مجمع الزوائد ومنبع الفوائد

سیدنا مستورد بن شداد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر امت کی ایک مخصوص مدت ہوتی ہے اور میری امت کی مدت ایک سو سال ہے ، جب میری امت پر ایک سو سال گزر جائیں گے ، تو ان کے پاس وہ چیز آ جائے گی ، جس کا اللہ تعالیٰ نے ان کے ساتھ وعدہ کیا ہے ۔ “
یہ روایت امام ابویعلیٰ نے نقل کی ہے اور امام طبرانی نے معجم کبیر میں اس کی مانند نقل کی ہے ۔

امام طبرائی کی ایک روایت ، جو سیدنا مستورد رضی اللہ عنہ کے حوالے سے منقول ہے ، اس میں یہ مذکور ہے : وہ بیان کرتے ہیں ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر امت کی ایک مخصوص مدت ہوتی ہے اور میری امت کی مخصوص مدت ایک سوسال ہے ، جب میری امت پر ایک سو سال گزر جائیں گے ، تو ان پر وہ چیز آ جائے گی ، جس کا اللہ تعالیٰ نے ان کے ساتھ وعدہ کیا ہے ۔ “ ابن لہیعہ کہتے ہیں : اس سے مراد فتنوں کا زیادہ ہونا ہے ۔ اس روایت کی سند میں ایک راوی ابن لہیعہ ہے اور ایک راوی حدیج بن ابوعمرو ہے ، یا حدیج بن عمرو ہے ، جیسا کہ طبرانی کی دو روایات میں سے ایک میں یہ بات مذکور ہے ، اس راوی کو ابن حبان نے ثقہ قرار دیا ہے ، لیکن ابن لہیعہ ضعیف ہے ۔

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارے ساتھ جس چیز کا بھی وعدہ کیا گیا ہے ، وہ سب ایک سو سال میں رونما ہو جائیں گی ۔ “
یہ روایت امام بزار نے نقل کی ہے اور اس کی سند حسن ہے ۔