مجمع الزوائد ومنبع الفوائد

سیدنا جریر رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کی بیعت انہی امور کے حوالے سے کی تھی ، جن امور پر نبی اکرم صلی اللہ علیہ وسلم نے خواتین سے بیعت لی تھی اور یہ طے پایا تھا ) کہ ہم میں سے جو شخص مر جائے اور اس نے ان ( گناہوں میں سے ) کسی کا ارتکاب نہ کیا ہو ، تو نبی اکرم صلی اللہ علیہ وسلم نے اس کے لئے جنت کی ضمانت دی تھی ، اور ہم میں سے کوئی شخص اگر ایسی حالت میں مر جائے کہ اس نے ان میں سے کسی ایک ( گناہ ) کا ارتکاب کیا ہو اور اس پر حد بھی قائم ہو چکی ہو ، تو وہ ( حد کا جاری ہونا ) کفارہ بن جائے گا اور ہم میں سے جو شخص ایسی حالت میں مر جائے کہ اس نے ان میں سے کسی جرم کا ارتکاب کیا ہو ، اور اللہ تعالیٰ نے اس کی پردہ پوشی کر لی ہو ، تو اس کا حساب اللہ تعالیٰ کے ذمہ ہو گا “ ۔
یہ روایت امام طبرانی نے نقل کی ہے ، اس کی سند میں ایک راوی سیف بن ہارون ہے ، جسے ابونعیم نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

