مجمع الزوائد ومنبع الفوائد

سیدنا عبداللہ بن عباس رضی اللہ عنہما ، اللہ تعالیٰ کے اس فرمان کے بارے میں بیان کرتے ہیں ( ارشاد باری تعالیٰ ہے : ) ” اور جب صور میں پھونک ماری جائے گی “ سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میں کیسے مطمئن ہو سکتا ہوں ؟ جبکہ صور سے متعلق فرشتے نے ، اپنا منہ اس کے ساتھ لگایا ہوا ہے ، اور اپنی پیشانی کو جھکایا ہوا ہے اور وہ اس بات کا منتظر ہے کہ اسے کب حکم ہوتا ہے “ ۔ آپ کے اصحاب نے عرض کی : ہمیں کیا پڑھنا چاہیے ؟ نبی اکرم صلی اللہ علیہ وسلم نے فرمایا : تم یہ پڑھو : ﴿حَسْبُنَا اللهُ وَنِعْمَ الْوَكِيلُ﴾ ( ہمارے لئے اللہ تعالیٰ کافی ہے اور وہ بہترین کارساز ہے ) ۔

ایک روایت میں یہ الفاظ ہیں : پھر نبی اکرم صلی اللہ علیہ وسلم نے یہ آیت تلاوت کی : ” جب صور میں پھونک ماری جائے گی “ ۔
یہ روایت امام طبرانی نے نقل کی ہے اس کی سند میں ایک راوی عطیہ ہے اور وہ ضعیف ہے ۔