مجمع الزوائد ومنبع الفوائد

سیدنا سہل بن سعد رضی اللہ عنہ بیان کرتے ہیں : عامر بن طفیل ، نبی اکرم صلی اللہ علیہ وسلم کی خدمت میں مدینہ منورہ حاضر ہوا ، اس نے نبی اکرم صلی اللہ علیہ وسلم کے ساتھ بات کرتے ہوئے تکرار کی ، تو اس کی آواز بلند ہو گئی ، سیدنا ثابت بن قیس رضی اللہ عنہ اپنی تلوار پکڑے ہوئے ، نبی اکرم صلی اللہ علیہ وسلم کے سرہانے کھڑے تھے ، انہوں نے فرمایا : اے عامر ! تم اپنی آواز کو نبی اکرم صلی اللہ علیہ وسلم کے مقابلے میں پست رکھو ! اُس نے کہا: تمہارا اس کے ساتھ کیا واسطہ ہے ؟ سیدنا ثابت رضی اللہ عنہ نے فرمایا : اس ذات کی قسم ! جس نے انہیں عزت عطا کی ہے ، اگر اللہ کے رسول صلی اللہ علیہ وسلم کو یہ بات ناپسند نہ ہوتی ، تو میں نے اس تلوار کے ذریعے تمہارا سر اُڑا دینا تھا ، عامر جو بیٹھا ہوا تھا ، اُس نے ان کی طرف دیکھا ، ثابت کھڑے ہوئے تھے اس نے کہا: اللہ کی قسم ! اے ثابت ! اگر تم اپنے آپ کو میرے لئے پیش کر دیتے ، تو تم نے مجھ سے ضرور منہ موڑ لینا تھا ، تو سیدنا ثابت رضی اللہ عنہ نے کہا: اللہ کی قسم ! اے عامر ! اگر تم اپنے آپ کو میری زبان کے لئے پیش کرتے ، تو تم نے میری زندگی کو ناپسند کرنا تھا ، اسی دوران عامر بن طفیل کے بھتیجے کو چھینک آ گئی ، اس نے اللہ تعالیٰ کی حمد بیان کی ، تو نبی اکرم صلی اللہ علیہ وسلم نے اُسے چھینک کا جواب دیا ، پھر عامر بن طفیل کو چھینک آئی ، تو اس نے اللہ تعالیٰ کی حمد بیان نہیں کی ، تو نبی اکرم صلی اللہ علیہ وسلم نے اُسے جواب نہیں دیا ، عامر نے کہا: آپ نے اس لڑکے کو جواب دیا ہے اور مجھے نہیں دیا ؟ تو نبی اکرم صلی اللہ علیہ وسلم نے ارشاد فرمایا : اس نے اللہ تعالیٰ کی حمد بیان کی تھی ، اس نے کہا: پھر اسی کی ذات کی قسم ہے ، میں آپ کے خلاف گھڑ سواروں اور پیدل لوگوں کو جمع کر دوں گا ۔ نبی اکرم صلی اللہ علیہ وسلم نے فرمایا : تمہارے مقابلے میں اللہ تعالیٰ میری کفایت کر لے گا ، اور قیلہ کے دو بیٹے کفایت کریں گے ، پھر عامر وہاں سے نکلا ، اس نے نبی اکرم صلی اللہ علیہ وسلم کے لئے لوگوں کو اکٹھا کرنا شروع کیا ، تو بنوسلیم کی تین شاخوں کے لوگ اس کے ساتھ مل گئے ، یہ وہ لوگ تھے ، جن کے خلاف نبی اکرم صلی اللہ علیہ وسلم صبح کی نماز میں دعائے ضرر کرتے رہے تھے ، آپ یہ کہتے تھے : اے اللہ ! لحیان ، رعل اور ذکوان قبیلے پر لعنت فرما ! اور عصیہ قبیلے نے اللہ اور اس کے رسول کی نافرمانی کی ہے ، اللہ تعالیٰ سب سے بڑا ہے ، نبی اکرم صلی اللہ علیہ وسلم سترہ دن تک یہ دعا کرتے رہے ، جب آپ نے یہ بات سنی کہ عامر نے آپ کے خلاف لوگوں کو جمع کر لیا ہے ، تو نبی اکرم صلی اللہ علیہ وسلم نے دس افراد کو بھیجا ، جن میں ایک سیدنا عمرو بن امیہ ضمری رضی اللہ عنہ تھے ، ان سب کا تعلق انصار سے تھا ، اور ان کے امیر سیدنا منذر بن عمرو رضی اللہ عنہ تھے ، یہ لوگ روانہ ہوئے ، یہاں تک کہ انہوں نے بئر معونہ کے پاس پڑاؤ کیا ، تو دشمن آگے آیا اور ان لوگوں کو گھیر لیا اور ان سب کو قتل کر دیا ، ان سب میں سے صرف سیدنا عمرو بن امیہ رضی اللہ عنہ ان سے بچ پائے ، وہ سواروں کے درمیان تھے ( یا سواریوں کے درمیان تھے ) اللہ تعالیٰ نے اپنے نبی صلی اللہ علیہ وسلم کی طرف اُسی دن یہ وحی کی ، جس دن آپ کے اصحاب میں سے بہترین لوگ شہید ہو گئے تھے ، نبی اکرم صلی اللہ علیہ وسلم نے ارشاد فرمایا : تمہارے ساتھی شہید ہو گئے ہیں ، تو تم دیکھو کہ تمہاری کیا رائے ہے ؟ پھر نبی اکرم صلی اللہ علیہ وسلم نے عامر بن طفیل کے خلاف دعائے ضرر کی ، نبی اکرم صلی اللہ علیہ وسلم نے کہا: اے اللہ ! عامر کے حوالے سے میرے لئے کفایت کر جا ! تو اللہ تعالیٰ نے اس کے حوالے سے آپ کی کفایت کی ، وہ شخص آیا اپنے صحن میں اترا ، تو اللہ تعالیٰ نے اس کے حلق میں ” ذبحہ “ ( نامی پھوڑے ) کی بیماری لاحق کر دی ، وہ سلول سے تعلق رکھنے والی عورت کے گھر میں تھا ، اس کے زخم سے خون بہنے لگا ، اور وہ یہ کہہ رہا تھا : اے آل عامر ! اونٹ کے غدہ کی طرح غدہ ہے ، جو سلولیہ کے گھر میں ہے ، وہ اس بات سے منہ موڑنا چاہ رہا تھا کہ وہ اس عورت کے گھر میں مرے ، لیکن وہ مسلسل وہیں رہا ، یہاں تک کہ اُس عورت کے گھر میں مر گیا ، اربد بن قیس نامی شخص پر آسمانی بجلی گری اور وہ جل گیا اور مر گیا ، تو ان لوگوں کے ساتھ جتنے بھی لوگ تھے ، وہ سب واپس چلے گئے ۔
یہ روایت امام طبرانی نے نقل کی ہے ، اس کی سند میں ایک راوی عبدالمہیمن بن عباس ہے اور وہ ضعیف ہے ۔

سیدنا انس رضی اللہ عنہ بیان کرتے ہیں : جب نبی اکرم صلی اللہ علیہ وسلم نے اُن کے ماموں سیدنا حرام رضی اللہ عنہ کو ، جو سیدہ ام سلیم رضی اللہ عنہا کے بھائی ہیں ، انہیں ستر افراد کے ہمراہ بھیجا ، جو بعد میں ” بئر معونہ “ کے پاس شہید کر دیے گئے تھے ، اُن دنوں مشرکین کا سردار عامر بن طفیل تھا ، وہ نبی اکرم صلی اللہ علیہ وسلم کے پاس آیا اور بولا: میرے لئے تین میں سے کوئی ایک چیز طے کر دیں ، شہری علاقے کے لوگ آپ کے ساتھ ہوں گے دیہاتوں کے لوگ میرے پاس رہیں گے ، یا پھر یہ ہے کہ میں آپ کے بعد خلیفہ بن جاؤں گا ، ورنہ پھر میں غطفان قبیلے کے دو ہزار جانوروں ( سمیت لوگوں ) کے ہمراہ آپ کے ساتھ جنگ کروں گا ۔ راوی کہتے ہیں : بنو فلاں سے تعلق رکھنے والی عورت کے گھر میں اسے بیماری لاحق ہوئی ، اس نے کہا: یہ تو اونٹ کے غدہ کی طرح کا غدہ ہے ، جو فلاں قبیلے سے تعلق رکھنے والی عورت کے گھر میں ہے ، تم میرا گھوڑا میرے پاس لے کے آؤ ! وہ اُس کے پاس لایا گیا ، وہ اس پر سوار ہوا ، پھر وہ اس کی پشت پر موجود رہتے ہوئے مر گیا ۔ سیدہ ام سلیم رضی اللہ عنہا کے بھائی سیدنا حرام رضی اللہ عنہ گئے ، اُن کے ساتھ دو آدمی تھے ، ایک کا تعلق بنوامیہ سے تھا ، اور ایک شخص لنگڑا تھا ۔ انہوں نے ان لوگوں سے کہا: تم میرے قریب رہنا ، جب تک کہ میں تمہارے پاس نہیں آ جاتا ، اگر تو مجھے ان لوگوں نے امان دے دی تو ٹھیک ہے ، ورنہ تم لوگ میرے قریب ہو گے ، اگر وہ لوگ مجھے قتل کر دیتے ہیں ، تو تم اپنے ساتھیوں کو اس بارے میں اطلاع دے دینا ، پھر سیدنا حرام رضی اللہ عنہ ان لوگوں کے پاس گئے ، اور فرمایا : کیا تم مجھے اس بارے میں امان دیتے ہو کہ میں اللہ کے رسول صلی اللہ علیہ وسلم کے ، تمہاری طرف پیغام کی تم تک تبلیغ کروں ؟ انہوں نے کہا: ٹھیک ہے ! پھر وہ ان کے ساتھ بات چیت کرنے لگے ، انہوں نے اپنے میں سے ایک شخص کو اشارہ کیا ، وہ اُن کے پیچھے سے آیا ، اُس نے انہیں نیزہ مارا ، یہاں تک کہ وہ نیزہ اُن کے اندر سرایت کر گیا ، تو انہوں نے فرمایا : اللہ اکبر ! رب کعبہ کی قسم ! میں کامیاب ہو گیا ۔ راوی کہتے ہیں : پھر اُن لوگوں نے ان سب کو قتل کر دیا ، صرف لنگڑے شخص کو قتل نہیں کیا ، کیونکہ وہ پہاڑ کی چوٹی پر موجود تھا اس کے بعد راوی نے پوری حدیث ذکر کی ہے ۔

ایک روایت میں یہ الفاظ ہیں : ہمام نامی راوی بیان کرتے ہیں : میرا خیال ہے ، روایت میں انہوں نے یہ بات ذکر کی ہے کہ اس لنگڑے کے ساتھ ایک اور شخص بھی اس پہاڑ پر موجود تھا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا کعب بن مالک رضی اللہ عنہ بیان کرتے ہیں : ” ملاعب الاسنہ “ تحفہ لے کر نبی اکرم صلی اللہ علیہ وسلم کے پاس آیا ، نبی اکرم صلی اللہ علیہ وسلم نے اسے اسلام کی پیشکش کی ، تو اس نے اسلام قبول کرنے سے انکار کر دیا ، نبی اکرم صلی اللہ علیہ وسلم نے ارشاد فرمایا : میں کسی مشرک کا تحفہ قبول نہیں کرتا ہوں ، اس نے کہا: پھر آپ اہل نجد کی طرف جسے چاہیں بھیج دیں ، میں ان لوگوں کو پناہ دیتا ہوں ، نبی اکرم صلی اللہ علیہ وسلم نے کچھ لوگوں کو ان کی طرف بھیجا ، جن میں