محمد بن اسود بن خلف بیان کرتے ہیں : ان کے والد سیدنا اسود رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے نبی اکرم علی صلی اللہ علیہ وسلم لوگوں سے بیعت لے رہے تھے ، مرد ، خواتین ، چھوٹے ، بڑے آپ صلی اللہ علیہ وسلم کی خدمت میں حاضر ہوتے تھے ، آپ کے دست اقدس پر اسلام قبول کرتے تھے ، اور گواہی دیتے تھے ۔ محمد بن اسود نے یہ بات بیان کی ہے : وہ اس بات کی گواہی دیتے تھے کہ اللہ تعالیٰ کے علاوہ اور کوئی معبود نہیں ہے اور سیدنا محمد صلی اللہ علیہ وسلم اللہ کے رسول ہیں ۔
یہ روایت امام طبرانی نے معجم کبیر اور معجم اوسط میں نقل کی ہے ، امام أحمد نے اسے اختصار کے ساتھ نقل کیا ہے ، اس روایت کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : سیدہ امیمہ بنت رقیقہ رضی اللہ عنہا نبی اکرم صلی اللہ علیہ وسلم کی خدمت میں اسلام قبول کرنے کے لئے حاضر ہوئیں ، نبی اکرم صلی اللہ علیہ وسلم نے فرمایا : میں تم سے اس بات کی بیعت کرتا ہوں کہ تم کسی کو اللہ کا شریک نہیں ٹھہراؤ گی ، تم چوری نہیں کرو گی ، تم زنا نہیں کرو گی ، تم اپنی اولاد کو قتل نہیں کرو گی ، اور تم اپنی طرف سے ایجاد کیا ہوا ( یعنی جھوٹا ) بہتان نہیں لگاؤ گی ، تم نوحہ نہیں کرو گی اور تم زمانہ جاہلیت کی سی آرائش و زیبائش نہیں کرو گی “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا قطبہ بن قتادہ رضی اللہ عنہ بیان کرتے ہیں : میں نے اپنی بیٹی حویصلہ کی طرف سے نبی اکرم صلی اللہ علیہ وسلم کی بیعت کی ۔
یہ روایت عبداللہ بن أحمد نے نقل کی ہے اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا کدن بن عبد رضی اللہ عنہ بیان کرتے ہیں : میں یمن سے نبی اکرم صلی اللہ علیہ وسلم کی خدمت میں حاضر ہوا ، میں نے آپ کی بیعت کی اور آپ کے دست اقدس پر اسلام قبول کیا ۔
یہ روایت امام طبرانی نے نقل کی ہے اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدہ عائشہ صدیقہ رضی اللہ عنہا بیان کرتی ہیں : فاطمہ بنت عتبہ بن ربیعہ رضی اللہ عنہا ، نبی اکرم صلی اللہ علیہ وسلم کے دست اقدس پر بیعت کرنے کے لئے آئیں تو نبی اکرم صلی اللہ علیہ وسلم نے ان سے یہ بیعت لی کہ وہ کسی کو اللہ کا شریک نہیں ٹھہرائیں گی ، وہ زنا نہیں کریں گی ( جس کا ذکر پوری آیت میں ہے ) سیدہ عائشہ رضی اللہ عنہا کہتی ہیں : تو اس خاتون نے حیاء کی وجہ سے اپنے سر پر ہاتھ رکھ لیا ، نبی اکرم صلی اللہ علیہ وسلم کو اس کی یہ بات اچھی لگی ، سیدہ عائشہ رضی اللہ عنہا نے کہا: اے خاتون ! تم اقرار کرو ، اللہ کی قسم ہم نے بھی ان امور پر بیعت کی تھی ، تو اس خاتون نے کہا: پھر ٹھیک ہے ، پھر اس نے اس آیت کے حکم کے مطابق بیعت کر لی ۔
یہ روایت امام أحمد نے نقل کی ہے ، اس کی سند میں یہ بات مذکور ہے کہ یہ بات معمر نے زہری ، یا شاید ان کے علاوہ کسی اور کے حوالے سے عروہ سے نقل کی ہے ، امام بزار نے اس میں کسی شک کا اظہار نہیں کیا ہے ، اس روایت کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : ہند بنت عتبہ بن ربیعہ ، نبی اکرم صلی اللہ علیہ وسلم کی خدمت میں بیعت کرنے کے لئے حاضر ہوئیں ، نبی اکرم صلی اللہ علیہ وسلم نے ان کے ہاتھوں کی طرف دیکھا اور فرمایا : تم جاؤ اور اپنے ہاتھوں ( کی رنگت ) تبدیل کر لو ! وہ خاتون گئی ، اس نے مہندی لگا کر ان کو تبدیل کر لیا ، پھر وہ نبی اکرم صلی اللہ علیہ وسلم کے پاس آئی ، تو نبی اکرم صلی اللہ علیہ وسلم نے فرمایا : میں تم سے یہ بیعت لیتا ہوں کہ تم کسی کو اللہ کا شریک نہیں ٹھہراؤ گی ، تم چوری نہیں کرو گی ، تم زنا نہیں کرو گی ، ہند نے کہا: کیا کوئی آزاد عورت زنا کرتی ہے ؟ نبی اکرم صلی اللہ علیہ وسلم نے فرمایا : تم غربت کے خوف کی وجہ سے اپنی اولاد کو قتل نہیں کرو گی ، ہند نے کہا: کیا آپ نے ہماری اولاد چھوڑی ہے ؟ جسے ہم قتل کریں پھر نبی اکرم صلی اللہ علیہ وسلم نے اس سے بیعت لے لی ، اس نے سونے کے کنگن پہنے ہوئے تھے ، اس نے نبی اکرم صلی اللہ علیہ وسلم سے دریافت کیا : ان کنگنوں کے بارے میں آپ کی کیا رائے ہے ؟ نبی اکرم صلی اللہ علیہ وسلم نے فرمایا : یہ جہنم کے انگاروں میں سے ، دو انگارے ہیں ۔
یہ روایت امام ابویعلیٰ نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

