مجمع الزوائد ومنبع الفوائد

سیدنا ابوبکر صدیق رضی اللہ عنہ بیان کرتے ہیں میں نبی اکرم صلی اللہ علیہ وسلم کے پاس بیٹھا ہوا تھا سیدنا مالک بن ماعز رضی اللہ عنہ آیا اس نے آپ کے سامنے ایک مرتبہ اعتراف کیا تو آپ نے اسے واپس کر دیا وہ پھر آیا اس نے آپ کے سامنے دوسری مرتبہ اعتراف کیا تو آپ نے اسے واپس کر دیا وہ پھر آیا اس نے تیسری مرتبہ اعتراف کیا تو آپ نے اسے واپس کر دیا میں نے اس سے کہا: اگر تم نے چوتھی مرتبہ بھی اعتراف کیا تو نبی اکرم صلی اللہ علیہ وسلم تمہیں سنگسار کروا دیں گے سیدنا ابوبکر صدیق رضی اللہ عنہ کہتے ہیں اس نے چوتھی مرتبہ بھی اعتراف کیا تو نبی اکرم صلی اللہ علیہ وسلم نے اسے قید کروا دیا پھر آپ نے اس کے بارے میں تحقیق کی تو لوگوں نے بتایا کہ ہمیں تو صرف بھلائی کا علم ہے تو نبی اکرم صلی اللہ علیہ وسلم نے اسے سنگسار کرنے کا حکم دے دیا ۔
یہ روایت امام أحمد امام ابویعلیٰ اور امام بزار نے نقل کی ہے ان کی روایت کے یہ الفاظ ہیں نبی اکرم صلی اللہ علیہ وسلم نے سیدنا ماعز رضی اللہ عنہ کو چار مرتبہ واپس کیا تھا اور پھر انہیں سنگسار کرنے کا حکم دیا تھا ۔
یہ روایت امام طبرانی نے معجم اوسط میں نقل کی ہے تاہم انہوں نے یہ الفاظ نقل کیے ہیں تین مرتبہ واپس کیا تھا ۔ ان تمام روایات کی سند میں ایک راوی جابر جعفی ہے اور وہ ضعیف ہے ۔

سیدنا ابوذر غفاری رضی اللہ عنہ بیان کرتے ہیں ہم نبی اکرم صلی اللہ علیہ وسلم کے ساتھ سفر کر رہے تھے ایک شخص آپ کے پاس آیا اور بولا: اس بدنصیب نے زنا کا ارتکاب کیا ہے نبی اکرم صلی اللہ علیہ وسلم نے اس سے منہ پھیر لیا پھر اس نے تیسری مرتبہ بھی ایسا کیا چوتھی مرتبہ بھی ایسا کیا تو نبی اکرم صلی اللہ علیہ وسلم سواری سے نیچے اترے ایک مرتبہ راوی نے یہ الفاظ نقل کیے ہیں اس نے نبی اکرم صلی اللہ علیہ وسلم کے سامنے زنا کا اعتراف کیا تو نبی اکرم صلی اللہ علیہ وسلم نے چار مرتبہ اسے واپس کیا پھر آپ سواری سے نیچے اترے آپ نے ہمیں حکم دیا ہم نے اس کے لئے گڑھا کھودا جو زیادہ لمبا نہیں تھا پھر اسے سنگسار کر دیا گیا پھر نبی اکرم صلی اللہ علیہ وسلم روانہ ہوئے تو آپ پریشان اور غمگین تھے ہم چلتے رہے یہاں تک کہ ہم نے ایک جگہ پر پڑاؤ کیا نبی اکرم صلی اللہ علیہ وسلم کی وہ کیفیت ختم ہوئی تو آپ نے مجھ سے فرمایا اے ابوذر کیا تم نے اس شخص کی طرف نہیں دیکھا کہ اس کی مغفرت ہو گئی اور اسے جنت میں داخل کر دیا گیا ۔
یہ روایت امام أحمد اور امام بزار نے نقل کی ہے اس کی سند میں ایک راوی حجاج بن ارطاۃ ہے اور وہ مدلس ہے ۔

