مجمع الزوائد ومنبع الفوائد

سیدنا کرز بن علقمہ خزاعی رضی اللہ عنہ بیان کرتے ہیں : ایک شخص نے عرض کی : یا رسول اللہ ! کیا اسلام کی کوئی آخری حد ہے ؟ نبی اکرم صلی اللہ علیہ وسلم نے ارشاد فرمایا : جی ہاں ! جب عربوں یا عجمیوں سے تعلق رکھنے والے کسی گھرانے کے افراد کے بارے میں اللہ تعالیٰ بھلائی کا ارادہ کرے گا ، تو ان پر اسلام کو داخل کر دے گا ، پھر فتنے واقع ہوں گے ، یوں جیسے بادل ہوتے ہیں ، اس شخص نے عرض کی : اللہ کی قسم ! کیا ایسا ہی ہو گا ؟ آپ نے ارشاد فرمایا : ” جی ہاں ! اس ذات کی قسم ! جس کے دست قدرت میں میری جان ہے ، پھر تم ان میں دوبارہ سیاہ رنگ کے سانپوں کی طرح ہو جاؤ گے ، اور ایک دوسرے کی گردنیں اڑانے لگو گے ۔ “ سفیان کہتے ہیں : سیاہ رنگ کے سانپ کے کھڑے ہونے سے مراد ، اس کا بلند ہونا ہے ۔

ایک روایت میں یہ الفاظ ہیں : ” لوگوں میں سب سے زیادہ فضیلت والا وہ مومن ہو گا ، جو کسی گھاٹی میں الگ تھلگ رہے گا ، اپنے پروردگار سے ڈرتا رہے گا ، اور لوگوں کو اپنے شر سے محفوظ رکھے گا ۔ “
یہ روایت امام أحمد ، امام بزار اور امام طبرانی نے مختلف اسانید کے ساتھ نقل کی ہے ، جن میں سے ایک کے رجال صحیح کے رجال ہیں ۔

سیدنا ابوبرزہ اسلمی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے تم لوگوں کے بارے میں گمراہ کرنے والی خواہشات کا اندیشہ ہے ، جن کا تعلق تمہارے پیٹ ، تمہاری شرمگاہوں سے ہو گا اور گمراہ کرنے والے فتنوں کا اندیشہ ہے ۔ “

ایک روایت میں یہ الفاظ ہیں : ” گمراہ کرنے والی نفسانی خواہشات ۔ ۔ ۔ ۔ ۔ ۔ ۔ “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا واثلہ بن اسقع رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے ، آپ صلی اللہ علیہ وسلم نے ارشاد فرمایا : ” تم لوگ یہ سمجھتے ہو کہ میں تم سب کے بعد انتقال کروں گا ؟ خبردار ! میں تم سب سے پہلے انتقال کر جاؤں گا ، اور تم لوگ میرے بعد مختلف گروہوں کی شکل میں ہو جاؤ گے ، اور ایک دوسرے کو ہلاک کرو گے ۔ “
یہ روایت امام أحمد ، امام ابویعلیٰ اور امام طبرانی نے نقل کی ہے ، امام أحمد کے رجال صحیح کے رجال ہیں ۔

سیدنا سلمہ بن نفیل سکونی رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس بیٹھے ہوئے تھے ، اسی دوران کسی شخص نے عرض کی : یا رسول اللہ ! کیا آسمان سے کھانا آیا ؟ نبی اکرم صلی اللہ علیہ وسلم نے جواب دیا : جی ہاں ! اس نے عرض کی : کس چیز میں ؟ آپ نے ارشاد فرمایا : ہنڈیا میں ، اُس نے دریافت کیا : کیا اس میں آپ سے بچ کے بھی کچھ ہوا ؟ نبی اکرم صلی اللہ علیہ وسلم نے ارشاد فرمایا : جی ہاں ! اس نے دریافت کیا : اس کے ساتھ کیا ہوا ؟ نبی اکرم صلی اللہ علیہ وسلم نے فرمایا : اسے اٹھا لیا گیا اور پھر میری طرف یہ بات وحی کی گئی کہ میں انتقال کر جاؤں گا ، تمہارے درمیان نہیں رہوں گا اور تم بھی میرے بعد تھوڑا عرصہ رہو گے ، یہاں تک کہ تم لوگ کہو گے : کتنا عرصہ ہوا ہے ؟ پھر تم میرے پاس مختلف گروہوں کی شکل میں آؤ گے کہ تم نے ایک دوسرے کو ہلاک کیا ہو گا اور قیامت سے پہلے دو شدید قسم کی موتیں ہوں گی اور اس کے بعد کئی سال زلزلے آتے رہیں گے ۔ “
یہ روایت امام أحمد نے ، امام طبرانی نے ، امام بزار نے اور امام ابویعلیٰ نے نقل کی ہے اور اس کے رجال ثقہ ہیں ۔

