مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب میرے بعد ایسے خلفاء ہوں گے ، جو اپنے علم کے مطابق عمل کریں گے اور وہ کام کریں گے ، جن کا انہیں حکم دیا گیا ہو گا ، اور میرے بعد ایسے خلفاء بھی ہوں گے ، جو ایسا عمل کریں گے جس کے بارے میں وہ علم نہیں رکھتے ہوں گے اور وہ کام کریں گے ، جن کا انہیں حکم نہیں دیا گیا ہو گا ، جو شخص ان پر انکار کرے گا وہ لاتعلق ہو جائے گا ، جو شخص اپنے ہاتھ کو روک کے رکھے گا ، وہ سلامت رہے گا ، لیکن جو شخص راضی ہو گا اور پیروی کرے گا ( اُس کا معاملہ مختلف ہے ) ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ، صرف ابوبکر محمد بن عبدالملک بن زنجویہ کا معاملہ مختلف ہے اور وہ ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” تم پر ایسے حکمران آئیں گے ، جو وہ عمل کریں گے جس کے بارے میں وہ علم نہیں رکھتے ہوں گے اور وہ کام کریں گے ، جن کا انہیں حکم نہیں دیا گیا ہو گا ، پھر ان کے بعد ایسے حکمران آئیں گے جو وہ عمل کریں گے ، جن کا ان کو علم نہیں ہو گا اور وہ کام کریں گے ، جن کا انہیں حکم نہیں دیا گیا ہو گا ، جو شخص انکار کرے گا وہ سلامت رہے گا ، لیکن جو شخص راضی رہے گا اور ( ان کی ) پیروی کرے گا ( اس کا معاملہ مختلف ہے ) ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مسلمہ بن علی ہے اور وہ متروک ہے ۔