سیدنا عبداللہ بن عباس رضی اللہ عنہما بیان کرتے ہیں ایک مرتبہ نبی اکرم صلی اللہ علیہ وسلم جمعہ کے دن لوگوں کو خطبہ دے رہے تھے بنولیث بن بکر بن عبدمناد بن کنانہ سے تعلق رکھنے والا ایک شخص آپ کی خدمت میں حاضر ہوا وہ لوگوں کی گردنیں پھیلانگتا ہوا آپ کے پاس آ گیا اس نے عرض کی : یا رسول اللہ ! مجھ پر حد قائم کیجئے نبی اکرم صلی اللہ علیہ وسلم نے اس سے فرمایا تم بیٹھ جاؤ وہ بیٹھ گیا پھر وہ دوسری مرتبہ کھڑا ہوا تو نبی اکرم صلی اللہ علیہ وسلم نے فرمایا تم بیٹھ جاؤ پھر وہ تیسری مرتبہ کھڑا ہوا تو نبی اکرم صلی اللہ علیہ وسلم نے اس کی مانند ارشاد فرمایا آپ نے دریافت کیا تمہاری حد کیا ہے اس نے بتایا میں نے حرام طور پر ایک عورت کے ساتھ صحبت کی ہے نبی اکرم صلی اللہ علیہ وسلم نے اپنے اصحاب میں سے ایک صاحب سے فرمایا ان اصحاب میں سیدنا علی بن ابوطالب رضی اللہ عنہ سیدنا عباس رضی اللہ عنہ سیدنا زید بن حارثہ رضی اللہ عنہ اور سیدنا عثمان غنی رضی اللہ عنہ سے اسے ساتھ لے جاؤ اور اسے ایک سو کوڑے لگاؤ اس لیثی شخص نے بھی شادی نہیں کی تھی لوگوں نے عرض کی : یا رسول اللہ ! کیا آپ اس عورت کو کوڑے نہیں لگوائیں گے جس کے ساتھ اس نے زنا کیا ہے نبی اکرم صلی اللہ علیہ وسلم نے فرمایا پہلے اسے کوڑے لگا کے میرے پاس لے کے آؤ جب اسے نبی اکرم صلی اللہ علیہ وسلم کے پاس لایا گیا تو نبی اکرم صلی اللہ علیہ وسلم نے دریافت کیا تم نے کس کے ساتھ ایسا کیا تھا اس نے بنو بکر سے تعلق رکھنے والی ایک عورت کا نام لے کے کہا: کہ فلاں عورت کے ساتھ اس عورت کو لایا گیا نبی اکرم صلی اللہ علیہ وسلم نے اس سے دریافت کیا تو اس نے کہا: اللہ کی قسم یہ جھوٹ بول رہا ہے میں اسے نہیں جانتی ہوں اور اس نے جو الزام لگایا ہے میں اس سے لاتعلق ہوں اور میں جو کہہ رہی ہوں اس بات پر گواہ اللہ تعالیٰ ہے نبی اکرم صلی اللہ علیہ وسلم نے ارشاد فرمایا کون شخص اس بات کی گواہی دے گا کہ تم نے اس عورت کے ساتھ زنا کیا ہے یہ تو انکار کر رہی ہے اگر تمہارے پاس گواہ ہیں تو ہم اس عورت کو حد کے طور پر کوڑے لگائیں گے ورنہ ہم تمہیں زنا کا جھوٹا الزام لگانے کی وجہ سے کوڑے لگائیں گے اس نے عرض کی : یا رسول اللہ ! میرے حق میں گواہی کون دے گا تو نبی اکرم صلی اللہ علیہ وسلم نے اس کے بارے میں حکم دیا تو زنا کا الزام لگانے کی حد میں اسی کوڑے لگائے گئے ۔ ( علامہ ہیثمی فرماتے ہیں : ) میں یہ کہتا ہوں
یہ روایت امام ابوداؤد نے اور دیگر حضرات نے اختصار کے ساتھ نقل کی ہے ۔
یہ روایت امام ابویعلیٰ اور امام طبرانی نے نقل کی ہے اس کی سند میں ایک راوی قاسم بن فیاض ہے جسے امام ابوداؤد نے ثقہ قرار دیا ہے یحییٰ بن معین نے اسے ضعیف کہا: ہے اس روایت کے بقیہ رجال ثقہ ہیں ۔

عبدالعزیز بن عبدالله بن عمرو قرشی بیان کرتے ہیں مجھے اس شخص نے یہ بات بتائی ہے جو اس وقت نبی اکرم صلی اللہ علیہ وسلم کے پاس موجود تھے نبی اکرم صلی اللہ علیہ وسلم نے مکہ اور مدینہ کے درمیان ایک شخص کو سنگسار کرنے کا حکم دیا جب اسے پتھر لگے تو وہ بھاگ کھڑا ہوا نبی اکرم صلی اللہ علیہ وسلم کو اس بات کی اطلاع ملی تو آپ نے ( لوگوں سے ) فرمایا تم لوگوں نے اسے چھوڑ کیوں نہیں دیا تھا ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص زنا کا اعتراف کر لے اور پھر سنگسار ہونے کے وقت وہ بھاگ کھڑا ہو تو اسے چھوڑ دیا جائے “ ۔
( علامہ ہیثمی فرماتے ہیں : ) میں یہ کہتا ہوں ان صحابی کے حوالے سے امام ترمذی نے سیدنا ماعز رضی اللہ عنہ کا واقعہ نقل کیا ہے جس میں یہ الفاظ ہیں ” تم لوگوں نے اسے چھوڑ کیوں نہیں دیا “ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں البتہ حمید کندی کا معاملہ مختلف ہے اور وہ ثقہ ہے ۔