سیدنا معاویہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ یہ سمجھتے ہو کہ میرا انتقال تم سب کے بعد ہو گا ، حالانکہ میں تم سب سے پہلے وفات پا جاؤں گا اور تم میرے بعد مختلف گروہوں میں تقسیم ہو گے ، اور ایک دوسرے کی گردنیں اڑاؤ گے ۔ “
یہ روایت امام ابویعلیٰ ، امام طبرانی نے معجم کبیر میں نقل کی ہے ، اس میں ان کے الفاظ یہ ہیں : سیدنا معایہ بن ابوسفیان رضی اللہ عنہ بیان کرتے ہیں : ایک مرتبہ ہم مسجد میں بیٹھے ہوئے تھے ، اسی دوران نبی اکرم صلی اللہ علیہ وسلم ہمارے درمیان تشریف لائے ، آپ نے ارشاد فرمایا : تم لوگ یہ باتیں کر رہے ہو کہ میرا انتقال تم سب کے بعد ہو گا ؟ خبردار ! میں تم سب سے پہلے انتقال کر جاؤں گا اور تم میرے بعد گروہوں میں تقسیم ہو کے ایک دوسرے کو فنا کرو گے ، پھر آپ نے یہ آیت تلاوت کی : ” تم فرما دو ! وہ اس بات پر قادر ہے کہ وہ تمہارے اوپر سے ، یا تمہارے پاؤں کے نیچے سے ، تم پر عذاب بھیج دے ۔ ۔ ۔ ۔ ۔ ۔ ۔ “ ۔ یہ آیت یہاں تک ہے : ” ہر خبر ( کے واقع ہونے ) کا متعین وقت ہے ، اور عنقریب تم لوگ جان لو گے ۔ “ پھر آپ صلی اللہ علیہ وسلم نے ارشاد فرمایا : میری اُمت کا ایک گروہ ہمیشہ حق پر جنگ کرتا رہے گا اور وہ غالب رہیں گے ، اور جو شخص ان کو رسوا کرنے کی کوشش کرے گا ، وہ انہیں رسوا نہیں کر سکے گا اور جو شخص ان کی مخالفت کرے گا ، وہ بھی انہیں کوئی نقصان نہیں پہنچا سکے گا ، یہاں تک کہ اسی طرح کی صورت حال میں اللہ کا حکم ( یعنی قیامت ) آ جائے گا ، پھر آپ نے یہ آیت تلاوت کی : ” اے عیسیٰ ! بے شک میں تمہیں وفات دوں گا اور تمہیں اپنی طرف بلند کر لوں گا اور تمہیں ان لوگوں سے پاک کر دوں گا ، جنہوں نے کفر کیا ، اور جن لوگوں نے تمہاری پیروی کی انہیں کفر کرنے والوں کے اوپر کر دوں گا اور ایسا قیامت کے دن تک ہو گا ۔ “ اس روایت کے رجال ثقہ ہیں ۔

سیدنا واثلہ بن اسقع رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” تم لوگ یہ سمجھتے ہو کہ میں تم سے آخر میں وفات پاؤں گا ، حالانکہ میں تم سے پہلے رخصت ہو جاؤں گا ، پھر تم میرے بعد مختلف گروہوں میں تقسیم ہو کر ایک دوسرے کو قتل کرو گے ۔ “
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال کی توثیق کی گئی ہے اور اس کے بعض رجال کے بارے میں اختلاف پایا جاتا ہے ۔

