مجمع الزوائد ومنبع الفوائد

سیدنا زید بن ارقم رضی اللہ عنہ بیان کرتے ہیں : کچھ عرب لوگ آئے انہوں نے یہ کہا: تم ہمارے ساتھ ان صاحب کے پاس چلو ، اگر یہ نبی ہوئے ، تو ہم ان کے حوالے سے سب سے زیادہ سعادت مند لوگ بن جائیں گے اور اگر وہ بادشاہ ہوئے تو ہم ان کے سائے میں آرام سے رہیں گے ، تو میں نبی اکرم صلی اللہ علیہ وسلم کے پاس گیا اور آپ کو اس بارے میں بتایا ، جو انہوں نے کہا: تھا ، پھر وہ لوگ نبی اکرم صلی اللہ علیہ وسلم کے حجروں کے پاس آئے اور بلند آواز میں کہنے لگے : اے سیدنا محمد ! اے سیدنا محمد ! تو اللہ تعالیٰ نے یہ آیت نازل کی : ” بے شک وہ لوگ جو حجروں کے باہر سے تمہیں پکارتے ہیں ، اُن میں سے زیادہ تر لوگ عقل نہیں رکھتے ہیں “ ۔ تو نبی اکرم صلی اللہ علیہ وسلم نے میرے کان پکڑے اور ارشاد فرمایا : اے زید ! اللہ تعالیٰ نے تمہارے قول کی تصدیق کر دی ہے ۔
یہ روایت امام طبرانی نے نقل کی ہے اس کی سند میں ایک راوی داؤد بن راشد طفاوی ہے ، جسے ابن حبان نے ثقہ قرار دیا ہے اور یحییٰ بن معین نے اسے ضعیف کہا: ہے ، اس روایت کے بقیہ رجال ثقہ ہیں ۔

اقرع بن حابس کے بارے میں یہ بات منقول ہے کہ اُس نے حجروں کے باہر سے نبی اکرم صلی اللہ علیہ وسلم کو پکارا اور بولا: یا رسول اللہ ! نبی اکرم صلی اللہ علیہ وسلم نے اُسے کوئی جواب نہیں دیا ، اُس نے کہا: اے محمد ! میری بیان کی ہوئی تعریف ، زینت کا باعث ہے اور میری بیان کی ہوئی مذمت ، بے عزتی کا باعث ہے تو نبی اکرم صلی اللہ علیہ وسلم نے ارشاد فرمایا : یہ بات صرف اللہ تعالیٰ کے لیے ( مخصوص ) ہے ۔ جس طرح ابوسلمہ نامی راوی نے بیان کیا ہے ۔
یہ روایت امام أحمد اور امام طبرانی نے نقل کی ہے امام أحمد کی مختلف اسناد میں سے ایک کے رجال صحیح کے رجال ہیں اگر ابوسلمہ نامی راوی نے اقرع بن حابس نامی راوی سے سماع کیا ہو ، ورنہ
یہ روایت مرسل شمار ہو گی ، جس طرح امام أحمد کی دوسری روایت کی سند ہے ۔