مجمع الزوائد ومنبع الفوائد

یزید بن عبداللہ بن عریب اپنے والد کے حوالے سے اپنے دادا کے حوالے سے نبی اکرم صلی اللہ علیہ وسلم سے یہ بات نقل کرتے ہیں : یہ آیت نازل ہوئی : ” وہ لوگ جو اپنے اموال ، رات میں اور دن میں ، پوشیدہ طور پر اور علانیہ طور پر خرچ کرتے ہیں ۔ ۔ ۔ ۔ ۔ ۔ ۔ ۔ ۔ “ یہ آیت گھوڑوں پر خرچ کرنے کے بارے میں نازل ہوئی تھی ۔
یہ روایت امام طبرانی نے معجم کبیر اور معجم اوسط میں نقل کی ہے یزید بن عبداللہ اور اس کا والد یہ دونوں معروف نہیں ہیں ۔

سیدنا عبداللہ بن عباس رضی اللہ عنہما اللہ تعالیٰ کے اس فرمان کے بارے میں بیان کرتے ہیں : ( ارشاد باری تعالیٰ ہے : ) ” جو لوگ اپنے اموال رات میں اور دن میں پوشیدہ طور پر اور اعلانیہ طور پر خرچ کرتے ہیں“ ۔ ( سیدنا عبداللہ بن عباس ) فرماتے ہیں : یہ آیت سیدنا علی بن ابوطالب رضی اللہ عنہ کے بارے میں نازل ہوئی تھی ان کے پاس چار درہم تھے انہوں نے ایک درہم رات کے وقت خرچ کر دیا ایک دن کے وقت خرچ کیا ، اور ایک پوشیدہ طور پر خرچ کیا ، اور ایک علانیہ طور پر خرچ کیا ۔
یہ روایت امام طبرانی نے نقل کی ہے ۔ اس کی سند میں ایک راوی عبدالواحد بن مجاہد ہے ، اور وہ ضعیف ہے ۔