سیدنا طلحہ بن عبیداللہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب بھی نبوت ہوئی ، تو اس کے بعد قتل کرنا اور سولی چڑھانا ضرور ہوا ہے ۔ “
یہ روایت امام طبرانی نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا مستورد بن شداد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر امت کی مخصوص مدت ہوتی ہے اور میری امت کی مخصوص مدت ایک سو سال ہے ، جب میری امت پر ایک سو سال گزر جائیں گے ، تو ان کے پاس وہ چیز آ جائے گی ، جس کا اللہ تعالیٰ نے ان کے ساتھ وعدہ کیا ہے ۔ “ ابن لہیعہ نامی راوی کہتے ہیں : اس سے مراد فتنوں کا بکثرت ہونا ہے ۔ اس روایت کو امام طبرانی نے نقل کیا ہے ، اس روایت کی سند میں ایک راوی ابن لہیعہ ہے اور وہ راوی ضعیف ہونے کے باوجود حسن الحدیث ہے ۔

سیدنا بلال رضی اللہ عنہ مرفوع حدیث کے طور پر یہ بات نقل کرتے ہیں : نبی اکرم صلی اللہ علیہ وسلم نے نگاہ آسمان کی طرف اُٹھائی اور پھر ارشاد فرمایا : ” ہر طرح کے عیب سے پاک ہے وہ ذات ، جس نے لوگوں پر یوں فتنے بھیجے ہیں ، جس طرح بارش بھیجی جاتی ہے ۔ “
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

سیدنا جریر رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ صلی اللہ علیہ وسلم نے آسمان کی طرف نگاہ اٹھائی اور پھر ارشاد فرمایا : ” اللہ کی ذات ہر عیب سے پاک ہے ، جس نے ان پر ایسے فتنے بھیجے ہیں جو بارش کی مانند ہیں ۔ “
یہ روایت امام طبرانی نے نقل کی ہے اس کی سند میں ایک راوی یحیی بن سلمہ بن کہیل ہے اور وہ ضعیف ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب ایسے فتنے ہوں گے ، جن میں آدمی اپنے بھائی اور اپنے باپ سے جدا ہو جائے گا ، اور فتنہ ان میں سے کچھ لوگوں کے دلوں میں قیامت تک برقرار رہے گا ، یہاں تک کہ اس فتنے کے حوالے سے کسی شخص کو یوں عار دلائی جائے گی ، جس طرح زنا کرنے والی عورت کو ، اُس کے زنا کرنے کے حوالے سے عار دلائی جاتی ہے ۔ “

اسی سند کے ساتھ یہ بات منقول ہے ، نبی اکرم صلی اللہ علیہ وسلم نے ارشاد فرمایا : ” تمہارے پاس قریعاء آئے گا ، ہم نے عرض کی : یا رسول اللہ ! وہ کیا ہے ؟ نبی اکرم صلی اللہ علیہ وسلم نے ارشاد فرمایا : فتنہ ہے ، جس میں خود کی مانند ہو گا ( یعنی قتل و غارت گری ہو گی ) ۔ “ یہ دونوں روایات امام طبرانی نے نقل کی ہیں اور ان دونوں کی سند میں ایک راوی محمد بن سفیان حضرمی ہے اور میں اس سے واقف نہیں ہوں اور ایک راوی ابن لہیعہ ہے ، جو کمزور ہے ۔

سیدنا خالد بن ولید رضی اللہ عنہ بیان کرتے ہیں : امیرالمؤمنین یعنی سیدنا عمر بن خطاب رضی اللہ عنہ نے مجھے خط لکھا ، یہ اس وقت کی بات ہے ، جب شام میں ، میں نے بہت سی نعمتیں پائیں اور عمدہ قسم کی گندم اور شہد پایا ، ایک مرتبہ عفان نامی راوی نے اس میں شک کیا ہے کہ جب میں نے شام میں یہ یہ چیزیں پائیں ، پھر سیدنا عمر رضی اللہ عنہ نے مجھے حکم دیا کہ میں ہند کی طرف روانہ ہو جاؤں ، ہم اس وقت ہند اس کو سمجھتے تھے ، جو آج کل بصرہ ہے ، راوی کہتے ہیں : میں نے اس بات کو ناپسند کیا ، راوی بیان کرتے ہیں : ایک شخص کھڑا ہوا اور بولا: اے ابوسلیمان ! آپ اللہ تعالیٰ سے ڈریں کیونکہ فتنے ظاہر ہو چکے ہیں ، راوی بیان کرتے ہیں : انہوں نے دریافت کیا : کیا سیدنا عمر بن خطاب رضی اللہ عنہ زندہ ہیں ؟ فتنے تو ان کے بعد ہوں گے ، اور لوگ ذی بلیان کے مقام پر ہوں گے ، راوی کہتے ہیں : ذی بلیان ایک مقام ہے جو فلاں فلاں جگہ پر ہے ، وہاں کوئی شخص غور و فکر کرے گا کہ کیا اسے کوئی ایسی جگہ ملتی ہے کہ جہاں وہ پڑاؤ کر سکے ؟ اس کی وجہ یہ ہو گی کہ اس نے جس فتنے اور خرابی کا سامنا کیا ہو گا ، وہ اس سے بچنا چاہ رہا ہو گا ، تو اسے کوئی ایسی جگہ نہیں ملے گی ، یہ وہ ایام ہوں گے ، جن کے بارے میں نبی اکرم صلی اللہ علیہ وسلم نے یہ بات ذکر کی ہے کہ قیامت سے پہلے وہ آئیں گے اور ان میں قتل و غارت گری ہو گی ، تو ہم اس بات سے اللہ کی پناہ مانگتے ہیں کہ وہ زمانہ ہمیں یا تمہیں نصیب ہو ۔
یہ روایت امام أحمد نے امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ، اس کے بعض راویوں میں ضعیف ہونا پایا جاتا ہے ۔

