وہ حدیث ایجاد کرنے والا شخص ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک آسمان سے اتنی بارش نازل نہیں ہو گی کہ مٹی کا کوئی بھی گھر اس کے لئے رکاوٹ نہیں بن سکے گا ، اس سے بچاؤ کے لئے صرف بالوں سے بنے ہوئے گھر رکاوٹ بن سکیں گے ۔ “
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

ان کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک عرب کی سرزمین پر سبزہ اور نہریں نہیں ہو جائیں گے ، یہاں تک کہ ایک سوار شخص عراق اور مکہ کے درمیان چلے گا ، تو اسے صرف راستے سے گمراہ کرنے والے لوگوں کا اندیشہ ہو گا ، اور یہاں تک کہ ہرج کثرت سے ہو گا ، لوگوں نے عرض کی : یا رسول اللہ ! ہرج سے مراد کیا ہے ؟ آپ نے ارشاد فرمایا : قتل و غارت گری ۔ “
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

ان کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک زمانہ سمٹ نہیں جائے گا یہاں تک کہ ایک سال ایک مہینے کی مانند ہو گا ، ایک مہینہ ایک ہفتے کی مانند ہو گا اور ایک ہفتہ ایک دن کی مانند ہو گا ، اور ایک دن یوں ہو گا جیسے پتہ جلتا ہے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

ان کے حوالے سے نبی اکرم صلی اللہ علیہ وسلم کا یہ فرمان منقول ہے : ” اس ذات کی قسم ! جس کے دست قدرت میں میری جان ہے ، یہ امت اس وقت تک فنا نہیں ہو گی جب تک کوئی شخص اٹھ کر کسی عورت کی طرف نہیں جائے گا ، اور راستے میں ہی اسے لٹا لے گا ، تو اس وقت ان میں سے بہتر شخص وہ ہو گا ، جو یہ کہے گا : اگر تم اسے اس دیوار کے پیچھے لے جاتے تو یہ مناسب تھا ۔ “
یہ روایت امام ابویعلیٰ نے نقل کی ہے ، اور اس کے رجال صحیح کے رجال ہیں ۔

سیدنا عبدالرحمن بن شبل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دن اور رات اس وقت تک ختم نہیں ہوں گے جب تک کچرے میں کوئی جوتا نہیں پایا جائے گا ، اور یہ کہا: جائے گا کہ یہ تو کسی قریشی شخص کا جوتا لگتا ہے ۔ “
یہ روایت امام طبرانی نے نقل کی ہے ۔ اس کی سند میں ایسے راوی ہیں جن کا نام بیان نہیں کیا گیا ہے ، اور جنہیں جمہور نے ضعیف قرار دیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک بہت سے معادن ظاہر نہیں ہوں گے ، اور ان میں صرف کمینے ترین لوگ ہی سکونت اختیار کریں گے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب میری اُمت چھ چیزوں کو حلال قرار دیدے گی تو ان پر بربادی آ جائے گی ، جب ان کے درمیان ایک دوسرے پر لعنت کرنا عام ہو جائے گا ، وہ لوگ شراب پئیں گے ، وہ ریشم پہنیں گے ، وہ گانے والی عورتیں رکھیں گے ، مرد ، مردوں پر اکتفاء کریں گے اور خواتین ، خواتین پر اکتفاء کریں گی ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عباد بن کثیر رملی ہے ، جسے یحیی بن معین اور دیگر حضرات نے ثقہ قرار دیا ہے ، اور ایک جماعت نے اسے ضعیف کہا: ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لوگوں پر ایسا زمانہ آئے گا ، جب کوئی مضبوط اونٹ اور دو مشکیزے آدمی کے نزدیک ہر اس چیز سے زیادہ محبوب ہوں گے جس کا وہ مالک ہوتا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن عیاش ہے ، جس میں ضعیف ہونا پایا جاتا ہے ، جو ان روایات کے حوالے سے ہے ، جو اس نے اہل شام کے علاوہ سے نقل کی ہیں ، اور انہوں نے
یہ روایت اسماعیل بن ابوخالد سے نقل کی ہے ، اور وہ کوفی ہے ۔ اس روایت کے بقیہ رجال ثقہ ہیں ۔ ( علامہ ہیثمی فرماتے ہیں : ) میں یہ کہتا ہوں آگے چل کر دجال کے بعد زمین میں دھنسائے جانے مسخ کیے جانے ، دابۃ الارض کے نکلنے اور جن لوگوں پر قیامت قائم ہو گی ان کے بارے میں اور دیگر امور کے بارے میں مختلف ابواب آئیں گے ۔