مجمع الزوائد ومنبع الفوائد

سیدنا ابی بن کعب رضی اللہ عنہ بیان کرتے ہیں : نبی اکرم صلی اللہ علیہ وسلم نے ان سے دریافت کیا اللہ کی کتاب میں کون سی آیت سب سے زیادہ عظمت والی ہے ؟ انہوں نے عرض کی : اللہ اور اس کا رسول زیادہ بہتر جانتے ہیں نبی اکرم صلی اللہ علیہ وسلم نے چند مرتبہ یہ سوال دہرایا تو سیدنا ابی بن کعب رضی اللہ عنہ نے عرض کی : آیت الکرسی نبی اکرم صلی اللہ علیہ وسلم نے ارشاد فرمایا : اے ابوالمنذر تمہیں اس بات کا علم مبارک ہو ! اس ذات کی قسم جس کے دست قدرت میں میری جان ہے اس آیت کی ایک زبان اور دو ہونٹ ہیں جن کے ذریعے یہ عرش کے پائے کے پاس پروردگار کی پاکی بیان کرتی ہے “ ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

ابوسلیل بیان کرتے ہیں : نبی اکرم صلی اللہ علیہ وسلم کے اصحاب میں سے ایک صاحب لوگوں کو حدیث بیان کر رہے تھے ، انہوں نے بکثرت احادیث بیان کیں ، پھر وہ گھر کی چھت پر چڑھ گئے اور لوگوں کو حدیث بیان کرنے لگے ، انہوں نے یہ بات بتائی کہ نبی اکرم صلی اللہ علیہ وسلم نے ارشاد فرمایا : قرآن میں کون سی آیت سب سے زیادہ عظمت والی ہے ؟ تو ایک صاحب نے عرض کی : «اللَّهُ لَا إِلَٰهَ إِلَّا هُوَ الْحَيُّ الْقَيُّومُ» یعنی آیت الکرسی ، وہ صاحب کہتے ہیں : نبی اکرم صلی اللہ علیہ وسلم نے اپنا دست مبارک میرے دونوں کندھوں کے درمیان رکھا ، یہاں تک کہ میں نے اس کی ٹھنڈک اپنے سینے میں محسوس کی ، راوی کو شک ہے ، شاید یہ الفاظ ہیں : نبی اکرم صلی اللہ علیہ وسلم نے اپنا دست مبارک میرے سینے کے درمیان میں رکھا ، یہاں تک کہ اپنے کندھوں کے درمیان میں نے اس کی ٹھنڈک محسوس کی ، پھر نبی اکرم صلی اللہ علیہ وسلم نے ارشاد فرمایا : اے ابوالمنذر ! تمہیں مبارک ہو ۔
علامہ ہیثمی فرماتے ہیں : یہ روایت امام احمد نے نقل کی ہے ، اور اس کے رجال صحیح کے رجال ہیں ۔

سیدنا اسقع بکری رضی اللہ عنہ بیان کرتے ہیں : نبی اکرم صلی اللہ علیہ وسلم مہاجرین کے چبوترے پر ان لوگوں کے پاس آئے ، ایک شخص نے آپ سے سوال کیا : قرآن میں موجود کون سی آیت سب سے زیادہ عظمت والی ہے ؟ نبی اکرم صلی اللہ علیہ وسلم نے ارشاد فرمایا : «اللَّهُ لَا إِلَٰهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ» ، اللہ کی ذات وہ ہے جس کے علاوہ اور کوئی معبود نہیں ہے ، اور وہ زندہ ہے ، اور بذات خود قائم ہے ، اسے نہ اونگھ آتی ہے ، اور نہ نیند آتی ہے ، یہاں تک کہ آپ نے یہ پوری آیت تلاوت کی ۔
علامہ ہیثمی فرماتے ہیں : یہ روایت امام طبرانی نے نقل کی ہے ، اس کی سند میں ایک راوی ایسا ہے جس کا نام بیان نہیں کیا گیا ہے ویسے اس کی توثیق کی گئی ہے ، اس روایت کے بقیہ رجال ثقہ ہیں ۔

