مجمع الزوائد ومنبع الفوائد

سیدنا سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب اللہ تعالیٰ تمہارے سامنے عجمیوں کو بھر دے گا اور پھر وہ لوگ شیر دل ہوں گے ، وہ فرار اختیار نہیں کریں گے ، وہ تمہارے جنگجو لوگوں کو قتل کر دیں گے اور وہ تمہارا مال غنیمت کھا جائیں گے ۔ “
یہ روایت امام أحمد ، امام بزار اور امام طبرانی نے نقل کی ہے ، امام أحمد کے رجال صحیح کے رجال ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب اللہ تعالیٰ تمہارے سامنے عجمیوں کو بھر دے گا ، پھر وہ انہیں شیر بنا دے گا ، وہ فرار اختیار نہیں کریں گے ، وہ تمہارے جنگو لوگوں کو مار دیں گے اور تمہارا مال غنیمت کھا جائیں گے ۔ “
یہ روایت امام بزار نے نقل کی ہے ، اس کی سند میں ایک راوی خالد بن یزید بن مسلم ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب اللہ تعالیٰ تمہارے سامنے عجمیوں کو بھر دے گا ، پھر وہ انہیں شیر بنا دے گا ، وہ فرار اختیار نہیں کریں گے ، وہ تمہارے جنگجو لوگوں کو قتل کریں گے اور وہ تمہارا مال غنیمت کھا جائیں گے ۔ “
یہ روایت امام بزار نے امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبداللہ بن عبدالقدوس ہے ، جسے ابن حبان نے ثقہ قرار دیا ہے اور ایک جماعت نے اسے ضعیف کہا: ہے اور ایک راوی یونس بن خباب ہے اور وہ انتہائی ضعیف ہے ۔

سیدنا حذیفہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب اللہ تعالیٰ تمہارے سامنے عجمیوں کو بھر دے گا اور وہ انہیں شیر بنا دے گا ، جو راہ فرار اختیار نہیں کریں گے ، وہ تمہاری گردنیں ماریں گے اور وہ تمہارا مال غنیمت کھا جائیں گے ۔ “
یہ روایت امام بزار نے نقل کی ہے ، اس کی سند میں ایک راوی یزید بن سنان ابوفروہ رہاوی ہے اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب تمہارے درمیان عجمی کثرت سے ہوں گے ، جو شیر ہوں گے ، وہ راہ فرار اختیار نہیں کریں گے ، وہ تمہارے جنگجو لوگوں کو مار دیں گے اور وہ تمہارا مال غنیمت کھا جائیں گے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

حسن بصری بیان کرتے ہیں : مجھ تک
یہ روایت پہنچی ہے : نبی اکرم صلی اللہ علیہ وسلم نے ارشاد فرمایا ہے : ” قیامت اس وقت تک قائم نہیں ہو گی ، جب تک تم ایک ایسی قوم کے ساتھ جنگ نہیں کرو گے ، جو بالوں سے بنے ہوئے جوتے پہنتے ہوں گے ، یہاں تک کہ تم ایسی قوم کے ساتھ جنگ کرو گے ، جن کے چہرے چوڑے ہوں گے ، ان کے ناک چپٹے ہوں گے ، ان کی آنکھیں چھوٹی ہوں گی ، اُن کے چہرے تہہ والی ڈھالوں کی مانند ہوں گے ۔ “
یہ روایت امام أحمد نے ” مرسل “ روایت کے طور پر نقل کی ہے اور اس کے رجال صحیح کے رجال ہیں ۔