سیدہ سلمی بنت قیس رضی اللہ عنہا ، جو نبی اکرم صلی اللہ علیہ وسلم کی ننھیالی عزیزوں میں سے ہیں ، اور انہوں نے نبی اکرم صلی اللہ علیہ وسلم کی اقتداء میں دونوں قبلوں کی طرف رُخ کر کے نماز ادا کی ہے ، اُن کا تعلق بنوعدی بن نجار سے ہے وہ خاتون بیان کرتی ہیں میں نبی اکرم صلی اللہ علیہ وسلم کی خدمت میں حاضر ہوئی میں نے انصار کی کچھ خواتین سمیت آپ کی بیعت کی آپ نے ہم پر یہ شرط عائد کی کہ ہم کسی کو اللہ کا شریک نہیں ٹھہرائیں گی ، ہم چوری نہیں کریں گی ہم زنا نہیں کریں گی ہم اپنی اولاد کو قتل نہیں کریں گی ہم اپنی طرف سے ایجاد کر کے بہتان نہیں لگائیں گی اور ہم بھلائی کے کام میں ، آپ کی نافرمانی نہیں کریں گی ، راوی کہتے ہیں : نبی اکرم صلی اللہ علیہ وسلم نے فرمایا : اور تم اپنے شوہروں کے ساتھ دھوکہ نہ کرنا ، راوی خاتون کہتی ہیں : ہم نے آپ کی بیعت کر لی جب ہم واپس گئیں ، تو میں نے اُن خواتین میں سے ایک خاتون سے کہا: تم واپس جاؤ اور نبی اکرم صلی اللہ علیہ وسلم سے سوال کرو کہ شوہر کو دھوکہ دینے سے مراد کیا ہے ؟ وہ خاتون کہتی ہیں : میں نے نبی اکرم صلی اللہ علیہ وسلم سے اس بارے میں سوال کیا ، تو آپ نے فرمایا : یہ کہ عورت شوہر کا مال لے کر کسی اور کو دیدے ۔
یہ روایت امام أحمد نے اور امام ابویعلیٰ اور امام طبرانی نے نقل کی ہے اور اس کے رجال ثقہ ہیں ۔

سیدہ ام عطیہ رضی اللہ عنہا بیان کرتی ہیں : جب نبی اکرم صلی اللہ علیہ وسلم مدینہ منورہ تشریف لائے ، تو آپ نے انصار کی خواتین کو ایک گھر میں جمع اور اکٹھا کروایا ، پھر آپ نے سیدنا عمر بن خطاب رضی اللہ عنہ کو ان خواتین کی طرف بھیجا ، وہ دروازے پر کھڑے ہوئے انہوں نے ان خواتین کو سلام کیا ، خواتین نے انہیں جواب دیا ، سیدنا عمر رضی اللہ عنہ نے فرمایا : میں اللہ کے رسول کا تمہاری طرف نمائندہ ہوں ، ان خواتین نے کہا: اللہ کے رسول کو ، اور اللہ کے رسول کے نمائندے کو خوش آمدید ! سیدنا عمر رضی اللہ عنہ نے فرمایا : تم اس بات کی گواہی دو کہ تم کسی کو اللہ تعالیٰ کا شریک نہیں ٹھہراؤ گی ، تم چوری نہیں کرو گی ، تم زنا نہیں کرو گی ، تم اپنی اولاد کو قتل نہیں کرو گی ، تم اپنی طرف سے ایجاد کر کے بہتان نہیں لگاؤ گی اور تم بھلائی کے بارے میں نافرمانی نہیں کرو گی ، ان خواتین نے کہا: ٹھیک ہے ، پھر سیدنا عمر رضی اللہ عنہ نے دروازے کے باہر کی طرف سے اپنا ہاتھ بڑھایا اور ان خواتین نے اندرونی حصے سے اپنا ہاتھ بڑھایا ، پھر سیدنا عمر رضی اللہ عنہ نے فرمایا : اے اللہ ! تو گواہ ہو جا ! نبی اکرم صلی اللہ علیہ وسلم نے یہ حکم دیا تھا کہ عیدین کے موقع پر ، حیض والی خواتین اور آزاد عورتیں ( یا لڑکیاں ) بھی نکلیں گی ، تاہم ہمیں ( یعنی خواتین کو ) جنازے کے ساتھ جانے سے منع کر دیا گیا ، اور ہم پر جمعہ بھی لازم قرار نہیں دیا گیا ۔ راوی کہتے ہیں : میں نے ان سے بہتان کے بارے میں دریافت کیا ، اور اس فرمان کے بارے میں دریافت کیا ، کہ وہ بھلائی کے کام میں تمہاری نافرمانی نہیں کریں گی ، تو انہوں نے جواب دیا : اس سے مراد نوحہ کرنا ہے ۔ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے یہ روایت انتہائی اختصار کے ساتھ نقل کی ہے ۔
یہ روایت امام أحمد ، امام ابویعلیٰ ، امام بزار اور امام طبرانی نے نقل کی ہے اور اس کے رجال ثقہ ہیں ۔

