مجمع الزوائد ومنبع الفوائد

سیدنا عبداللہ بن عباس رضی اللہ عنہما کے بارے میں یہ بات منقول ہے : وہ یہ فرماتے تھے : اہل بدر کی تعداد تین سو تیرہ تھی ، جن میں مہاجرین چھہتر تھے ۔ غزوہ بدر کا واقعہ رمضان کی ، سترہ تاریخ کو جمعہ کے دن پیش آیا تھا ۔
یہ روایت امام أحمد اور امام بزار نے نقل کی ہے ، تاہم انہوں نے یہ الفاظ نقل کیے ہیں : تین سو دس سے کچھ زیادہ تھی ۔ راوی بیان کرتے ہیں : انصار کی تعداد دو سو چھتیس تھی ، اور مہاجرین کا جھنڈا سیدنا علی رضی اللہ عنہ کے پاس تھا ۔ یہ تمام روایات امام طبرانی نے نقل کی ہے ، ان کی سند میں ایک راوی حجاج بن ارطاۃ ہے اور وہ مدلس ہے ۔

سیدنا عبداللہ بن عباس رضی اللہ عنہما بیان کرتے ہیں : غزوہ بدر ستائیس رمضان کو ہوا تھا ۔
یہ روایت امام طبرانی نے نقل کی ہے ۔ اس کی سند میں ایک راوی حجاج بن ارطاۃ ہے اور وہ مدلس ہے ۔

سیدنا عامر بن عبدالله بدری رضی اللہ عنہ بیان کرتے ہیں : غزوہ بدر کی صبح ، پیر کے دن ، سترہ رمضان کو ہوئی تھی ۔
یہ روایت امام طبرانی نے نقل کی ہے ۔ اس کی سند میں ایک راوی ایسا ہے جس سے میں واقف نہیں ہوں ۔

سیدنا ابوموسی اشعری رضی اللہ عنہ بیان کرتے ہیں : اہل بدر کی تعداد ، طالوت کے ساتھیوں کی تعداد جتنی تھی ، جب اُنہوں نے جالوت کے ساتھ جنگ کی تھی ، یعنی تین سو سترہ تھی ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : ” ( غزوہ بدر کے موقع پر ) نبی اکرم صلی اللہ علیہ وسلم کے اصحاب کی تعداد تین سو ( کے لگ بھگ ) تھی “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن عبدالحمید حمانی ہے اور وہ ضعیف ہے ۔

سیدنا ابوایوب انصاری رضی اللہ عنہ کے حوالے سے ایک طویل حدیث منقول ہے ، جس میں وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” وہ لوگ یعنی مشرکین ( کتنے ہیں ؟ ) تم آؤ ! تاکہ ہم بھی گنتی کر لیں ( کہ ہماری تعداد کتنی ہے ؟ راوی بیان کرتے ہیں : ) تو ہم تین سو تیرہ افراد تھے ہم نے نبی اکرم صلی اللہ علیہ وسلم کو اس بارے میں بتایا ، تو آپ اس بات پر خوش ہوئے ، آپ نے اللہ تعالیٰ کی حمد بیان کی اور ارشاد فرمایا : یہ طالوت کے ساتھیوں جتنی تعداد ہے ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے “ ۔
یہ روایت غزوہ بدر سے متعلق باب کے آغاز میں گزر چکی ہے اور اس پر کلام بھی گزر چکا ہے ۔