مجمع الزوائد ومنبع الفوائد

سیدنا حارث بن ضرار خزاعی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ نے مجھے اسلام کی دعوت دی ، میں نے اس کا اقرار کر لیا اور اسلام میں داخل ہو گیا ، آپ نے مجھے زکوۃ کی دعوت دی ، میں نے اس کا اقرار کر لیا ، میں نے عرض کی : یا رسول اللہ ! کیا میں اپنی قوم کی طرف واپس جا کر انہیں اسلام کی طرف اور زکوۃ کی ادائیگی کی طرف دعوت دوں ؟ جو شخص میری دعوت قبول کر لے گا ، میں اس کی زکوۃ اکٹھی کروں گا اور پھر نبی اکرم صلی اللہ علیہ وسلم اتنے عرصے کے بعد اپنے قاصد کو ، میرے پاس بھیج دیں ، تو جب سیدنا حارث رضی اللہ عنہ نے ، ان لوگوں سے زکوۃ جمع کر لی ، اور وہ وقت آ گیا ، جس میں نبی اکرم صلی اللہ علیہ وسلم نے ، اپنے قاصد کو ان لوگوں کی طرف بھیجنا ہے ، تو وہ قاصد وہاں نہیں آیا ، سیدنا حارث رضی اللہ عنہ یہ سمجھے کہ شاید ان کے بارے میں ، اللہ تعالٰی اور اس کے رسول کی طرف سے کوئی ناراضگی سامنے آئی ہے تو انہوں نے اپنی قوم کے معززین کو بلوایا اور ان سے کہا: اللہ کے رسول نے میرے ساتھ ایک وقت طے کیا تھا کہ جس میں آپ اپنے قاصد کو میرے پاس بھیجیں گے ، تاکہ وہ میرے پاس موجود زکوۃ کو وصول کر لے ، تو اللہ کے رسول کی طرف سے تو وعدہ خلافی نہیں ہو سکتی ، میں یہ سجھتا ہوں کہ وہ قاصد کیونکہ نہیں آیا ہے ، تو اس کا مطلب ہے کہ کوئی ناراضگی ہے ، تو تم لوگ چلو ! ہم اللہ کے رسول کے پاس جاتے ہیں ، پھر نبی اکرم صلی اللہ علیہ وسلم نے ولید بن عقبہ کو حارث کی طرف بھیجا ، تاکہ وہ ان سے ان کے پاس موجود جمع شدہ زکوۃ لے لیں جب ولید روانہ ہوئے اور راستے میں کسی جگہ پر پہنچے ، تو انہیں کچھ خیال آیا وہ واپس آئے ، وہ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! حارث نے مجھے زکوۃ نہیں دی ، اس نے مجھے قتل کرنے کا ارادہ کیا ، تو نبی اکرم صلی اللہ علیہ وسلم نے حارث کی طرف ایک جنگی مہم بھیجی ، اسی دوران حارث اپنے ساتھیوں کو لے کر آ رہے تھے ، ان کا اس مہم سے سامنا ہوا ، یہ مدینہ منورہ سے باہر کی بات ہے ، جب حارث کا ان لوگوں سے سامنا ہوا ، تو ان لوگوں نے کہا: یہ تو حارث ہے ، جب وہ ان کے پاس پہنچ گئے ، تو حارث نے ان سے دریافت کیا : تم لوگوں کو کس کی طرف بھیجا گیا ہے ؟ ان لوگوں نے بتایا : تمہاری طرف ، حارث نے دریافت کیا : وہ کیوں ؟ ان لوگوں نے بتایا کیونکہ نبی اکرم صلی اللہ علیہ وسلم نے ولید بن عقبہ کو تمہاری طرف بھیجا تھا ، اُس کا یہ کہنا ہے کہ تم نے اسے زکوۃ بھی نہیں دی اور تم نے اسے قتل کرنے کا ارادہ بھی کیا ، تو حارث نے کہا: جی نہیں ! اس ذات کی قسم ! جس نے سیدنا محمد صلی اللہ علیہ وسلم کو حق کے ہمراہ مبعوث کیا ہے ، میں نے تو اُسے دیکھا بھی نہیں ہے اور نہ ہی وہ میرے پاس آیا ہے ، جب حارث ، نبی اکرم صلی اللہ علیہ وسلم کی خدمت میں حاضر ہوئے ، تو نبی اکرم صلی اللہ علیہ وسلم نے دریافت کیا : تم نے زکوۃ بھی نہیں دی اور میرے قاصد کو قتل کرنے کا بھی ارادہ کیا ؟ حارث نے عرض کی : جی نہیں ! اس ذات کی قسم ! جس نے آپ کو حق کے ہمراہ مبعوث کیا ہے ، میں نے تو اسے سرے سے دیکھا ہی نہیں ، اور نہ ہی وہ میرے پاس آیا ہے جب اللہ کے رسول کا قاصد متعین وقت تک میرے پاس نہیں آیا ، تو مجھے یہ اندیشہ ہوا کہ کہیں یہ اللہ اور اس کے رسول کی طرف سے کسی ناراضگی کی وجہ سے نہ ہو راوی بیان کرتے ہیں : تو اس بارے میں سورت حجرات کی یہ آیات نازل ہوئیں : ” اے ایمان والو ! جب کوئی فاسق شخص تمہارے پاس کوئی اطلاع لے کر آئے ، تو تم تحقیق کر لیا کرو ، کہیں ایسا نہ ہو کہ لاعلمی میں تم کسی قوم کو نقصان پہنچاؤ اور پھر بعد میں اپنے کیے ہوئے پر نادم ہو “ ۔ یہ آیت یہاں تک ہے : ” اللہ تعالیٰ کی طرف سے فضل اور نعمت ، اور اللہ تعالیٰ علم والا ، حکمت والا ہے “ ۔
یہ روایت امام أحمد اور امام طبرانی نے نقل کی ہے ، تاہم انہوں نے حارث بن ضرار کی جگہ لفظ حارث بن سرار نقل کیا ہے اور امام أحمد کے رجال ثقہ ہیں ۔

سیدنا علقمہ بن ناجیہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ولید بن عقبہ بن ابومعیط کو ہماری طرف بھیجا ، تاکہ وہ ہمارے اموال کی زکوۃ وصول کرے ، وہ روانہ ہوا جب وہ ہمارے قریب پہنچا تو واپس چلا گیا ، یہ غزوہ مریسیع کے بعد کی بات ہے ، میں سوار ہو کر اس کے پیچھے گیا ، وہ نبی اکرم صلی اللہ علیہ وسلم کے پاس آیا اور بولا: یا رسول اللہ ! میں ایک ایسی قوم کے پاس گیا ، جو ابھی بھی زمانہ جاہلیت کے سے ہیں ، انہوں نے لباس لے لیا اور زکوۃ دینے سے انکار کر دیا ، نبی اکرم صلی اللہ علیہ وسلم نے اس بارے میں مزید کچھ نہیں کیا تھا کہ اس حوالے سے یہ آیت نازل ہو گئی : ” اے ایمان والو ! اگر کوئی فاسق شخص تمہارے پاس کوئی اطلاع لے کر آئے ۔ ۔ ۔ ۔ ۔ ۔ ۔ “ ۔ پھر بنو مصطلق کے لوگ ولید کے پیچھے اپنے صدقات کے جانور وغیرہ ہانک کر نبی اکرم صلی اللہ علیہ وسلم کی خدمت میں حاضر ہوئے اور دیگر چیزیں بھی تھیں جو ان پر لادے ہوئی تھیں ، انہوں نے نبی اکرم صلی اللہ علیہ وسلم کے سامنے یہ بات ذکر کی ، کہ وہ لوگ ولید کی تلاش میں اپنے صدقات لے کر نکلے تھے ، انہیں ولید نہیں ملے ، تو وہ چیزیں انہوں نے نبی اکرم صلی اللہ علیہ وسلم کے حوالے کر دیں ، جو ان کے پاس تھیں ان لوگوں نے عرض کی : یا رسول اللہ ! ہمیں یہ اطلاع ملی تھی کہ آپ کا نمائندہ روانہ ہو گیا ہے ، ہم اس بات سے خوش تھے ہم اس سے مانا چاہتے تھے ، لیکن ہمیں یہ پتہ چلا کہ وہ واپس چلا گیا ہے ، تو ہمیں یہ اندیشہ ہوا کہ یہ ہم پر کسی ناراضگی کی وجہ سے نہ ہو ، پھر انہوں نے نبی اکرم صلی اللہ علیہ وسلم کے سامنے یہ بات پیش کی کہ نبی اکرم صلی اللہ علیہ وسلم باقی رہ جانے والی چیزیں ان سے خرید لیں اور جو زکوۃ ہے ، وہ ان سے وصول کر لیں ، تو نبی اکرم صلی اللہ علیہ وسلم نے ارشاد فرمایا : تم لوگ اپنے اخراجات کی چیزیں واپس لے جاؤ ، ہم صدقات میں سے کوئی چیز اس وقت تک فروخت نہیں کریں گے ، جب تک اسے قبضے میں نہیں لے لیتے ، تو وہ لوگ اپنے اہل خانہ کی طرف واپس چلے گئے اور ان کے صدقات کے بقایا جات میں سے جو چیزیں تھیں ، وہ نبی اکرم صلی اللہ علیہ وسلم نے اُن کی طرف بھیجوا دیں ۔

