مجمع الزوائد ومنبع الفوائد

سیدنا ابوبکر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی مسلمان اپنے بھائی پر ہتھیار اٹھا لے تو اللہ تعالیٰ کے فرشتے مسلسل اس پر لعنت کرتے رہتے ہیں ، جب تک وہ اس ( بھائی ) سے ہٹا کر اسے میان میں نہیں ڈال دیتا ۔ “
یہ روایت امام بزار نے نقل کی ہے ، اس کی سند میں ایک راوی سوید بن ابراہیم ہے ، جسے امام نسائی رحمہ اللہ نے ضعیف قرار دیا ہے ابوزرعہ نے اسے ثقہ کہا: ہے اور وہ کمزور ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم اس بات سے منع کیا کرتے تھے کہ کوئی مسلمان کسی مسلمان پر ہتھیار اٹھائے ۔
یہ روایت امام بزار اور امام طبرانی نے نقل کی ہے ، امام طبرانی کی سند میں ایسا راوی ہے ، جس سے میں واقف نہیں ہوں اور امام بزار کی سند میں ایک راوی یوسف بن خالد سمتی ہے اور وہ متروک ہے ۔

سیدنا عمرو بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ہم پر ہتھیار اٹھا لیتا ہے ، وہ ہم میں سے نہیں ہے ۔ “
یہ روایت امام بزار نے نقل کی ہے ، اس کی سند میں ایک راوی کثیر بن عبداللہ ہے اور وہ جمہور کے نزدیک ضعیف ہے ، امام ترندی نے اس کی نقل کردہ حدیث کو حسن قرار دیا ہے ۔

سیدنا عبداللہ بن زبیر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” وہ شخص ہم میں سے نہیں ہے ، جو ہم پر ہتھیار اٹھا لے ۔ “
یہ روایت امام طبرانی نے نقل کی ہے ، اس کی سند میں ایک راوی مسلم بن خالد زنگی ہے ، جس کے ضعیف ہونے کے باوجود اس کی توثیق کی گئی ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ہم پر ہتھیار اٹھا لے ، وہ ہم میں سے نہیں ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ایوب بن عتبہ ہے اور وہ ضعیف ہے ، ایک روایت کے مطابق یحیی بن معین نے اسے ثقہ قرار دیا ہے ۔

سیدنا سہل بن سعد ساعدی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی شخص اپنے بھائی کے سامنے تلوار ہرگز نہ لہرائے ، ہو سکتا ہے شیطان اُس کے ہاتھ سے وہ گرا دے ( اور دوسرا شخص زخمی ہو کے مر جائے ) اور وہ ( تلوار لہرانے والا ) شخص جہنم کے کسی گڑھے میں گر جائے ۔ “
یہ روایت امام طبرانی نے نقل کی ہے اس کی سند میں ایک راوی یعقوب بن محمد زہری ہے ، جسے ابن حبان نے ثقہ قرار دیا ہے اور وہ مدلس ہے ۔