سیدنا عمران بن حصین رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب میرے بعد چار فتنے ہوں گے ، ایک فتنے میں خون بہانا حلال قرار دیا جائے گا ، دوسرے میں خون بہانا اور مال حلال قرار دیا جائے گا ، تیسرے میں خون بہانا ، مال اور شرمگاہ کو حلال قرار دیا جائے گا ۔ “
یہ روایت امام طبرانی نے معجم اوسط اور معجم کبیر میں نقل کی ہے ، انہوں نے تین کا ذکر نہیں کیا ، اس روایت کی سند میں ایک راوی حفص بن غیلان ہے ابوزرعہ اور دیگر حضرات نے اسے ثقہ قرار دیا ہے اور جمہور نے اسے ضعیف کہا: ہے اور ایک راوی ابن لہیعہ ہے جو کمزور ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آخری زمانے میں ایسا فتنہ ہو گا ، جس میں لوگوں کو یوں نکالا جائے گا ، جس طرح کان میں سے سونے اور چاندی کو نکالا جاتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور اس میں ضعیف ہونا پایا جاتا ہے اور اس میں ایک راوی محمد بن سفیان حضرمی ہے اور میں اس سے واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عنقریب میری امت کو دوسری امتوں کی بیماریاں لاحق ہوں گی ، لوگوں نے عرض کی : دوسری امتوں کی بیماریاں کیا ہیں ؟ آپ صلی اللہ علیہ وسلم نے ارشاد فرمایا : ” تکبر ، خود پسندی ، مقابلے بازی ، ایک دوسرے سے بغض ، بخل ، یہاں تک کہ سرکشی ہو گی ، پھر قتل و غارتگری ہو گی ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوسعید غفاری ہے ، حمید بن ہانی کے علاوہ کسی نے اس سے روایت نقل نہیں کی ہے ، اس روایت کے بقیہ رجال کی توثیق کی گئی ہے ۔

سیدنا عمار بن یاسر رضی اللہ عنہ بیان کرتے ہیں : ایک مرتبہ ہم متعدد افراد ، نبی اکرم صلی اللہ علیہ وسلم کے پاس بیٹھے ہوئے تھے ، سیدنا ابوبکر رضی اللہ عنہ تھے ، سیدنا عمر رضی اللہ عنہ تھے ، سیدنا عثمان رضی اللہ عنہ تھے ، سیدنا علی رضی اللہ عنہ تھے ، سیدنا طلحہ رضی اللہ عنہ تھے ، سیدنا زبیر رضی اللہ عنہ تھے ، سیدنا عبدالرحمن رضی اللہ عنہ تھے ، سیدنا معاذ رضی اللہ عنہ تھے ، سیدنا حذیفہ رضی اللہ عنہ تھے اور سیدنا سعد رضی اللہ عنہ تھے ، یہ ہجرت کے آٹھ سال گزرنے کے بعد نویں سال کا واقعہ ہے ، سیدنا حذیفہ رضی اللہ عنہ نے نبی اکرم صلی اللہ علیہ وسلم کی خدمت میں عرض کی : یا رسول اللہ ! میرے ماں باپ آپ پر قربان ہوں ، آپ ہمیں فتنوں کے بارے میں بتائیے ، آپ صلی اللہ علیہ وسلم نے ارشاد فرمایا : ” اے حذیفہ ! لوگوں پر ایسا زمانہ آئے گا جس میں کھڑا ہوا شخص چلنے والے سے بہتر ہو گا اور بیٹھا ہوا شخص کھڑے ہوئے سے بہتر ہو گا اور قاتل اور مقتول جہنم میں ہوں گے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی یزید بن مروان خلال ہے اور وہ ضعیف ہے ۔

