مجمع الزوائد ومنبع الفوائد

جابر نامی راوی بیان کرتے ہیں میں نے سالم بن عبداللہ اور ابان بن عثمان اور زید بن حسن کو یہ بات ذکر کرتے ہوئے سنا کہ سیدنا عثمان غنی رضی اللہ عنہ کے عہد خلافت میں ) ان کے پاس ایک ایسے شخص کو لایا گیا جس نے قریش سے تعلق رکھنے والے ایک لڑکے کے ساتھ بدکاری کی تھی جس کا نسب معروف تھا سیدنا عثمان رضی اللہ عنہ نے فرمایا تمہارا ستیاناس ہو گواہ کہاں ہیں کیا یہ شخص محصن ہے لوگوں نے کہا: اس شخص نے ایک عورت کے ساتھ شادی کی تھی لیکن اس کی رخصتی نہیں کروائی تھی سیدنا علی رضی اللہ عنہ نے سیدنا عثمان رضی اللہ عنہ سے فرمایا اگر تو اس نے اس عورت کی رخصتی کروا لی ہوتی تو پھر اسے سنگسار کرنے کی سزا دی جا سکتی تھی لیکن کیونکہ اس نے اپنی بیوی کی رخصتی نہیں کروائی تو اب آپ اسے حد کے کوڑے لگوا دیں سیدنا ابوایوب انصاری رضی اللہ عنہ نے کہا: میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو وہی بات ارشاد فرماتے ہوئے سنا ہے جو جناب ابوالحسن نے نقل کی ہے تو سیدنا عثمان رضی اللہ عنہ نے اس شخص کے بارے میں حکم دیا تو اسے ایک سو کوڑے لگائے گئے ۔
یہ روایت امام طبرانی نے نقل کی ہے اس کی سند میں ایک راوی جابر جعفی ہے جس نے سماع کی صراحت کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین قسم کے لوگ ہیں جن کی یہ گواہی قبول نہیں ہو گی کہ اللہ تعالیٰ کے علاوہ اور کوئی معبود نہیں ہے ( وہ لوگ یہ ہیں ) سوار ہونے والا مرد اور جس پر سوار ہوا جائے سوار ہونے والی عورت اور جس عورت پر سوار ہوا جائے ( یعنی ہم جنسی کا فعل کرنے والے مرد یا عورتیں ) اور ظالم حکمران “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عمر بن راشد مدنی حارثی ہے اور وہ کذاب ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ نے سات آسمانوں کے اوپر سے اپنی مخلوق میں سے سات قسم کے لوگوں پر لعنت کی ہے اور ان میں سے ایک پر تین مرتبہ لعنت کی ہے حالانکہ ان میں سے ہر ایک کے لئے ایک لعنت ہی کفایت کر جائے اس نے فرمایا ہے وہ شخص ملعون ہے جو قوم لوط کا سا عمل کرتا ہے وہ شخص ملعون ہے جو قوم لوط کا سا عمل کرتا ہے وہ شخص ملعون ہے جو قوم لوط کا سا عمل کرتا ہے وہ شخص ملعون ہے غیر اللہ کے نام پر ذبح کرتا ہے وہ شخص ملعون ہے جو کسی جانور کے ساتھ بدکاری کرتا ہے وہ شخص ملعون ہے جو اپنے ماں باپ کی نافرمانی کرتا ہے وہ شخص ملعون ہے جو عورت اور اس کی بیٹی کو ( صحبت کرنے میں ) جمع کرتا ہے وہ شخص ملعون ہے جو زمین کی حدود کو تبدیل کرتا ہے وہ شخص ملعون ہے جو آزاد کرنے والے اپنے آقا کی بجائے کسی اور کی طرف خود کو منسوب کرتا ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی محرز بن ہارون ہے ایک قول کے مطابق ان کا نام محرر ہے جمہور نے اسے ضعیف قرار دیا ہے امام ترمذی نے اس کی نقل کردہ حدیث کو حسن قرار دیا ہے اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” چار قسم کے لوگ اللہ کے غضب میں صبح کرتے ہیں اور اللہ کی ناراضگی میں شام کرتے ہیں میں نے عرض کی یا رسول اللہ وہ کون لوگ ہیں نبی اکرم صلی اللہ علیہ وسلم نے فرمایا خواتین کے ساتھ مشابہت اختیار کرنے والے مرد مردوں کے ساتھ مشابہت اختیار کرنے والی خواتین وہ شخص جو کسی جانور کے ساتھ بدفعلی کرتا ہے اور وہ شخص جو مرد کے ساتھ بدفعلی کرتا ہے “ ۔
یہ روایت امام طبرانی نے معجم اوسط میں نقل محمد بن سلام خزاعی کے حوالے سے ان کے والد سے نقل کی ہے امام بخاری رحمہ اللہ کہتے ہیں اس کی اس حدیث میں اس کی متابعت نہیں کی گئی ہے ۔