سیدہ عائشہ بنت قدامہ رضی اللہ عنہا بیان کرتی ہیں : میں اپنی والدہ سیدہ رائطہ بنت سفیان خزاعیہ رضی اللہ عنہا کے ساتھ تھی ، نبی اکرم صلی اللہ علیہ وسلم خواتین سے بیعت لے رہے تھے ، اور یہ فرما رہے تھے : میں اس بات پر تم سے بیعت لیتا ہوں کہ تم اللہ کے ساتھ کسی کو شریک نہیں ٹھہراؤ گی ، تم چوری نہیں کرو گی ، تم زنا نہیں کرو گی ، تم اپنی اولاد کو قتل نہیں کرو گی ، تم اپنی طرف سے ایجاد کر کے بہتان نہیں لگاؤ گی ، اور تم بھلائی کے بارے میں نافرمانی نہیں کرو گی ، اُن خواتین نے کہا: ٹھیک ہے ، نبی اکرم صلی اللہ علیہ وسلم نے ارشاد فرمایا : جہاں تک تم سے ہو سکے ، راوی خاتون کہتی ہیں : تو میں نے بھی اُسی طرح کے کلمات کہے ، جس طرح کے کلمات اُن خواتین نے کہے تھے ۔
یہ روایت امام أحمد نے نقل کی ہے ، امام طبرانی نے اس کی مانند نقل کی ہے ، تاہم انہوں نے یہ الفاظ نقل کیے ہیں : میں تم سے اس بات کی بیعت لیتا ہوں کہ تم شرک نہیں کرو گی ۔ اور راوی نے یہ کہا: ہے : اُن خواتین نے کہا: ٹھیک ہے ، تو نبی اکرم صلی اللہ علیہ وسلم نے فرمایا : جہاں تک تمہاری استطاعت ہو ، تو ان خواتین نے کہا: ٹھیک ہے ، جہاں تک ہماری استطاعت ہوئی ( ہم اس پر عمل کریں گی ) ۔ اس روایت کی سند میں ایک راوی عبدالرحمن بن عثمان بن ابراہیم ہے اور وہ ضعیف ہے ۔