سیدنا بریدہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس بیٹھا ہوا تھا ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” میری امت کو ایک قوم ہانک کر لے جائے گی ، جن کے چہرے چوڑے ہوں گے ، ان کی آنکھیں چھوٹی ہوں گی ، ان کے چہرے ڈھال کی مانند ہوں گے ، یہ بات آپ نے تین مرتبہ ارشاد فرمائی اور فرمایا : یہاں تک کہ تم ان لوگوں کو جزیرہ عرب سے ملا دو گے ، جہاں تک پہلے والوں کا تعلق ہے ، تو ان میں سے جو بھاگے گا وہ نجات پا جائے گا اور جہاں تک دوسروں کا تعلق ہے ، تو ان میں سے بعض نجات پا جائیں گے اور بعض ہلاکت کا شکار ہو جائیں گے اور جہاں تک تیسروں کا تعلق ہے ، تو ان میں سے جو باقی بچے گا ، وہ سب ختم کر دیے جائیں گے ، لوگوں نے عرض کی : یا رسول اللہ ! وہ کون ہوں گے ؟ آپ نے فرمایا : وہ ترک ہوں گے ، اس ذات کی قسم ! جس کے دست قدرت میں میری جان ہے ، وہ اپنے گھوڑے مسلمانوں کی مساجد کے ستونوں کے ساتھ ضرور باندھیں گے ۔ راوی بیان کرتے ہیں : اس کے بعد سیدنا بریدہ رضی اللہ عنہ ہمیشہ اپنے ساتھ دو یا تین اونٹ رکھتے تھے اور سفر کا ساز و سامان مشکیزے رکھتے تھے ، وہ اس کو اس لئے تیار رکھتے تھے تاکہ بھاگنے کا وقت آئے تو بھاگ سکیں ، کیونکہ انہوں نے نبی اکرم صلی اللہ علیہ وسلم کی زبانی ترک حکمرانوں کی طرف سے آزمائش کے بارے میں بات سنی ہوئی تھی ۔ ( علامہ ہیثمی فرماتے ہیں ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔

معاویہ بن حدیج بیان کرتے ہیں : میں سیدنا معاویہ بن ابوسفیان رضی اللہ عنہ کے پاس موجود تھا ، جب ان کے پاس ان کے ایک گورنر کا خط آیا ، جس میں اس نے یہ بتایا تھا کہ اس نے ترکوں پر حملہ کر کے انہیں پسپا کر دیا ہے اور ان کے بہت سے لوگوں کو قتل کر دیا ہے اور ان سے بہت سا مال غنیمت حاصل کیا ہے ، تو سیدنا معاویہ رضی اللہ عنہ اس بات پر غصے میں آ گئے ، پھر انہوں نے حکم دیا کہ اس گورنر کو یہ خط لکھا جائے کہ تم نے جو کچھ بیان کیا ہے وہ مجھے پتہ چل گیا ہے کہ تم نے اتنا قتل کیا ہے اور اتنا مال غنیمت حاصل کیا ہے ، لیکن اب مجھے یہ پتہ نہ چلے کہ تم نے دوبارہ یہ کام کیا ہے ، تم نے ان کے ساتھ اس وقت تک جنگ نہیں کرنی ، جب تک تمہارے پاس میرا حکم نہیں آتا ، راوی کہتے ہیں : میں نے ان سے دریافت کیا : اے امیرالمؤمنین ! اس کی وجہ کیا ہے ؟ تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ترک ، عربوں پر ضرور غالب آ جائیں گے ، یہاں تک کہ وہ انہیں شیح اور قیصوم ( نامی بوٹیوں ) کے اُگنے کی جگہ تک پہنچا دیں گے ۔ “ ( سیدنا معاویہ رضی اللہ عنہ نے فرمایا : ) اس لئے میں اُن لوگوں کے ساتھ جنگ کرنے کو ناپسند کرتا ہوں ۔
یہ روایت امام ابویعلیٰ نے نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ترکوں کو ( اُن کے حال پر چھوڑے رکھو ) جب تک وہ تمہیں چھوڑے رکھتے ہیں ، کیونکہ جو قوم سب سے پہلے میری امت کی بادشاہی کو سلب کرے گی اور جنہیں اللہ تعالیٰ مختلف قسم کی نعمتیں عطا کرے گا ، وہ بنو قنطوراء ہیں ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عثمان بن یحیی قرقسانی ہے اور میں اس سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا عبداللہ بن سائب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عرب اپنے آباؤ اجداد کے پیدائش کے مقام تک پہنچ جائیں گے ، جہاں شیح اور قیصوم نامی بوٹیاں اُگتی ہیں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عدی بن فضل تیمی ہے اور وہ متروک ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ ایسی قوم کے ساتھ جنگ کرو گے ، جن کے چہرے چوڑے ہوں گے ، آنکھیں چھوٹی ہوں گی ، ان کے چہرے تہہ والی ڈھالوں کی مانند ہوں گے اور ان کی آنکھیں ٹڈی دل کی طرح ہوں گی ، وہ بالوں سے بنے ہوئے جوتے پہنتے ہوں گے اور وہ چمڑے کی ڈھالیں رکھیں گے ، اور وہ اپنے گھوڑوں کو کھجور کے درختوں کے ساتھ باندھیں گے ۔ “ ( علامہ ہیثمی فرماتے ہیں ) میں یہ کہتا ہوں : ” صحیح “ میں اس کا کچھ حصہ مذکور ہے ۔
یہ روایت امام بزار نے نقل کی ہے ، اس کی سند میں ایک راوی حبان بن علی ہے اور وہ ضعیف ہے ، ایک روایت کے مطابق یحیی بن معین نے اس کو ثقہ قرار دیا ہے ۔

