مجمع الزوائد ومنبع الفوائد

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سب سے زیادہ فضیلت والا جہاد یہ ہے کہ حاکم کے سامنے حق بات کی جائے ( راوی کو شک ہے ، شاید یہ الفاظ ہیں : ) ظالم حکمران کے سامنے ۔ ۔ ۔ ۔ ۔ ۔ ۔ “ ۔
یہ روایت امام بزار نے نقل کی ہے اس کی سند میں ایک راوی ابوبکر ہذلی ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” قیامت کے دن تمام شہداء کے سردار ، سیدنا حمزہ بن عبدالمطلب رضی اللہ عنہ ہوں گے اور وہ شخص ہو گا ، جو کسی ظالم کے سامنے کھڑا ہو اور اسے نیکی کا حکم دے یا برائی سے منع کرے اور وہ حکمران اُسے قتل کروا دے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایک ضعیف شخص ہے ۔

سیدنا ابوعبیدہ بن جراح رضی اللہ عنہ بیان کرتے ہیں : میں نے عرض کی : یا رسول اللہ ! شہداء میں ، اللہ تعالیٰ کے نزدیک سب سے زیادہ معزز کون ہو گا ؟ نبی اکرم صلی اللہ علیہ وسلم نے ارشاد فرمایا : ” وہ شخص جو کسی ظالم حکمران کے سامنے کھڑا ہو اور اسے نیکی کا حکم دے یا اسے برائی سے منع کرے اور وہ حکمران اسے قتل کروا دے ، عرض کی گئی : لوگوں میں سب سے زیادہ شدید عذاب کسے ہو گا ؟ نبی اکرم صلی اللہ علیہ وسلم نے ارشاد فرمایا : وہ شخص جس نے کسی نبی کو شہید کیا ہو ، یا کسی ایسے شخص کو قتل کیا ہو ، جس نے اسے کسی نیکی کا حکم دیا ہو ، یا اسے برائی سے منع کیا ہو ، پھر آپ نے یہ آیت تلاوت کی : ” اور وہ لوگ انبیاء کو ناحق طور پر قتل کر دیتے ہیں اور وہ ان لوگوں کو قتل کر دیتے ہیں ، جو لوگوں میں سے انصاف کے مطابق حکم دیتے ہیں ، تو تم انہیں دردناک عذاب کی اطلاع دے دو ! “ ۔ پھر نبی اکرم صلی اللہ علیہ وسلم نے ارشاد فرمایا : اے ابوعبیدہ ! بنی اسرائیل نے تینتالیس انبیاء کرام علیہم السلام کو ایک ہی وقت میں شہید کر دیا تھا اور بنی اسرائیل میں سے ایک سو بارہ افراد جو عبادت گزار تھے ، وہ اُٹھے انہوں نے نیکی کا حکم دیا اور برائی سے منع کیا ، تو ان سب کو قتل کر دیا گیا ۔
یہ روایت امام بزار نے نقل کی ہے اور اس کی سند میں دو راوی ایسے ہیں ، جن سے میں واقف نہیں ہوں ۔