مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” وہ تینوں میں سب سے برا ہے جبکہ وہ اپنے ماں باپ کا سا عمل کرے “ نبی اکرم صلی اللہ علیہ وسلم کی مراد زنا کے نتیجے میں پیدا ہونے والا بچہ تھا ۔
یہ روایت امام أحمد نے اسود بن عامر کے حوالے سے ابراہیم بن اسحاق کے اسحاق نامی راوی سے میں واقف نہیں ہوں اس روایت کے بقیہ رجال صیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” زنا کے نتیجے میں پیدا ہونے والا بچہ تینوں میں سب سے برا ہے جب وہ اپنے ماں باپ کا سا عمل کرے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی محمد بن ابولیلی ہے ، اور وہ خراب حافظے کا مالک ہے ، اور ایک راوی مندل ہے اس کی توثیق کی گئی ہے ، اور اس میں ضعف پایا جاتا ہے ۔

نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہ بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت اس وقت تک بھلائی پر گامزن رہے گی جب تک ان کے درمیان زنا کے نتیجے میں پیدا ہونے والے بچے نہیں پھیل جائیں گے جب ان کے درمیان زنا کے نتیجے میں پیدا ہونے والے بچے پھیل جائیں گے ، تو عنقریب اللہ تعالیٰ ان سب کو عمومی عذاب دے گا “ ۔
یہ روایت امام أحمد امام ابویعلیٰ اور امام طبرانی نے نقل کی ہے ۔ انہوں نے یہ الفاظ نقل کیے ہیں : ” میری امت مسلسل بھلائی پر گامزن رہے گی اور وہ اپنے معاملے کو تھام کے رکھے گی جب تک ( ان کے درمیان زنا کرنے والے بچے ) ظاہر نہیں ہوں گے “ ۔ اس روایت کی سند میں ایک راوی محمد بن عبدالرحمن بن لبیبہ ہے ۔ جسے ابن حبان نے ثقہ قرار دیا ہے ، اور یحیی بن معین نے اسے ضعیف قرار دیا ہے ایک راوی محمد بن اسحاق ہے ، جس نے سماع کی صراحت کی ہے ، تو یہ حدیث صحیح یا حسن ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ( والدین کا ) نافرمان شخص ، باقاعدگی سے شراب پینے والا شخص ، احسان جتانے والا شخص اور زنا کے نتیجے میں پیدا ہونے والا بچہ جنت میں داخل نہیں ہوں گے ۔
( علامہ ہیثمی فرماتے ہیں : ) میں یہ کہتا ہوں :
یہ روایت امام نسائی رحمہ اللہ نے نقل کی ہے ، تاہم انہوں نے یہ الفاظ نقل نہیں کیے : ” زنا کے نتیجے میں پیدا ہونے والا بچہ “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی جابان ہے ۔ جسے ابن حبان نے ثقہ قرار دیا ہے ۔ امام أحمد کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” زنا کے نتیجے میں پیدا ہونے والا بچہ اور اس کی نسل میں سے سات پشتوں تک کوئی جنت میں داخل نہیں ہو گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسین بن ادریس ہے ، اور وہ ضعیف ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” زنا کے نتیجے میں پیدا ہونے والے بچے پر اس کے ماں باپ کے گناہوں میں سے کوئی چیز لاگو نہیں ہو گی “ ۔ پھر انہوں نے یہ آیت تلاوت کی : ” کوئی بوجھ اٹھانے والا کسی دوسرے کا بوجھ نہیں اٹھائے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جعفر بن محمد بن جعفر مدائنی ہے ، اور میں اس سے واقف نہیں ہوں ۔

ابوولید قرشی بیان کرتے ہیں : میں بلال بن ابوبردہ کے پاس موجود تھا عبدالقیس قبیلے سے تعلق رکھنے والا ایک شخص ان کے پاس آیا اور بولا: اللہ تعالیٰ امیر کو ٹھیک رکھے طف کے رہنے والے لوگ اپنے اموال کی زکوۃ ادا نہیں کرتے ہیں انہوں نے فرمایا : پھر کیا ہوا اس نے کہا: آپ یہ بات جانتے ہیں میں نے تو امیر کو اطلاع دی ہے ۔ انہوں نے کہا: تمہارا تعلق کہاں سے ہے ؟ اُس نے کہا: عبدالقیس قبیلے سے انہوں نے دریافت کیا : تمہارا نام کیا ہے اس نے بتایا : فلاں بن فلاں ہے ، تو بلال بن ابوبردہ نے اس کے علاقے کے کوتوال کو خط لکھا ، اور فرمایا : تم عبدالقیس قبیلے کی طرف کسی کو بھیج کر ان سے فلاں بن فلاں کے بارے میں دریافت کرو کہ ان کے درمیان اُس کا حسب کیسا ہے قاصد واپس آیا تو اس نے بتایا : میں نے یہ چیز پائی کہ اس شخص کے حسب پر نکتہ چینی کی جاتی ہے ، تو انہوں نے فرمایا : اللہ اکبر ! میرے والد نے میرے دادا سیدنا ابوموسیٰ اشعری رضی اللہ عنہ کے حوالے سے مجھے یہ حدیث بیان کی ہے ؟ نبی اکرم صلی اللہ علیہ وسلم نے ارشاد فرمایا : ” لوگوں کے خلاف ( پوشیدہ امور ) کی تلاش صرف وہ کرے گا ، جو زنا کے نتیجے میں پیدا ہوا ہو یا جس میں اس کا کچھ اثر ہو “ ۔ ابوالولید نامی راوی نے لا یبغی کی جگہ لفظ لا یعسی ( یعنی کوشش کرے گا ) کا لفظ نقل کیا ہے ۔
یہ روایت امام طبرانی نے نقل کی ہے ولید قرشی نامی راوی سے میں واقف نہیں ہوں اس روایت کے بقیہ رجال ثقہ ہیں ۔