سیدنا بریدہ رضی اللہ عنہ بیان کرتے ہیں : مجھ تک یہ روایت پہنچی ہے کہ ایک مرتبہ نبی اکرم صلی اللہ علیہ وسلم کے زمانہ اقدس میں سیدنا معاذ بن جبل رضی اللہ عنہ نے شیطان کو پکڑ لیا تھا میں سیدنا معاذ بن جبل رضی اللہ عنہ کے پاس آیا میں نے دریافت کیا مجھ تک
یہ روایت پہنچی ہے کہ آپ نے نبی اکرم صلی اللہ علیہ وسلم کے زمانہ اقدس میں شیطان کو پکڑ لیا تھا انہوں نے جواب دیا : جی ہاں ایک مرتبہ نبی اکرم صلی اللہ علیہ وسلم نے صدقہ کی کھجوریں میرے حوالے کیں میں نے انہیں اپنے گودام میں رکھ لیا میں نے دیکھا کہ ان میں روزانہ کمی ہونے لگی ہے میں نے اس بات کی شکایت نبی اکرم صلی اللہ علیہ وسلم سے کی تو نبی اکرم صلی اللہ علیہ وسلم نے مجھ سے فرمایا : یہ شیطان کا کام ہے تم اس کی گھات میں رہنا سیدنا معاذ رضی اللہ عنہ فرماتے ہیں : رات کے وقت میں اس کی گھات میں رہا جب رات کا ایک حصہ گزر گیا تو وہ ہاتھی کی شکل میں آیا جب وہ دروازے کے پاس پہنچا تو اپنی شکل تبدیل کر کے دروازے میں موجود درز سے اندر داخل ہو گیا وہ کھجوروں کے قریب ہوا اور انہیں ڈالنے لگا میں نے اسے اپنے کپڑے کے ذریعے باندھ دیا اور میں نے کہا: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور سیدنا محمد ( صلی اللہ علیہ وسلم ) اس کے بندے اور اس کے رسول ہیں اے اللہ صلی اللہ علیہ وسلم کے دشمن تم صدقہ کی کھجوروں کے پاس آئے انہیں لے رہے ہو حالانکہ لوگ ان کے بارے میں تم سے زیادہ حق رکھتے ہیں میں تمہیں ضرور نبی اکرم صلی اللہ علیہ وسلم کے سامنے پیش کروں گا اور وہ تمہیں رسوائی کا شکار کریں گے ، تو اس نے مجھ سے یہ عہد کیا کہ وہ دوبارہ ایسا نہیں کرے گا ، پھر میں نبی اکرم صلی اللہ علیہ وسلم کی خدمت میں اگلے دن حاضر ہوا تو نبی اکرم صلی اللہ علیہ وسلم نے مجھ سے دریافت کیا کہ تمہارے قیدی کا کیا بنا ؟ میں نے عرض کی : اس نے مجھ سے یہ طے کیا ہے کہ وہ دوبارہ ایسا نہیں کرے گا نبی اکرم صلی اللہ علیہ وسلم نے فرمایا : وہ دوبارہ ایسا کرے گا ۔ تم اس کی گھات میں رہنا دوسری رات میں اس کی گھات میں رہا پھر اس نے ایسا ہی کیا ، اور میں نے بھی ویسا ہی کیا تو پھر اس نے میرے ساتھ یہ عہد کیا کہ وہ دوبارہ ایسا نہیں کرے گا ، تو میں نے اسے چھوڑ دیا پھر اگلے دن میں نبی اکرم صلی اللہ علیہ وسلم کی خدمت میں حاضر ہوا تاکہ آپ کو اس بارے میں بتاؤں تو وہاں ایک شخص یہ اعلان کر رہا تھا معاذ کہاں ہے ؟ نبی اکرم صلی اللہ علیہ وسلم نے مجھ سے دریافت کیا : اے معاذ تمہارے قیدی کا کیا بنا ؟ میں نے آپ کو اس بارے میں بتایا تو نبی اکرم صلی اللہ علیہ وسلم نے فرمایا : وہ پھر آئے گا ۔ تم اس کی گھات میں رہنا میں تیسری رات اس کی گھات میں رہا اس نے پھر ویسا ہی کیا میں نے بھی ویسا ہی کیا میں نے کہا: اے اللہ کے دشمن تم نے دو مرتبہ مجھ سے پہلے عہد کیا تھا اور اب یہ تیسری مرتبہ ہے اب میں تمہیں ضرور نبی اکرم صلی اللہ علیہ وسلم کی خدمت میں پیش کروں گا اور وہ تمہیں رسوائی کا شکار کریں گے اس نے کہا: میں ایک ایسا شیطان ہوں جو بال بچے دار ہے ، اور میں نصیبین سے تمہارے پاس آیا ہوں ، اگر اس سے پہلے مجھے کوئی چیز مل جاتی تو میں تمہارے پاس نہ آتا پہلے ہم لوگ تمہارے اس شہر میں ہوتے تھے یہاں تک کہ تمہارے آقا کو مبعوث کیا گیا اور جب ان پر دو آیات نازل ہوئیں تو ان دونوں آیات نے ہمیں یہاں سے جلا وطن کر دیا ۔ اور ہم نصیبین چلے گئے یہ دونوں آیات جس بھی گھر میں پڑھی جائیں گی شیطان تین دن تک اس گھر میں داخل نہیں ہو گا اگر تم میرا راستہ چھوڑ دیتے ہو ، تو میں تمہیں ان دو آیات کی تعلیم دے دیتا ہوں میں نے کہا: ٹھیک ہے اس نے کہا: ایک آیت الکرسی ہے ، اور دوسری سورت بقرہ کی آخری آیات ہیں جو آمن الرسول سے لے کر سورت کے آخر تک ہیں ۔ سیدنا معاذ رضی اللہ عنہ فرماتے ہیں : میں نے اسے چھوڑ دیا اگلے دن میں صبح نبی اکرم صلی اللہ علیہ وسلم کی خدمت میں حاضر ہوا تاکہ میں آپ کو اس بارے میں بتاؤں تو وہاں ایک منادی یہ اعلان کر رہا تھا کہ معاذ بن جبل کہاں ہے ؟ جب میں آپ کی خدمت میں حاضر ہوا تو نبی اکرم صلی اللہ علیہ وسلم نے مجھ سے دریافت کیا تمہارے قیدی کا کیا حال ہے ؟ میں نے عرض کی : اس نے مجھ سے یہ عہد کیا ہے کہ اب وہ دوبارہ ایسا نہیں کرے گا اور پھر اس نے جو بات بیان کی تھی میں نے نبی اکرم صلی اللہ علیہ وسلم کو اس بات کے بارے میں بتایا تو نبی اکرم صلی اللہ علیہ وسلم نے ارشاد فرمایا : اس خبیث نے سچ کہا: ہے ویسے وہ جھوٹا ہے ۔ راوی کہتے ہیں : تو اس کے بعد میں ان دونوں آیات کی تلاوت کر لیتا ہوں اور پھر مجھے کبھی ان کھجوروں میں کوئی کمی محسوس نہیں ہوئی ۔
یہ روایت امام طبرانی نے اپنے استاد یحیی بن عثمان بن صالح کے حوالے سے نقل کی ہے ، اور وہ انشاءاللہ صدوق ہو گا جیسا کہ امام ذہبی نے یہ بات بیان کی ہے ابن ابوحاتم کہتے ہیں : محدثین نے اس کے بارے میں کلام کیا ہے اس روایت کے بقیہ رجال کی توثیق کی گئی ہے ۔

مالک بن حمزہ بن ابواسید اپنے والد کے حوالے سے اپنے دادا سیدنا ابواسید ساعدی خزرجی رضی اللہ عنہ کے بارے میں نقل کرتے ہیں مدینہ منورہ میں ان کا ایک کنواں تھا ، جس کا نام بئر بضاعہ تھا اس میں نبی اکرم صلی اللہ علیہ وسلم نے اپنا لعاب دہن ڈالا تھا ، تو وہ نبی اکرم صلی اللہ علیہ وسلم کے لعاب دہن کے حوالے سے خوشخبری حاصل کرتے تھے اور اس سے برکت حاصل کرتے تھے راوی بیان کرتے ہیں : جب سیدنا ابواسید نے اپنے باغ کی کھجوریں اتار لیں تو انہیں ایک گودام میں رکھ دیا تو غول ( یعنی ایک ہوائی چیز ) ان کے گودام میں آ جاتی تھی اور کھجوریں چوری کر لیتی تھی اور انہیں خراب کر رہی تھی انہوں نے اس بات کی شکایت نبی اکرم صلی اللہ علیہ وسلم سے کی تو