حسن بصری بیان کرتے ہیں : سیدنا ضحاک بن قیس رضی اللہ عنہ نے ، قیس بن ہیثم کو یزید بن معاویہ کے انتقال پر خط لکھا : ” تمہیں سلام ہو ! امابعد ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت سے پہلے تاریک رات کے ٹکڑوں کی مانند فتنے ہوں گے ، کچھ فتنے ایسے ہوں گے جو دھوئیں کے ٹکڑوں کی مانند ہوں گے ، ان میں آدمی کا دل یوں مر جائے گا ، جس طرح آدمی کا جسم مر جاتا ہے ، ان میں آدمی صبح کے وقت مومن ہو گا اور شام کو کافر ہو چکا ہو گا ، یا شام کو مومن ہو گا اور صبح کے وقت کافر ہو چکا ہو گا ، لوگ اپنا حصہ اور اپنا دین ، دنیاوی ساز و سامان کے عوض میں فروخت کر دیں گے ۔ “ یزید بن معاویہ مر چکا ہے ، اور تم لوگ ہمارے بھائی اور ہمارے ساتھی ہو ، تو تم ( اگلے خلیفہ کے انتخاب کے سلسلے میں ) ہم سے سبقت نہ لے جانا ، یہاں تک کہ ہم اپنے لئے ( نیا خلیفہ ) اختیار کر لیں ۔ “
یہ روایت امام أحمد اور امام طبرانی نے مختلف حوالوں سے نقل کی ہے ، جن میں ایک راوی علی بن زید ہے اور وہ خراب حافظے کا مالک ہے ، ویسے اس کی توثیق کی گئی ہے ، امام أحمد کے بقیہ رجال صحیح کے رجال ہیں ۔

سیدنا نعمان بشیر رضی اللہ عنہ بیان کرتے ہیں : ہم اللہ کے رسول صلی اللہ علیہ وسلم کے ساتھ رہے ہیں اور ہم نے آپ صلی اللہ علیہ وسلم کو یہ ارشاد فرماتے ہوئے سنا ہے : ” قیامت سے پہلے تاریک رات کے ٹکڑوں کی مانند فتنے ہوں گے ، جن میں آدمی صبح کے وقت مومن ہو گا ، تو شام کے وقت کافر ہو چکا ہو گا ، یا شام کے وقت مومن ہو گا ، تو پھر صبح کے وقت کافر ہو چکا ہو گا ، لوگ دنیاوی معمولی ساز و سامان کے عوض میں اپنا آخرت کا حصہ بیچ دیں گے “ ( یہاں ایک لفظ کے بارے میں راوی کو شک ہے ) ۔ حسن بصری کہتے ہیں : اللہ کی قسم ! ہم نے ان لوگوں کو دیکھا ہے کہ ان کی شکلیں تھیں ، لیکن عقلیں نہیں تھیں ، جسم تھے ، لیکن سمجھ بوجھ نہیں تھی ، وہ جہنم کے پتنگے تھے اور لالچ کے بھیڑیے تھے ، صبح دو درہم لے کے جاتے تھے اور شام کو دو درہم لے کے آتے تھے ، ان میں سے کوئی ایک شخص اپنا دین ، بکری کی قیمت کے عوض میں فروخت کر دیتا تھا ۔
یہ روایت امام أحمد اور امام طبرانی نے معجم اوسط میں نقل کی ہے ، اس کی سند میں ایک راوی مبارک بن فضالہ ہے ، جسے ایک جماعت نے ثقہ قرار دیا ہے اور اس میں کمزور ہونا پایا جاتا ہے ، اس روایت کے بقیہ رجال صحیح کے رجال ہیں ۔