سیدنا جابر بن سمرہ رضی اللہ عنہ بیان کرتے ہیں ماعز بن مالک رضی اللہ عنہ نبی اکرم صلی اللہ علیہ وسلم کے پاس آئے انہوں نے عرض کی : یا رسول اللہ ! میں نے زنا کیا ہے نبی اکرم صلی اللہ علیہ وسلم نے منہ پھیر لیا پھر وہ دوسری طرف سے آپ کے پاس آئے تو آپ نے ان سے منہ پھیر لیا پھر وہ تیسری طرف سے آئے تو آپ نے ان کی طرف سے منہ پھیر لیا جب وہ چوتھی مرتبہ آپ کے پاس آئے جب انہوں نے یہ بات کہی تو نبی اکرم صلی اللہ علیہ وسلم نے اپنے اصحاب سے فرمایا اپنے ساتھی کے پاس اٹھ کے جاؤ اگر یہ ٹھیک ہے تو اسے سنگسار کر دو اس کے بارے میں دریافت کیا گیا تو پتہ چلا کہ وہ صحیح ہے ( یعنی پاگل نہیں ہے ) تو اسے سنگسار کر دیا گیا جب اسے پتھر لگے تو وہ بھاگ کھڑا ہوا نبی اکرم صلی اللہ علیہ وسلم کے اصحاب میں سے ایک صاحب اونٹ کی ہڈی لے کے اس کے سامنے آئے وہ انہوں نے اسے ماری تو وہ مر گیا نبی اکرم صلی اللہ علیہ وسلم کے اصحاب نے فرمایا یہ جہنم میں جائے گا نبی اکرم صلی اللہ علیہ وسلم نے ارشاد فرمایا ہرگز نہیں اس نے ایسی توبہ کی ہے کہ اگر ایک پوری امت اتنی توبہ کرتی تو ان کی طرف سے وہ قبول ہو جاتی ۔ ( علامہ ہیثمی فرماتے ہیں : ) میں یہ کہتا ہوں سیدنا سمرہ رضی اللہ عنہ سے منقول حدیث ” صحیح “ میں مذکور ہے لیکن وہ اس طرح آپ کے بغیر ہے ۔
یہ روایت امام بزار نے اپنے استاد صفوان بن مغلظ سے نقل کی ہے میں ان سے واقف نہیں ہوں اس روایت کے بقیہ رجال ثقہ ہیں ۔

سیدنا سہل بن سعد رضی اللہ عنہ بیان کرتے ہیں میں ماعز کے پاس موجود تھا جب نبی اکرم صلی اللہ علیہ وسلم اسے سنگسار کرنے کا حکم دیا تھا وہ بھاگا تو لوگ اس کو پتھر مارتے ہوئے اس کے پیچھے گئے یہاں تک کہ جبابہ کے مقام پر سیدنا عمر رضی اللہ عنہ ان کے سامنے آئے انہوں نے اسے اونٹ کی ہڈی مار کے قتل کر دیا ۔
یہ روایت امام طبرانی نے نقل کی ہے اس کی سند میں ایک راوی ابوبکر بن ابوسبرہ ہے اور وہ کذاب ہے ۔

