مجمع الزوائد ومنبع الفوائد

عروہ نے ” بئر معونہ “ کے دن جام شہادت نوش کرنے والے صحابہ کرام کے اسماء بیان کیے ہیں ( جو یہ ہیں : ) سیدنا اوس بن معاذ انصاری رضی اللہ عنہ ، سیدنا حکم بن کیسان مخزومی رضی اللہ عنہ ، سیدنا حارث بن صمہ رضی اللہ عنہ ، سیدنا سہل بن عامر بن سعد بن عمرو بن ثقیف انصاری رضی اللہ عنہ قریش کی شاخ بنوتیم بن مرہ سے تعلق رکھنے والے سیدنا عامر بن فہیرہ رضی اللہ عنہ ۔ اس روایت کی سند میں ایک راوی ابن لہیعہ ہے ، اس کی نقل کردہ حدیث حسن ہے ، جبکہ اُس کی متابعت کی گئی ہے اور اس راوی میں ضعف پایا جاتا ہے ۔

ابن شہاب زہری نے ” بئر معونہ “ کے دن ، جام شہادت کرنے والے مسلمانوں کے ناموں میں ، سیدنا حارث بن صمہ رضی اللہ عنہ کا ذکر کیا ہے ۔ اس روایت کے رجال صحیح کے رجال ہیں ۔

محمد بن اسحاق نے ” بئر معونہ “ کے دن جام شہادت نوش کرنے والے صحابہ کرام کے اسماء میں ، سیدنا نافع بن یزید بن ورقاء خزاعی رضی اللہ عنہ کا ذکر کیا ہے ۔

سیدنا عبداللہ بن مسعود رضی اللہ عنہ فرماتے ہیں : تم گواہیاں دینے سے بچو ! اگر تم نے ضرور ایسا کرنا ہو ، تو اس مہم کے حق میں گواہی دو ، جن لوگوں کو اللہ کے رسول صلی اللہ علیہ وسلم نے بھیجا تھا ، اور پھر انہیں شہادت نصیب ہوئی ، اُن کے بارے میں قرآن نازل ہوا : ” ( انہوں نے کہا: ) تم ہماری طرف سے ہماری قوم کو یہ پیغام پہنچا دو ! کہ ہم اپنے پروردگار کی بارگاہ میں حاضر ہو چکے ہیں ، وہ ہم سے راضی ہے ، اور اس نے ہمیں راضی کر دیا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