سیدہ ام العلاء ، رضی اللہ عنہا جو ان لوگوں کے خاندان کی خواتین میں سے ایک ہیں ، وہ بیان کرتی ہیں : انہوں نے نبی اکرم صلی اللہ علیہ وسلم کی بیعت کی تھی ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدہ عزہ بن خابل رضی اللہ عنہا بیان کرتی ہیں : وہ نبی اکرم صلی اللہ علیہ وسلم کی خدمت میں حاضر ہوئیں ، تو نبی اکرم صلی اللہ علیہ وسلم نے ان سے یہ بیعت لی کہ تم زنا نہیں کرو گی ، تم چوری نہیں کرو گی ، تم ظاہری یا پوشیدہ طور پر زندہ درگور نہیں کرو گی ۔ راوی خاتون کہتی ہیں : جہاں تک ظاہری طور پر زندہ درگور کرنے کا تعلق ہے ، تو اس کا تو مجھے پتہ ہے ، لیکن پوشیدہ طور پر زندہ درگور کرنے کا جہاں تک تعلق ہے ، تو اس بارے میں ، میں نے نبی اکرم صلی اللہ علیہ وسلم سے سوال نہیں کیا تھا اور نہ ہی آپ نے مجھے اس بارے میں بتایا ، لیکن میرے ذہن میں یہ بات آتی ہے کہ اس سے مراد بچے کو ماں کے پیٹ میں ) ضائع کرنا ہے ، اللہ کی قسم ! میں اپنے بچے کو کبھی خراب نہیں کروں گی ۔
یہ روایت امام طبرانی نے معجم اوسط میں نقل کی ہے اور معجم کبیر اس کی مانند نقل کی ہے ، عطاء بن مسعود کعبی کے حوالے سے ان کے والد کے حوالے سے ، اس خاتون سے منقول ہے ، میں مسعود نامی راوی سے واقف نہیں ہوں ، اس روایت کے بقیہ رجال ثقہ ہیں ۔

سیدہ فاطمہ بنت عتبہ بن ربیعہ رضی اللہ عنہا بیان کرتی ہیں : سیدنا حذیفہ رضی اللہ عنہ انہیں اور ان کی بہن ہند کو ساتھ لے کر گئے تاکہ وہ دونوں نبی اکرم صلی اللہ علیہ وسلم کی بیعت کر لیں ، جب نبی اکرم صلی اللہ علیہ وسلم نے ان پر شرائط عائد کیں ، تو ہند نے کہا: کیا آپ اپنی قوم کی خواتین میں سے کسی کے بارے میں جانتے ہیں کہ اس نے ان میں سے کسی جرم کا ارتکاب کیا ہو ؟ تو سیدنا ابوحذیفہ رضی اللہ عنہ نے کہا: تم ان کی بیعت کر لو ! وہ اسی طرح شرط عائد کرتے ہیں ۔
یہ روایت امام طبرانی نے نقل کی ہے اور اس کی سند میں ایک راوی یعقوب بن محمد زہری ہے اور وہ متروک ہے ، حجاج بن شاعر نے اسے ثقہ قرار دیا ہے ۔

سیدہ اسماء بنت یزید رضی اللہ عنہا بیان کرتی ہیں : میں ان خواتین میں سے ایک ہوں ، جن سے نبی اکرم صلی اللہ علیہ وسلم نے بیعت لی تھی ، راوی خاتون کہتی ہیں : میں کم عمر لڑکی تھی اور آپ سے سوال کرنے کے بارے میں جرات رکھتی تھی ، میں نے عرض کی : یا رسول اللہ ! آپ اپنا ہاتھ آگے کیجئے ! تاکہ میں آپ کے ساتھ مصافحہ کروں ، تو نبی اکرم صلی اللہ علیہ وسلم نے ارشاد فرمایا : میں خواتین کے ساتھ مصافحہ نہیں کرتا ہوں ، میں ان سے وہ عہد لیتا ہوں ، جو اللہ تعالیٰ نے ان سے لینا ہے ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ، اس کی سند میں ایک راوی ابراہیم بن حکم بن ابان ہے اور وہ متروک ہے ۔