سے ایک سیدنا منذر بن عمرو رضی اللہ عنہ تھے ، یہ وہ صاحب ہیں ، جنہیں ” معتق لیموت “ کہا: جاتا ہے یا ” اعتق عندالموت “ کہا: جاتا ہے ، تو عامر بن طفیل نے ان حضرات کے خلاف بنو عامر کو اکٹھا کرنا چاہا ، ان لوگوں نے اس کی اطاعت کرنے سے انکار کر دیا اور اس بات سے انکار کر دیا کہ وہ ” ملاعب الاسنہ “ کی دی ہوئی پناہ کی خلاف ورزی کریں ، عامر نے ان لوگوں ( یعنی صحابہ کرام ) کے خلاف بنو سلیم کو اکٹھا ہونے کے لئے کہا: ، تو انہوں نے اس کی بات مان لی ، وہ تقریباً ایک سو تیر انداز مل کر اس کے پیچھے آ گئے ، وہ ان حضرات تک ” بئر معونہ “ کے پاس پہنچ گئے ، اور انہیں قتل کر دیا ، صرف سیدنا عمرو بن امیہ رضی اللہ عنہ بچ گئے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبدالرحمن بن کعب بن مالک رضی اللہ عنہ اور دیگر حضرات کے حوالے سے یہ بات منقول ہے : ” عامر بن مالک ، وہ شخص ہے ، جسے ” ملاعب الاسنہ “ کہا: جاتا ہے ، وہ نبی اکرم صلی اللہ علیہ وسلم کی خدمت میں حاضر ہوا ، وہ شخص اس وقت مشرک تھا ، نبی اکرم صلی اللہ علیہ وسلم نے اُسے اسلام کی پیشکش کی ، نبی اکرم صلی اللہ علیہ وسلم نے ارشاد فرمایا : میں کسی مشرک کا تحفہ قبول نہیں کرتا ہوں ، تو عامر بن مالک نے کہا: یا رسول اللہ ! آپ اپنے پیغام رساں ( یا مبلغین ) افراد میں سے جسے چاہیں بھیج دیں ، میں اُنہیں پناہ دیتا ہوں ، نبی اکرم صلی اللہ علیہ وسلم نے کچھ افراد کو بھیجا ، جن میں سے ایک سیدنا منذر بن عمرو ساعدی رضی اللہ عنہ تھے ، یہ وہ صاحب ہیں ، جنہیں ” اعتق لیموت “ کہا: جاتا ہے ، انہیں اہل نجد میں جاسوسی کے لئے بھیجا گیا تھا ، عامر بن طفیل کو ان کے بارے میں پتہ چل گیا ، اس نے بنوسلیم سے تعلق رکھنے والے افراد کو اپنے ساتھ چلنے کے لئے کہا: ، تو وہ لوگ اُس کے ساتھ روانہ ہوئے ، ان لوگوں نے ان صحابہ کرام کو ” بئر معونہ “ کے پاس قتل کر دیا ، صرف سیدنا عمرو بن امیہ ضمری رضی اللہ عنہ بچ گئے ، عامر بن طفیل نے انہیں پکڑ لیا اور پھر انہیں چھوڑ دیا ، ان لوگوں کے درمیان میں سے صرف وہ نبی اکرم صلی اللہ علیہ وسلم کی خدمت میں حاضر ہوئے ، اُن لوگوں میں ایک سیدنا عامر بن فہیرہ رضی اللہ عنہ بھی تھے “ ۔ راوی بیان کرتے ہیں : عروہ نے میرے سامنے یہ بات بیان کی ہے : وہ اُسی دن قتل ہو گئے تھے لیکن دفن کے وقت انہیں ان کا جسم نہیں ملا ، عروہ کہتے ہیں : لوگوں کا یہ خیال تھا کہ فرشتوں نے انہیں دفن کیا تھا ، تو سیدنا حسان بن ثابت رضی اللہ عنہ نے عامر بن طفیل پر طنز کرتے ہوئے یہ اشعار کہے : ” بیٹوں کی ماں کے بیٹو ! تم اہل نجد کے نمایاں حیثیت کے افراد ہو ، کیا یہ چیز تمہیں پریشان نہیں کرتی ، کہ عامر نے ابوبراء کے سامنے تکبر کا مظاہرہ کیا ہے ، کہ اس کی دی ہوئی پناہ کی خلاف ورزی کی ہے ، اور خطاء ، عمد کی طرح نہیں ہوتی “ ۔ پھر ربیعہ بن عامر بن مالک نے عامر بن طفیل کے عہد کی خلاف ورزی کرنے پر طعن کیا ، اور عامر بن مالک کے زانوں پر ہتھیار مارا ، جو اس میں سرایت کر گیا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عروہ بن زبیر بیان کرتے ہیں : پھر سیدنا منذر بن عمرو رضی اللہ عنہ والا غزوہ ہوا ، جن کا تعلق بنو ساعدہ سے تھا ، اور وہ ” بئر معونہ “ کی طرف گئے تھے ، نبی اکرم صلی اللہ علیہ وسلم نے ان کے ہمراہ ” مطلب سلمی “ کو بھیجا تھا ، تاکہ وہ راستے کے بارے میں ان کی رہنمائی کرے ، پھر اللہ کے دشمنوں نے عامر بن طفیل کو پیغام بھیجا اور اس سے مدد مانگی ، تو اس نے مسلمانوں کے خلاف اُن کی مدد کی ، اس نے سیدنا منذر بن عمرو رضی اللہ عنہ اور ان کے ساتھیوں کو قتل کروا دیا ، صرف سیدنا عمرو بن امیہ ضمری رضی اللہ عنہ بچ گئے ، ان لوگوں نے انہیں قید کر لیا ، انہیں ان سے حیاء آئی وہ لوگ انہیں لے کر مکہ آ گئے ، یہی وہ صاحب ہیں ، جنہوں نے سیدنا خبیب بن عدی رضی اللہ عنہ کو دفن کیا تھا ” بئر معونہ “ کے دن مشرکین نے عروہ بن صلت کو پیشکش کی کہ وہ انہیں امان دیدیتے ہیں ، لیکن انہوں نے یہ نہیں مانا ، تو ان لوگوں نے انہیں بھی قتل کر دیا ، ہمارے سامنے یہ بات ذکر کی گئی ہے کہ ” بئر معونہ “ کے دن جب دشمن نے ان لوگوں کو گھیر لیا تھا ، تو انہوں نے یہ کہا: اے اللہ ! ہمیں ایسا کوئی شخص نہیں ملتا ، جو ہمارے بارے میں تیرے رسول صلی اللہ علیہ وسلم تک پیغام پہنچائے ، تیرے علاوہ اور کوئی ایسا نہیں ہے ، اے اللہ ! تو ہماری طرف سے انہیں سلام پہنچا دینا اور انہیں ہماری صورت حال کے بارے میں بتا دینا “ ۔
یہ روایت امام طبرانی نے نقل کی ہے ، اس کی سند میں ایک راوی ابن لہیعہ ہے ، اس کی نقل کردہ حدیث حسن ہو گی ، جب اس کی متابعت کی گئی ہو ۔

محمد بن اسحاق بیان کرتے ہیں : غزوۂ احد کے بعد ، نبی اکرم صلی اللہ علیہ وسلم شوال کا بقیہ حصہ ، ذیقعدہ اور ذوالج کے ( پورے ) مہینے تک ٹھہرے رہے ، اس حج کے موقع کے نگران مشرکین بنے تھے ، نبی اکرم صلی اللہ علیہ وسلم محرم کا مہینہ بھی ٹھہرے رہے ، پھر آپ نے صفر کے مہینے میں اپنے اصحاب کو ” بئر معونہ “ کی طرف بھجوایا ، یہ غزوہ اُحد کے بعد چوتھے مہینے کی بات ہے ، ان حضرات نے