ابن سیرین بیان کرتے ہیں : سیدنا عبداللہ بن مسعود رضی اللہ عنہ یہ فرماتے تھے : یوں ہے ، جیسے ترک تمہارے پاس خچروں پر سوار ہو کر آئیں گے ، جن کے کان کٹے ہوئے ہوں گے ، یہاں تک کہ دریائے فرات کے کنارے پر وہ انہیں باندھ دیں گے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، اگر ابن سیرین نے سیدنا عبداللہ بن مسعود رضی اللہ عنہ سے سماع کیا ہو ۔

یزید بن معاویہ عامری بیان کرتے ہیں : انہوں نے سیدنا عبداللہ بن مسعود رضی اللہ عنہ کو یہ بیان کرتے ہوئے سنا ہے : ” اس وقت تمہارا کیا عالم ہو گا ؟ جب تم ایسی قوم کو دیکھو گے ( راوی کو شک ہے ، شاید یہ الفاظ ہیں : ) تمہارے پاس ایسی قوم آئے گی ، جن کے چہرے لتھڑے ہوئے ہوں گے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

ابواسود دیلی بیان کرتے ہیں : میں نے اور زرعہ بن ضمرہ نے اشعری کے ہمراہ اسلام قبول کیا ، ہماری ملاقات سیدنا عبداللہ بن عمرو رضی اللہ عنہ سے ہوئی ، راوی کہتے ہیں : میں ان کے دائیں طرف بیٹھ گیا اور زرعہ ان کی بائیں طرف بیٹھ گئے ، سیدنا عبداللہ بن عمرو رضی اللہ عنہ نے فرمایا : ” عنقریب عرب کی سرزمین پر عجمیوں میں سے کوئی شخص باقی نہیں رہے گا ، صرف کوئی مقتول ہو گا یا کوئی قیدی ہو گا ، جس کے خون کا فیصلہ دیا جانا ہو گا“ تو زرعہ بن ضمرہ نے ان سے کہا: کیا مشرکین اہل اسلام پر غالب آ جائیں گے ؟ انہوں نے دریافت کیا : تمہارا تعلق کس سے ہے ؟ اس نے بتایا : بنو عامر بن صعصہ سے ، جنہوں نے ذی خلصہ بنایا تھا ، اس گھر یا تعمیر کو زمانہ جاہلیت میں یہ نام دیا گیا تھا ۔ راوی بیان کرتے ہیں : میں نے سیدنا عمر بن خطاب رضی اللہ عنہ کے سامنے سیدنا عبداللہ بن عمرو رضی اللہ عنہ کا قول نقل کیا ، تو سیدنا عمر رضی اللہ عنہ نے تین مرتبہ فرمایا : عبداللہ بن عمرو جو کہتا ہے وہ اس کے بارے میں زیادہ بہتر جانتا ہو گا ، راوی بیان کرتے ہیں : پھر جمعہ کے دن انہوں نے خطبہ دیتے ہوئے ارشاد فرمایا : نبی اکرم صلی اللہ علیہ وسلم یہ ارشاد فرماتے تھے : ” میری امت کا ایک گروہ مسلسل حق پر گامزن رہے گا ، اُن کی مدد کی جاتی رہے گی ، یہاں تک کہ اللہ کا حکم آ جائے گا ۔ “ راوی بیان کرتے ہیں : ہم نے سیدنا عبداللہ بن عمرو رضی اللہ عنہ کے سامنے سیدنا عمر بن خطاب رضی اللہ عنہ کا قول ذکر کیا ، تو انہوں نے فرمایا : اللہ کے نبی صلی اللہ علیہ وسلم نے سچ فرمایا ہے ، جب یہ صورت حال ہو جائے گی تو پھر وہی ہو گا ، جو میں نے بیان کیا ہے ۔
یہ روایت امام ابویعلیٰ کی نے اپنے استاد ابوسعید کے حوالے سے نقل کی ہے ، اگر تو یہ بنو ہاشم سے نسبت ولاء رکھتا ہے ، تو پھر اس روایت کے رجال صحیح کے رجال ہیں ۔