سیده عقیلہ بنت عتیک بن حارث رضی اللہ عنہا بیان کرتی ہیں : میں اور میری والدہ قریرہ بنت حارث عتواریہ ، مہاجر خواتین کے ساتھ آئمیں ہم نے نبی اکرم صلی اللہ علیہ وسلم کے دست اقدس پر بیعت کی ، نبی اکرم صلی اللہ علیہ وسلم نے کھلے میدان میں خیمہ لگایا ہوا تھا ، نبی اکرم صلی اللہ علیہ وسلم نے ہم سے یہ بیعت لی کہ ہم کسی کو اللہ کا شریک نہیں ٹھہرائیں گی ، اس آیت میں جن چیزوں کا ذکر ہے ، ان سب کے حوالے سے بیعت لی ، جب ہم نے اس کا اقرار کر لیا ، تو ہم نے اپنے ہاتھ بڑھائے ، تاکہ آپ کی بیعت کر لیں ، تو نبی اکرم صلی اللہ علیہ وسلم نے فرمایا : میں خواتین کا ہاتھ نہیں پکڑتا ہوں ، پھر نبی اکرم صلی اللہ علیہ وسلم نے ہمارے لئے دعائے مغفرت کی ، تو یہ ہماری بیعت تھی ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی موسیٰ بن عبیدہ ہے اور وہ ضعیف ہے ۔

سیدنا معقل بن یسار رضی اللہ عنہ بیان کرتے ہیں : نبی اکرم صلی اللہ علیہ وسلم کپڑے کے نیچے سے خواتین کے ساتھ بیعت کرتے تھے ۔ ( یعنی آپ کے اور خواتین کے درمیان کپڑا حائل ہوتا تھا ) ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عتاب بن حرب ہے اور وہ ضعیف ہے ۔

سیدنا عروہ بن مسعود ثقفی رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس پانی موجود ہوتا تھا ، جب خواتین سے آپ بیعت لیتے تھے ، تو خواتین اپنا ہاتھ پانی میں ڈبو دیتی تھیں ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن حکیم ابوبکر داہری ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب خواتین سے بیعت لیتے تھے ، تو یہ فرماتے تھے : وہ زمانہ جاہلیت کی سی آرائش و زیبائش نہیں کریں گی ، ایک خاتون نے عرض کی : یا رسول اللہ ! میں نے آپ کو دیکھا ہے کہ آپ نے ہم پر یہ شرط عائد کی ہے کہ ہم اظہار زینت نہیں کریں گی ، فلاں عورت نے میرا ساتھ دیا تھا ، اب اُس کا بھائی فوت ہو گیا ہے ، نبی اکرم صلی اللہ علیہ وسلم نے فرمایا : تم جاؤ اور تم اس کا ساتھ دے دو ، پھر آ کر میری بیعت کر لینا ۔
یہ روایت امام طبرانی نے نقل کی ہے ، اس کی سند میں ایک راوی مسیب بن شریک ہے اور وہ متروک ہے ۔

ابونصر بیان کرتے ہیں : سیدنا عبداللہ بن عباس رضی اللہ عنہما سے دریافت کیا گیا : نبی اکرم صلی اللہ علیہ وسلم خواتین کا امتحان کیسے لیتے تھے ؟ تو انہوں نے بتایا : جب کوئی خاتون اسلام قبول کرنے کے لئے آپ کے پاس آتی تھی ، تو آپ اللہ کے نام پر یہ حلف لیتے تھے کہ وہ اپنے شوہر سے ناراضگی کی وجہ سے نہیں نکلی ہے ، اور اللہ کے نام پر یہ حلف لیتے تھے کہ وہ دنیاوی فائدے کے حصول کے لئے نہیں نکلی ہے اور اللہ کے نام پر یہ حلف لیتے تھے کہ وہ ایک علاقے سے دوسرے علاقے کی طرف منتقل ہونے کے لئے نہیں نکلی ہے ، اور اللہ کے نام پر یہ حلف لیتے تھے کہ وہ صرف اللہ تعالیٰ اور اس کے رسول صلی اللہ علیہ وسلم کی محبت کی خاطر نکلی ہے ۔
یہ روایت امام طبرانی نے نقل کی ہے اس کی سند میں ایک راوی قیس بن ربیع ہے ، جسے شعبہ اور ثوری نے ثقہ قرار دیا ہے اور دیگر حضرات نے اسے ضعیف کہا: ہے ۔