یہ روایت جس طرح بیان کی ہے ، اسی طرح اسحاق نے مجھے بیان کی ہے ، مغیرہ بن عبدالرحمن بن حارث بن ہشام کے حوالے سے ، اور عبداللہ بن ابوبکر بن محمد بن عمر بن حزم کے حوالے سے ، اور دیگر اہل علم کے حوالے سے یہ بات منقول ہے ، وہ بیان کرتے ہیں : ” ابوبراء عامر بن مالک بن جعفر ” ملاعب الاسنہ “ نبی اکرم صلی اللہ علیہ وسلم کی خدمت میں مدینہ منورہ حاضر ہوا ، نبی اکرم صلی اللہ علیہ وسلم نے اسے اسلام کی پیشکش کی ، اس نے اسلام قبول نہیں کیا ، لیکن وہ اسلام سے دور بھی نہیں تھا ، اس نے کہا: اے سیدنا محمد ( صلی اللہ علیہ وسلم ) اگر آپ اپنے اصحاب میں سے کسی شخص کو بھیج دیں ، جو اُن لوگوں کو آپ کے معاملے کی طرف دعوت دے ، تو یہ مناسب ہو گا مجھے یہ امید ہے کہ وہاں کے لوگ آپ کی بات مان لیں گے ، تو نبی اکرم صلی اللہ علیہ وسلم نے بنو ساعدہ سے تعلق رکھنے والے سیدنا منذر بن عمرو رضی اللہ عنہ کو بھیجا ، جنہیں ” معتق لیموت “ کہا: جاتا تھا ، ان کے ہمراہ مسلمانوں کے چالیس بہترین افراد بھیجے ، جن میں ایک سیدنا حارث بن صمہ رضی اللہ عنہ ایک سیدنا حرام بن ملحان رضی اللہ عنہ تھے جن کا تعلق بنو عدی بن نجار سے ہے ایک سیدنا عروہ بن اسماء بن صلت سلمی رضی اللہ عنہ تھے ایک سیدنا نافع بن بدیل بن ورقاء خزاعی رضی اللہ عنہ تھے ایک سیدنا عامر بن فہیرہ رضی اللہ عنہ تھے جو سیدنا ابوبکر رضی اللہ عنہ کے غلام ہیں اور ان کے علاوہ کچھ لوگ تھے ، جو مسلمانوں کے بہترین لوگ تھے اور ان کے نام بھی ذکر کیے گئے ہیں ، یہ لوگ روانہ ہوئے ، یہاں تک کہ انہوں نے ” بئر معونہ “ کے پاس پڑاؤ کیا ، وہ بنو عامر کے علاقے میں موجود کنواں تھا ، اور اس کے پاس بنو سلیم کا پتھریلی زمین کا علاقہ تھا ، ان دونوں کے علاقے اس کنویں کے قریب تھے لیکن بنو سلیم کے علاقے سے یہ زیادہ قریب تھا ، جب ان لوگوں نے وہاں پڑاؤ کیا ، تو ان لوگوں نے سیدنا حرام بن ملحان رضی اللہ عنہ کو اللہ کے رسول کے مکتوب کے ہمراہ عامر بن طفیل کے پاس بھیجا ، جب وہ ان کے پاس آئے ، تو اس نے مکتوب کی طرف دیکھا ہی نہیں ، بلکہ ان صاحب کی طرف بڑھا اور انہیں قتل کر دیا ، پھر اس نے بنو عامر کو مدد کے لئے بلایا ، تو ان لوگوں نے اس کی وہ بات ماننے سے انکار کر دیا ، جس کی طرف اس نے انہیں بلایا تھا ، انہوں نے کہا: ہم ابوبراء ( یعنی عامر بن مالک ” ملاعب الاسنہ “ ) کی دی ہوئی پناہ کی خلاف ورزی نہیں کریں گے ، کیونکہ اس نے ان لوگوں کے لئے عقد طے کیا تھا ، اور پناہ دی تھی ۔ پھر اُس نے ( یعنی عامر بن طفیل نے ) بنوسلیم سے تعلق رکھنے والے مختلف قبائل عصیہ ، رعل اور ذکوان کو ، اُن کے خلاف بلایا ، تو ان لوگوں نے اُس کی بات مان لی ، وہ لوگ وہاں سے نکلے اور انہوں نے مسلمانوں کو گھیر لیا اور ان کی رہائشی جگہ کے آس پاس انہیں گھیرے میں لے لیا ، جب ان حضرات نے ان لوگوں کو دیکھا تو انہوں نے اپنی تلواریں نکال لیں اور لڑائی کرتے رہے ، یہاں تک کہ ان کا آخری فرد بھی شہید ہو گیا ، صرف بنو نجار بن دینار سے تعلق رکھنے والے سیدنا کعب بن زید رضی اللہ عنہ بچ گئے ، کیونکہ ان لوگوں نے انہیں چھوڑ دیا تھا ، کیونکہ ان کے اندر رمق باقی تھی اور مقتولین کے درمیان وہی شدید زخمی تھے ، وہ بعد میں زندہ رہے ، یہاں تک کہ غزوہ خندق کے موقع پر شہید ہوئے ، ان لوگوں میں سیدنا عمرو بن امیہ ضمری رضی اللہ عنہ تھے اور انصار سے تعلق رکھنے والے ایک صاحب تھے ، جن کا تعلق بنو عمرو بن عوف سے تھا ، ان کے ساتھیوں کو جو صورت حال لاحق ہوئی تھی ، اس کے بارے میں ان دونوں کو پرندے کے ذریعے چلا ، جو لشکر پر گھوم رہا تھا ، ان دونوں نے کہا: اللہ کی قسم ! اس پرندے کے حوالے سے ضرور کوئی چیز سامنے آئے گی ، پھر وہ دونوں آئے تاکہ اس بات کا جائزہ لیں ، تو لوگ خون میں لت پت پڑے ہوئے تھے اور ان کے گھوڑے وہاں کھڑے ہوئے تھے ، انصاری نے عمرو بن امیہ سے کہا: تمہاری کیا رائے ہے ؟ انہوں نے کہا: میرا یہ خیال ہے کہ ہمیں اللہ کے رسول صلی اللہ علیہ وسلم کے پاس جا کر آپ کو اس بارے میں بتانا چاہیے ، انصاری نے کہا: لیکن میں اپنی جان کے حوالے سے یہ رغبت نہیں رکھتا کہ میں اس جگہ سے چلا جاؤں ، جہاں منذر بن عمرو قتل ہو چکا ہے ، انہوں نے دشمن کے ساتھ جنگ کی ، یہاں تک کہ شہید ہو گئے ، پھر انہوں نے سیدنا عمرو بن امیہ رضی اللہ عنہ کو قیدی کے طور پر پکڑ لیا ، جب انہوں نے ان لوگوں کو بتایا کہ ان کا تعلق مضر قبیلے سے ہے ، تو عامر بن طفیل نے انہیں چھوڑ دیا ، اس نے ان کی پیشانی کے بال کاٹ دیے اور انہیں اس غلام کی جگہ آزاد کر دیا ، جس کے بارے میں اس کا یہ خیال تھا اس کی ماں کے ذمہ غلام آزاد کرنا لازم تھا ، سیدنا عمر بن امیہ رضی اللہ عنہ وہاں سے نکلے ، یہاں تک کہ جب وہ قباء کے مقام ” قرقرہ “ میں موجود تھے ، تو بنو عامر سے تعلق رکھنے والے دو افراد آ گئے ، اُن دونوں نے اسی سائے میں پڑاؤ کیا ، جہاں وہ موجود تھے ، بنو عامر سے تعلق رکھنے والے افراد کو نبی اکرم صلی اللہ علیہ وسلم کی طرف سے عہد ملا ہوا تھا ، اور پناہ ملی ہوئی تھی ۔ لیکن سیدنا عمرو بن امیہ رضی اللہ عنہ کو اس بارے میں پتہ نہیں تھا ، انہوں نے ان دونوں سے پڑاؤ کے وقت دریافت کیا : تمہارا تعلق کس سے ہے ؟ ان دونوں نے بتایا : بنو عامر سے ہے ، تو سیدنا عمرو بن امیہ رضی اللہ عنہ نے ان کو سونے کی مہلت دی ، جب وہ سو گئے ، تو انہوں نے ان دونوں پر حملہ کر کے ان دونوں کو قتل کر دیا ، وہ یہ سمجھ رہے تھے ، انہوں نے ان دونوں کے ساتھ ٹھیک کیا ہے ، کیونکہ یہ بنو عامر کو بدلہ دینے کے مترادف ہے ، کیونکہ انہوں نے نبی اکرم صلی اللہ علیہ وسلم کے اصحاب کو نقصان پہنچایا تھا ۔ جب سیدنا عمرو بن امیہ رضی اللہ عنہ ، نبی اکرم صلی اللہ علیہ وسلم کی خدمت میں حاضر ہوئے اور آپ کو صورت حال کے بارے میں بتایا ، تو نبی اکرم صلی اللہ علیہ وسلم نے ارشاد فرمایا : تم نے دو ایسے افراد کو قتل کیا ہے ، جن کی میں دیت ضرور دوں گا ، پھر نبی اکرم صلی اللہ علیہ وسلم نے ارشاد فرمایا : یہ ابوبراء کا عمل ہے ، میں اس بات کو ناپسند کرتا ہوں اور مجھے اس بات کا اندیشہ تھا ۔ جب ابوبراء کو اس بات کی اطلاع ملی ، تو اس پر یہ بات بہت گراں گزری کہ عامر ( بن طفیل ) نے اُس کی دی ہوئی پناہ کی خلاف ورزی کی ہے اور اس کے سبب سے اور اُس کی پناہ کی وجہ سے ، سیدنا محمد صلی اللہ علیہ وسلم کے اصحاب کو نقصان اُٹھانا پڑا ہے ، تو حسان بن ثابت رضی اللہ عنہ نے ابوبراء کے بیٹے کو عامر بن طفیل کے خلاف برانگیختہ کرتے ہوئے ، یہ اشعار کہے : ” بیٹوں کی ماں کے بیٹو ! تم اہل نجد کے نمایاں حیثیت کے افراد ہو ، کیا یہ چیز تمہیں پریشان نہیں کرتی ، کہ عامر نے ابوبراء کے سامنے تکبر کا مظاہرہ کیا ہے ، کہ اس کی دی ہوئی پناہ کی خلاف ورزی کی ہے ، اور خطا ، عمد کی طرح نہیں ہوتی ، خبردار ! کوششیں کرنے والے ربیعہ تک یہ پیغام پہنچا دو ، کہ میرے بعد کیا حادثہ رونما ہوا ہے ، تمہارا باپ ، ابوبراء جنگوں کا باپ ہے ، اور تمہارا ماموں حکم بن سعد بزرگی والا فرد ہے “ ۔ تو ربیعہ بن عامر ( یعنی ابوبراء ” ملاعب الاسنہ “ کے بیٹے ) نے عامر بن طفیل پر حملہ کر کے اُسے نیزہ مارا ، جو اس کے زانوں پر لگنا تھا ، وہ اپنی جگہ سے ہٹ کے لگا ، اور وہ شخص اپنے گھوڑے سے گر گیا ، اُس نے کہا: یہ ابوبراء کا عمل ہے ، اگر میں مر گیا ، تو میرے خون کا حساب میرا چچا کے ذمہ ، اس بارے میں اس کے پیچھے نہیں جایا جائے گا ، اور اگر میں زندہ رہ گیا ، تو میں نے جو مناسب سمجھوں گا ، وہ فیصلہ کر لوں گا ۔
یہ روایت امام طبرانی نے نقل کی ہے اور ابن اسحاق تک اس کے رجال ثقہ ہیں ۔