مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” پرہیز ، تقدیر کے مقابلے میں فائدہ نہیں دیتا ، اور دعا اُس صورت حال میں نفع دیتی ہے ، جس میں تقدیر کا فیصلہ نازل نہ ہوا ہو ، آزمائش اور دعا ، آسمان اور زمین کے درمیان ایک دوسرے سے ملتی ہیں ، اور پھر قیامت کے دن تک ایک دوسرے سے جھگڑا کرتی رہتی ہیں ۔ “
یہ روایت امام بزار نے نقل کی ہے ، اس کی سند میں ایک راوی ابراہیم بن خثیم ہے اور وہ متروک ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” پرہیز ، تقدیر کے مقابلے میں فائدہ نہیں دیتا ہے ، اور دعا اُس چیز کے بارے میں نفع دیتی ہے ، جو تقدیر کا حکم نازل نہ ہوا ہو ، دعا ، آزمائش سے ملتی ہے ، اور پھر وہ دونوں قیامت کے دن تک جھگڑا کرتی رہتی ہیں ۔ “
یہ روایت امام بزار نے نقل کی ہے ، اس کی سند میں ایک راوی زکریا بن منظور ہے ، جسے أحمد بن صالح مصری نے ثقہ قرار دیا ہے اور جمہور نے اسے ضعیف کہا: ہے ۔ ( علامہ ہیثمی فرماتے ہیں ) میں یہ کہتا ہوں اس نوعیت کی کچھ دیگر احادیث کتاب الدعاء میں آگے چل کر آئیں گی ، اگر اللہ نے چاہا ۔