اہل شام سے تعلق رکھنے والے ایک صاحب ، جن کا نام عمار ہے ، وہ بیان کرتے ہیں : ایک مرتبہ ہم کہیں گئے ، پھر ہم واپس آئے تو ہمارے درمیان خثم قبیلے سے تعلق رکھنے والا ایک بوڑھا تھا ، اس نے حجاج کا ذکر کرتے ہوئے اس پر تنقید کی ، اسے برا بھلا کہا: ، میں نے اس سے کہا: تم اسے کیوں برا بھلا کہہ رہے ہو ؟ جبکہ وہ امیرالمؤمنین کی اطاعت کرتے ہوئے اہل عراق کے ساتھ جنگ کر رہا ہے ؟ تو اس نے کہا: یہی وہ شخص ہے ، جس نے انہیں کافر بنایا ہے ، پھر اس نے یہ بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس امت میں پانچ فتنے ہوں گے ۔ “ ( شاید آگے والے کلمات صحابی کے ہیں : ان میں سے ) چار رخصت ہو چکے ہیں اور ایک باقی رہ گیا ہے اور وہ ” صیلم “ ہو گا اور اے اہل شام ! وہ تمہارے درمیان ہو گا ، اگر تم نے اس کا زمانہ پایا ، تو اگر تم سے ہو سکے تو تم پتھر بن جانا اور تم دونوں گروہوں میں سے کسی ایک کے ساتھ نہ ہونا ، خبردار ! تم زمین میں سے خرچ حاصل کر لینا ۔ “

ایک روایت میں یہ الفاظ ہیں : ہم نے دریافت کیا : کیا آپ نے خود نبی اکرم صلی اللہ علیہ وسلم سے یہ بات سنی ہے ؟ انہوں نے جواب دیا : جی ہاں ۔
یہ روایت امام أحمد نے نقل کی ہے اور عمار نامی شخص سے میں واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم سے قیامت کے بارے میں دریافت کیا گیا ، تو آپ نے ارشاد فرمایا : اس کا علم میرے پروردگار کے پاس ہے ، اس کے صحیح وقت کا وہی علم رکھتا ہے ، البتہ میں تمہیں اس کی نشانیوں کے بارے میں اور جو کچھ اس سے پہلے ہو گا ، اُس کے بارے میں بتا دیتا ہوں ، اس سے پہلے فتنہ اور ہرج ہو گا ، لوگوں نے عرض کی : فتنے کا تو ہمیں پتہ ہے ، ہرج سے کیا مراد ہے ؟ نبی اکرم صلی اللہ علیہ وسلم نے ارشاد فرمایا : حبشہ کی زبان میں اس سے مراد قتل و غارت گری ہے ، آپ صلی اللہ علیہ وسلم نے یہ بھی ارشاد فرمایا : ” لوگوں کے درمیان ایک دوسرے سے عدم شناسائی یوں ڈال دی جائے گی کہ کوئی شخص کسی دوسرے شخص کو پہچانتا نہیں ہو گا ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” بے شک اسلام کا آغاز غریب الوطنی کے عالم میں ہوا تھا اور یہ عنقریب دوبارہ غریب الوطن ہو جائے گا ، تو غریب لوگوں کے لئے مبارک باد ہے ، قیامت سے پہلے کچھ فتنے ہوں گے ، جو تاریک رات کے ٹکڑوں کی مانند ہوں گے ، آدمی ان میں شام کے وقت مومن ہو گا ، تو صبح کے وقت کافر ہو چکا ہو گا ، یا صبح کے وقت مومن ہو گا ، تو شام کے وقت کافر ہو چکا ہو گا ، لوگ دنیاوی ساز و سامان کے عوض میں ، اپنا دین فروخت کر دیں گے ۔ “
یہ روایت امام طبرانی نے معجم اوسط میں نقل کی ہے اور معجم کبیر میں ابتدائی حصے کے اختصار کے ساتھ نقل کی ہے ، اس کی سند میں ایک راوی لیث بن ابوسلیم ہے اور وہ مدلس ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت ، میرے بعد ضرور فتنوں میں مبتلا ہو گی ، جو تاریک رات کے ٹکڑوں کی مانند ہوں گے ، کوئی شخص صبح کے وقت مومن ہو گا اور شام کے وقت کافر ہو چکا ہو گا ، یا شام کو مومن ہو گا تو صبح کافر ہو چکا ہو گا ، اُن ( فتنوں ) کے دوران لوگ معمولی سے دنیاوی ساز و سامان کے عوض میں اپنا دین فروخت کر دیں گے ۔ “
یہ روایت امام طبرانی نے نقل کی ہے ، اس کی سند میں ایک راوی عافیہ بن ایوب ہے اور وہ ضعیف ہے ۔

