مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : ایک صاحب جو انتہائی کمزور تھے وہ ام سعد کے گھر کے پاس رہتے تھے وہاں ایک عورت کا حمل ظاہر ہوا اس سے اس کے بارے میں دریافت کیا گیا تو اس نے بتایا : یہ اس کمزور شخص سے ہے اس شخص سے اس بارے میں دریافت کیا گیا تو اس نے گناہ کا اعتراف کر لیا تو نبی اکرم صلی اللہ علیہ وسلم کے حکم کے تحت اسے کھجور کی شاخوں کے ذریعے اسے سزا دی گئی ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک شخص کو لایا گیا جس نے زنا کا ارتکاب کیا تھا ۔ نبی اکرم صلی اللہ علیہ وسلم نے اس سے دریافت کیا : تو اس نے اعتراف کر لیا ۔ نبی اکرم صلی اللہ علیہ وسلم کے حکم کے تحت اس کے اوپری کپڑے اتارے گئے تو وہ انتہائی کمزور شخص تھا ۔ نبی اکرم صلی اللہ علیہ وسلم نے فرمایا : اگر اسے ضرب لگائی گئی ، تو یہ زندہ نہیں رہے گا ، پھر نبی اکرم صلی اللہ علیہ وسلم نے شاخ منگوائی جس میں ایک سو شاخیں تھیں اور ان کے ذریعے اسے ایک مرتبہ ضرب لگا دی ۔
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا سہل بن سعد ساعدی رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک بوڑھے کو لایا گیا جسے پیٹ کی خرابی کی شکایت تھی اور اس کا رنگ زرد ہو چکا تھا اس کی رگیں ظاہر ہو چکی تھیں اس نے ایک عورت کے ساتھ زنا کیا تھا ۔ نبی اکرم صلی اللہ علیہ وسلم نے اسے شاخ ماری ، جس میں ایک سو تنکے تھے ۔
( علامہ ہیثمی فرماتے ہیں : ) میں یہ کہتا ہوں :یہ روایت امام نسائی رحمہ اللہ نے اختصار کے ساتھ نقل کی ہے ۔
یہ روایت امام طبرانی نے نقل کی ہے ۔ اس کی سند میں ایک راوی ابوبکر بن ابوسبرہ ہے ، اور وہ متروک ہے ۔