مجمع الزوائد ومنبع الفوائد

سیدنا ابوعروہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ کسی سرزمین پر کسی بندے کی روح قبض کرنے کا ارادہ کرتا ہے ، تو اسے اس علاقے میں کسی کام کے سلسلے میں بھیج دیتا ہے ، جب آدمی اپنے مخصوص مقام تک پہنچ جاتا ہے ، تو وہ اُس کی روح کو قبض کر لیتا ہے ۔ “
یہ روایت امام بزار نے نقل کی ہے ، اسے امام ترمذی نے اختصار کے ساتھ نقل کیا ہے ، اس کی سند میں ایک راوی محمد بن موسیٰ حرشی ہے اور وہ ثقہ ہے اور اس میں اختلاف پایا جاتا ہے ۔

اُن کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ کسی سرزمین پر کسی بندے کی روح قبض کرنے کا ارادہ کرتا ہے ، تو اس بندے کے لئے اس علاقے میں کوئی کام بنا دیتا ہے ، اور آخرکار بندہ اس علاقہ تک پہنچ جاتا ہے ، پھر نبی اکرم صلی اللہ علیہ وسلم نے سورت لقمان کے آخر میں موجود یہ آیت تلاوت کی : ” بے شک قیامت کا علم اللہ تعالیٰ ہی کے پاس ہے اور وہ بارش نازل کرتا ہے اور رحم میں جو کچھ ہے ، وہ اُس کے بارے میں جانتا ہے ۔ ۔ ۔ ۔ ۔ ۔ ۔ “ ۔ نبی اکرم صلی اللہ علیہ وسلم نے یہ پوری آیت تلاوت کی ، پھر نبی اکرم صلی اللہ علیہ وسلم نے فرمایا : ” یہ غیب کی کنجیاں ہیں ، جنہیں صرف اللہ تعالیٰ جانتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عباد بن صہیب ہے اور وہ متروک ہے ، اس پر حدیث ایجاد کرنے کا الزام ہے ، امام ابوداؤد نے اسے ثقہ قرار دیا ہے ۔

سیدنا اسامہ بن زید رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کسی بندے کی موت ، کسی مخصوص سرزمین پر آنی ہو ، تو اس بندے کے لئے اُس جگہ پر کوئی کام بنا دیا جاتا ہے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔ اس سے پہلے اس نوعیت کی کچھ احادیث کتاب الجنائز میں گزر چکی ہے ، جن میں یہ بات مذکور ہے کہ ہر میت کو اسی مٹی میں دفن کیا جاتا ہے ، جس مٹی سے اُسے پیدا کیا گیا ہو ۔