مجمع الزوائد ومنبع الفوائد

ابوجبیرہ بن ضحاک ، اپنے چچاؤں کے حوالے سے یہ بات نقل کرتے ہیں : نبی اکرم صلی اللہ علیہ وسلم مدینہ منورہ تشریف لائے ، اس وقت ہم میں سے ہر ایک شخص کا کوئی ایک لقب ، یا دو لقب ( یعنی برے نام ) ہوتے تھے ، جب کوئی شخص اُسے بلاتا تھا ، تو اس نام کے حوالے سے بلاتا تھا ، ہم نے عرض کی : یا رسول اللہ ! ہم اس بات کو ناپسند کرتے ہیں ، تو اللہ تعالیٰ نے یہ آیت نازل کی : ” تم ایک دوسرے کے برے نام نہ رکھو “ ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” سنن “ میں سیدنا ابوجبیرہ رضی اللہ عنہ سے منقول روایت کے طور پر مذکور ہے اور یہاں یہ ان کے حوالے سے ، ان کے چچاؤں سے منقول ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ضحاک بن ابوجبیرہ رضی اللہ عنہ بیان کرتے ہیں : زمانہ جاہلیت اُن کے برے نام ہوتے تھے ، نبی اکرم صلی اللہ علیہ وسلم نے ایک مرتبہ ایک شخص کو اس کے لقب ( یعنی برے نام ) کے حوالے سے بلایا ، تو عرض کی گئی : یا رسول اللہ ! شخص اس ( نام ) کو ناپسند کرتا ہے ، تو اللہ تعالیٰ نے یہ آیت نازل کی : ” اور تم ایک دوسرے کے برے نام نہ رکھو ۔ ۔ ۔ ۔ ۔ ۔ ۔ “ ۔ یہ آیت کے آخر تک ہے ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