ایک روایت میں یہ الفاظ ہیں : علقمہ بیان کرتے ہیں : ولید بن عقبہ کے معاملے میں بنو مصطلق کا جو وفد نبی اکرم صلی اللہ علیہ وسلم کی خدمت میں حاضر ہوا تھا ، وہ اُس میں شامل تھے ، نبی اکرم صلی اللہ علیہ وسلم نے ارشاد فرمایا تھا : ” تم لوگ واپس چلے جاؤ ! ایسی حالت میں کہ نہ تمہیں محسوس کیا گیا ہو ، اور نہ ہی تمہیں محصور کیا گیا ہو “ ۔
یہ روایت امام طبرانی نے دو اسناد کے ساتھ نقل کی ہے ، جن میں سے ایک سند میں ایک راوی یعقوب بن حمید بن کاسب ہے جسے ابن حبان نے ثقہ قرار دیا ہے اور جمہور نے اُسے ضعیف کہا: ہے اس روایت کے بقیہ رجال ثقہ ہیں ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم نے ولید بن عقبہ کو بنو ولیعہ کی طرف بھیجا ان لوگوں کے درمیان زمانہ جاہلیت سے دشمنی چلی آ رہی تھی ، جب بنو ولیعہ کو اس بات کا پتہ چلا ، تو انہوں نے ولید بن عقبہ کا استقبال کیا ، تاکہ اس بات کا جائزہ لیں کہ اس کے من میں کیا ہے ؟ تو ولید ان لوگوں سے ڈر گیا ، وہ نبی اکرم صلی اللہ علیہ وسلم کے پاس واپس گیا اور بولا: بنو ولیعہ نے مجھے قتل کرنے کا ارادہ کیا ہے اور مجھے زکوۃ دینے سے انکار بھی کر دیا ہے ، جب بنو ولیعہ کو اس بات کا پتہ چلا ، جو ولید نے نبی اکرم صلی اللہ علیہ وسلم کے سامنے کی تھی ، تو وہ لوگ نبی اکرم صلی اللہ علیہ وسلم کی خدمت میں حاضر ہوئے ، انہوں نے عرض کی : یا رسول اللہ ! ولید نے غلط بیانی کی ہے ، ہمارے اور اس کے درمیان زمانہ جاہلیت میں دشمنی چلی آ رہی تھی ، ہمیں یہ اندیشہ ہوا کہ ہمارے درمیان جو پہلے کی دشمنی ہے ، کہیں یہ اس حوالے سے ہمیں نقصان نہ پہنچائے ، ( اس سے پہلے ) نبی اکرم صلی اللہ علیہ وسلم نے ارشاد فرمایا تھا : ” یا تو بنو ولیعہ باز آ جائیں گے ، یا میں ان لوگوں کی طرف ایسے شخص کو بھیجوں گا ، جو میری مانند ہو گا ، وہ ان کے جنگجو لوگوں کو قتل کر دے گا اور بال بچوں کو قیدی بنا لے گا اور وہ یہ شخص ہے “ ۔ پھر نبی اکرم صلی اللہ علیہ وسلم نے اپنا دست مبارک سیدنا علی بن ابوطالب رضی اللہ عنہ کے کندھے پر مارا تھا ۔ راوی بیان کرتے ہیں : یہ آیت ولید کے بارے میں نازل ہوئی تھی : ” اے ایمان والو ! اگر کوئی فاسق شخص ، کوئی اطلاع لے کر تمہارے پاس آئے ۔ ۔ ۔ ۔ ۔ ۔ ۔ “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبداللہ بن عبدالقدوس تمیمی ہے ، جسے جمہور نے ضعیف قرار دیا ہے اور ابن حبان نے اسے ثقہ کہا: ہے اس روایت کے بقیہ رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم اُن کے گھر واپس تشریف لائے ، آپ نے عصر کے بعد ان کے گھر میں دو رکعت ادا کیں ، سیدہ عائشہ رضی اللہ عنہا نے سیدہ ام سلمہ رضی اللہ عنہا کو پیغام بھیج کر دریافت کیا : یہ کون سی نماز تھی ؟ جو نبی اکرم صلی اللہ علیہ وسلم نے آپ کے گھر میں ادا کی ہے ، تو سیدہ ام سلمہ رضی اللہ عنہا نے بتایا : نبی اکرم صلی اللہ علیہ وسلم ظہر کے بعد دو رکعت ( سنتیں ) ادا کیا کرتے تھے ، بنو مصطلق کا وفد آپ کی خدمت میں حاضر ہوا ، اور عامل ( یعنی زکوۃ کی وصولی کے نگران شخص ) ولید بن عقبہ نے ان کے ساتھ جو کیا تھا ، اُس سلسلے میں وہ لوگ حاضر ہوئے تھے ، اور وہ لوگ نبی اکرم صلی اللہ علیہ وسلم کے سامنے مسلسل معذرت پیش کرتے رہے ، یہاں تک کہ مؤذن آیا اور اس نے نبی اکرم صلی اللہ علیہ وسلم کو عصر کی نماز کے لئے بلا لیا ، تو نبی اکرم صلی اللہ علیہ وسلم نے فرض نماز ادا کر لی ، پھر آپ نے میرے گھر میں ، میرے ہاں وہ دو رکعت ادا کیں ( جو آپ ظہر کے بعد ادا نہیں کر پائے تھے ) آپ نے اُس سے پہلے ، یا اُس کے بعد یہ دو رکعت کبھی ادا نہیں کی ہیں ۔

سیدہ ام سلمہ رضی اللہ عنہا بیان کرتی ہیں : یہ آیت بنو مصطلق کے بارے میں نازل ہوئی تھی ، جو ان کے زکوۃ کی وصولی کے نگران ، ولید بن عقبہ کے ، اُن لوگوں کے ساتھ طرز عمل کے بارے میں ہے ( ارشاد باری تعالیٰ ہے : ) ” اے ایمان والو ! اگر کوئی فاسق شخص کوئی اطلاع لے کر تمہارے پاس آئے تو تم تحقیق کر لیا کرو “ ۔ سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ان لوگوں کی طرف ولید بن عقبہ کو بھیجا ، تاکہ وہ ان لوگوں کے اموال کی زكوة وصول کرے ، جب ان لوگوں نے اس کی آمد کے بارے میں سنا ، تو کچھ شہسوار آ گئے ان لوگوں نے کہا: کہ ہم نبی اکرم صلی اللہ علیہ وسلم کے بھیجے ہوئے فرد کے ساتھ سفر کریں گے اور اس کو سواری فراہم کریں گے ، جب ولید نے ( ان کی آمد کی آواز ) سنی ، تو وہ یہ سمجھا کہ شاید یہ لوگ اس کے پاس اسے قتل کرنے کے لئے آ رہے ہیں ، تو وہ واپس چلا گیا ، اس نے بتایا : یا رسول اللہ ! کہ بنو مصطلق کے لوگوں نے زکوۃ دینے سے انکار کر دیا ہے ، اس قوم کے لوگ مدینہ منورہ آ گئے انہوں نے نبی اکرم صلی اللہ علیہ وسلم کے پیچھے ایک صف بنا لی ( اور نماز ادا کی ) جب نبی اکرم صلی اللہ علیہ وسلم نے نماز مکمل کی ، تو وہ لوگ بھی نماز ختم کر کے آئے اور انہوں نے عرض کی : ہم اللہ کے غضب اور اس کے رسول کے غضب سے ، اللہ کی پناہ مانگتے ہیں ، یا رسول اللہ ! ہمیں آپ کے نمائندے کے بارے میں پتہ چلا کہ جس کو آپ نے بھجوایا ہے ، وہ ہمارے اموال کی زکوۃ وصول کرے گا ، تو ہم اس بات پر خوش ہوئے اور اس حوالے سے ہماری آنکھیں ٹھنڈی ہوئیں ، ہم نے اس سے ملنے کا ارادہ کیا ، تاکہ ہم اللہ کے رسول کے نمائندے کے ساتھ چلیں ، تو ہمیں یہ پتہ چلا کہ وہ واپس چلا گیا ہے ، ہمیں یہ اندیشہ ہوا کہ شاید اللہ اور اس کے رسول کی طرف سے ہم پر کسی غضب کی وجہ سے یہ واپسی ہوئی ہے ، پھر وہ لوگ مسلسل نبی اکرم صلی اللہ علیہ وسلم کے سامنے معذرت پیش کرتے رہے ، یہاں تک کہ ان لوگوں کے بارے میں یہ آیت نازل ہوئی ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس میں سے صرف وہ حصہ منقول ہے ، جو عصر کے بعد دو رکعت ادا کرنے سے متعلق ہے ۔
یہ روایت امام طبرانی نے نقل کی ہے اس کی سند میں ایک راوی موسیٰ بن عبیدہ ہے اور وہ ضعیف ہے ۔

مجاہد بیان کرتے ہیں : نبی اکرم صلی اللہ علیہ وسلم نے ولید بن عقبہ بن ابومعیط کو بنو مصطلق کی طرف زکوۃ وصول کرنے کے لئے بھیجا تھا ۔
یہ روایت امام طبرانی نے ” مرسل “ روایت کے طور پر نقل کی ہے ، اس کی سند میں ایک راوی عبداللہ بن محمد بن سعید بن ابومریم ہے اور وہ ضعیف ہے ۔