نبی اکرم صلی اللہ علیہ وسلم نے ارشاد فرمایا : اے ابواسید وہ غول ہے تم اس کی آہٹ غور سے سننا جب تم اس کے آنے کے بارے میں سنو تو تم یہ پڑھنا : اللہ تعالیٰ کے نام سے برکت حاصل کرتے ہوئے ، تم اللہ کے رسول کی بات کا جواب دو ( انہوں نے ایسا ہی کیا ) تو اس غول نے یہ کہا: اے ابواسید تم مجھے اس چیز سے معاف رکھو کہ تم مجھے اس تکلیف کا شکار کرو کہ میں نبی اکرم صلی اللہ علیہ وسلم کے پاس جاؤں میں تمہیں اللہ کے نام پر یہ عہد دیتی ہوں کہ اب دوبارہ تمہارے گھر میں نہیں آؤں گی اور تمہاری کھجوروں کو چوری نہیں کروں گی اور میں ایک آیت کے بارے میں تمہاری رہنمائی کرتی ہوں کہ تم انہیں اپنے گھر میں وہ پڑھ لیا کرو تو ہم ( شیاطین ) تمہارے اہل خانہ کے پاس نہیں آئیں گے اگر تم اسے اپنے برتن پر پڑھ لو گے ، تو ہم اس ڈھانپے ہوئے برتن کو کھول نہیں سکیں گے پھر اس غول نے ان صحابی کے ساتھ یہ عہد کیا جس سے وہ راضی ہو گئے اس غول نے بتایا کہ وہ آیت جس کے بارے میں ، میں نے تمہاری رہنمائی کرنی تھی وہ آیت الکرسی ہے ، اور پھر اس کی پچھلی شرمگاہ سے ہوا خارج ہونے کی آواز آئی جب وہ صحابی نبی اکرم صلی اللہ علیہ وسلم کی خدمت میں حاضر ہوئے اور آپ کو اس بارے میں بتایا تو نبی اکرم صلی اللہ علیہ وسلم نے ارشاد فرمایا : ویسے تو وہ جھوٹی ہے لیکن اس نے یہ بات سچ بیان کی ہے ۔
یہ روایت امام طبرانی نے معجم کبیر میں نقل کی ہے ، اور اس کے تمام رجال کی توثیق کی گئی ہے ، اور اس میں سے بعض راوی ضعیف ہیں ۔

امام شعبی بیان کرتے ہیں : ایک مرتبہ مسروق اور شتیر بن شکل بڑی مسجد میں بیٹھے ہوئے تھے ، لوگوں نے انہیں دیکھا ، تو اٹھ کر ان کی طرف آ گئے ، شتیر نے مسروق سے کہا : یہ لوگ اٹھ کر ہماری طرف اس لئے آئے ہیں تاکہ ہم ان کے سامنے کوئی حدیث بیان کریں ، یا تو آپ بیان کر دیں میں آپ کی بات کی تصدیق کروں گا یا پھر میں بیان کر دیتا ہوں اور آپ میری بات کی تصدیق کر دیں ، تو مسروق نے کہا : آپ بیان کر دیں میں آپ کی بات کی تصدیق کر دوں گا ، تو شتیر نے بیان کیا کہ سیدنا عبداللہ بن مسعود رضی اللہ عنہ نے ہمیں یہ بات بتائی ہے : اللہ کی کتاب میں موجود سب سے عظیم آیت «اللَّهُ لَا إِلَٰهَ إِلَّا هُوَ الْحَيُّ الْقَيُّومُ» ہے ، اور یہ آیت کے آخر تک ہے ، مسروق نے کہا : آپ نے سچ کہا ہے ۔
علامہ ہیثمی فرماتے ہیں : میں یہ کہتا ہوں : یہ مکمل روایت سورت طلاق میں آئے گی ، یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ( ارشاد باری تعالیٰ ہے : ) ” اس کی کرسی آسمانوں اور زمین کو گھیرے ہوئے ہے “ ۔ سیدنا عبداللہ بن عباس رضی اللہ عنہما فرماتے ہیں : اس سے مراد پاؤں رکھنے کی جگہ ہے اس کے عرش کی مقدار کے بارے میں صرف اللہ جانتا ہے ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