سیدنا ابوبرزه رضی اللہ عنہ بیان کرتے ہیں نبی اکرم صلی اللہ علیہ وسلم نے سیدنا ماعز بن مالک رضی اللہ عنہ کو سنگسار کروا دیا تھا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں ایک عورت نبی اکرم صلی اللہ علیہ وسلم کی خدمت میں حاضر ہوئی اس نے عرض کی : یا رسول اللہ ! میں حاملہ ہوں آپ مجھ پر حد جاری کیجئے نبی اکرم صلی اللہ علیہ وسلم نے فرمایا تمہارے پیٹ میں جو ہے ہم اسے قتل نہیں کریں گے وہ عورت چلی گئی جب اس نے بچے کو جنم دے دیا تو وہ آئی اس نے عرض کی میں نے بچے کو جنم دے دیا ہے نبی اکرم صلی اللہ علیہ وسلم نے فرمایا تم جاؤ اور اسے دودھ پلاؤ جب تک تم اس کا دودھ نہیں چھڑاتی ہو ( تمہیں سزا نہیں ملے گی ) پھر اس نے جب اس بچے کا دودھ چھڑا دیا تو وہ آئی اس نے عرض کی : یا رسول اللہ ! میں نے اس کا دودھ چھڑوا دیا ہے نبی اکرم صلی اللہ علیہ وسلم نے فرمایا تم جاؤ اور اس کا کفیل لے کے آؤ ( جو اس کی دیکھ بھال کرے ) وہ چلی گئی پھر وہ عورت اور اس کی بہن چلتی ہوئی آئیں نبی اکرم صلی اللہ علیہ وسلم کو اس عورت کا صبر پسند آیا پھر نبی اکرم صلی اللہ علیہ وسلم نے اسے سنگسار کرنے کا حکم دیا پر نبی اکرم صلی اللہ علیہ وسلم نے ایک شخص سے فرمایا تم جاؤ جب اس عورت کو گڑھے میں رکھا جائے تو تم اس کے سامنے کھڑے ہو جانا یہاں تک کہ تم اس کی آنکھوں کے بلکل سامنے آ جانا پھر آپ نے ایک اور شخص کو حکم دیا اور فرمایا تم جاؤ ایک بڑا پتھر لو اور پیچھے کی طرف سے اس عورت کے پاس آنا اور اس کو مار کر اسے توڑ دینا ( یعنی قتل کر دینا ) ۔
یہ روایت امام طبرانی نے معجم اوسط میں نقل کی ہے اس کی سند میں ایک ایسا راوی ہے جس سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں ایک عورت نبی اکرم صلی اللہ علیہ وسلم کے پاس آئی اس نے عرض کی اس نے زنا کا ارتکاب کیا ہے وہ عورت حاملہ تھی نبی اکرم صلی اللہ علیہ وسلم نے فرمایا تم جاؤ اور پہلے حمل کو جنم دو وہ عورت نہیں آئی تو نبی اکرم صلی اللہ علیہ وسلم نے اسے پیغام بھیج کے نہیں بلوایا پھر اس عورت نے اپنے حمل کو جنم دیا پھر وہ آپ کے پاس آئی تو نبی اکرم صلی اللہ علیہ وسلم نے فرمایا تم جاؤ جب تک تم اپنے بچے کا دودھ نہیں چھڑاتی ہو پھر وہ عورت آپ کے پاس آئی اگر وہ آپ کے پاس نہ آتی تو آپ نے اسے پیغام بھیج کے بلوانا نہیں تھا دودھ چھڑانے کے بعد وہ آپ کے پاس آئی تو آپ نے اسے سنگسار کروا دیا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حارث بن نبہان ہے اور وہ متروک ہے ۔

سیدنا انس رضی اللہ عنہ بیان کرتے ہیں ایک عورت نبی اکرم صلی اللہ علیہ وسلم کے پاس آئی اس نے زنا کا اعتراف کیا وہ عورت حاملہ تھی نبی اکرم صلی اللہ علیہ وسلم نے اس کے معاملے کو مؤخر کر دیا جب تک وہ بچے کو جنم نہیں دیتی پھر آپ نے اس کے بارے میں حکم دیا اس کے کپڑے اس کے جسم پر باندھ دیے گئے پھر آپ نے اسے سنگسار کرنے کا حکم دیا پھر آپ نے اس کی نماز جنازہ پڑھائی ایک صاحب نے آپ کی خدمت میں عرض کی آپ اس کی نماز جنازہ پڑھا رہے ہیں جبکہ اس نے زنا کا ارتکاب کیا ہے اور آپ نے اسے سنگسار بھی کروایا ہے نبی اکرم صلی اللہ علیہ وسلم نے ارشاد فرمایا : ” اس نے ایسی توبہ کی ہے کہ اگر اہل مدینہ کے ستر افراد نے اگر ایسی توبہ کی ہوتی تو وہ ان کی طرف سے بھی قبول ہو جاتی ہے کیا تمہیں اس سے زیادہ فضیلت والا کوئی فرد ملتا ہے کہ اس نے اپنی جان قربان کر دی ہے “ ۔
یہ روایت امام طبرانی نے معجم صغیر اور معجم اوسط میں اپنے استاد علی بن أحمد بن نضر کے حوالے سے نقل کی ہے امام دارقطنی رحمہ اللہ نے اسے ضعیف قرار دیا ہے أحمد بن کامل قاضی کہتے ہیں میرے علم کے مطابق اسے حدیث میں قابل مذمت قرار نہیں دیا گیا اس روایت کے بقیہ رجال صحیح کے رجال ہیں ۔

سیدنا ابوذر غفاری رضی اللہ عنہ بیان کرتے ہیں نبی اکرم صلی اللہ علیہ وسلم نے ایک عورت کو سنگسار کروایا آپ نے مجھے حکم دیا کہ میں اس کے لئے گڑھا کھودوں تو میں نے اپنی ناف تک اس کے لئے گڑھا کھود دیا ۔
یہ روایت امام أحمد نے نقل کی ہے اس کی سند میں ایک راوی جابر جعفی ہے اور وہ ضعیف ہے ۔