سیدہ میمونہ رضی اللہ عنہا بیان کرتی ہیں : ایک دن نبی اکرم صلی اللہ علیہ وسلم نے ہم سے ارشاد فرمایا : ” اس وقت تمہارا کیا عالم ہو گا ؟ جب دین سمٹ جائے گا ، خون بہایا جایا جائے گا ، زینت ظاہر ہو جائے گی ، عمارتیں بلند ہو جائیں گی ، بھائیوں کے درمیان اختلاف ہو جائے گا اور بیت عقیق کو جلا دیا جائے گا ۔ “ ایک روایت میں ” بھائیوں کے درمیان اختلاف “ کی بجائے ” علماء کے درمیان اختلاف “ کے الفاظ ہیں ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : قیامت اس وقت تک قائم نہیں ہو گی ، جب تک تمہارے درمیان ہرج زیادہ نہیں ہو گا ، یہ بات آپ صلی اللہ علیہ وسلم نے تین مرتبہ ارشاد فرمائی ، لوگوں نے عرض کی : ہرج سے مراد کیا ہے ؟ آپ صلی اللہ علیہ وسلم نے ارشاد فرمایا : قتل و غارت گری ۔
یہ روایت امام طبرانی نے معجم اوسط میں مرفوع حدیث کے طور پر نقل نہیں کی ہے اس کی سند میں ایک راوی عطیہ ہے اور وہ ضعیف ہے ۔

سیدنا فیروز دیلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” رمضان میں ایک آواز ہو گی ، لوگوں نے عرض کی : یا رسول اللہ ! یہ اس کے ابتدائی حصے میں ہو گی یا درمیانی حصے میں ہو گی یا آخری حصے میں ہو گی ؟ نبی اکرم صلی اللہ علیہ وسلم نے ارشاد فرمایا : بلکہ رمضان کے نصف حصے میں ہو گی ، جب نصف حصے والی رات آئے گی ، وہ جمعہ کی رات ہو گی ، اُس میں آسمان سے ایک آواز آئے گی ، اس میں ستر ہزار لوگوں کو بے ہوش کیا جائے گا ، ستر ہزار گونگے ہو جائیں گے ، ستر ہزار اندھے ہو جائیں گے ، ستر ہزار بہرے ہو جائیں گے ۔ لوگوں نے عرض کی : یا رسول اللہ ! آپ کی امت میں سے سلامتی والا کون ہو گا ؟ آپ نے ارشاد فرمایا : جو اپنے گھر میں رہے گا اور سجدوں کے ذریعے پناہ مانگے گا اور اللہ تعالیٰ کی کبریائی بلند آواز میں بیان کرے گا ، پھر اس کے بعد ایک اور آواز آئے گی ، پہلی آواز سیدنا جبرائیل علیہ السلام کی آواز ہو گی اور دوسری آواز شیطان کی آواز ہو گی ، ایک آواز رمضان میں ہو گی ، اور پھر ایک ” معمعہ “ ( جنگ کے دوران کی آوازیں ) شوال میں ہو گی ، ذی القعدہ میں قبائل کے درمیان امتیاز ہو جائے گا ، ذوالحج میں حاجیوں پر حملہ کیا جائے گا اور محرم ، محرم کیا ہے ؟ اس کا ابتدائی حصہ میری امت کے لئے آزمائش ہو گا اور اس کا آخری حصہ میری امت کے لئے کشادگی ہو گی ، اس زمانے میں ایک سواری ، جس پر اس کا ساز و سامان موجود ہو اور مؤمن اس پر سوار ہو کر نجات پا لے ، وہ مومن کے لئے اس ساز و سامان سے زیادہ بہتر ہو گی ، جس کی قیمت ایک لاکھ ہو ۔ “
یہ روایت امام طبرانی نے نقل کی ہے ، اس کی سند میں ایک راوی عبدالوہاب بن ضحاک ہے اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” رمضان کے مہینے میں ایک آواز ہو گی ، ذیقعدہ کے مہینے میں قبائل کے درمیان امتیاز ہو جائے گا اور ذوالحج کے مہینے میں حاجیوں کو سلب کر لیا جائے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی شہر بن حوشب ہے اس میں ضعف پایا جاتا ہے اور ایک راوی بختری بن عبدالحمید ہے اور میں اس سے واقف نہیں ہوں ۔