مجمع الزوائد ومنبع الفوائد

سیدنا عبداللہ بن جعفر رضی اللہ عنہ بیان کرتے ہیں : جب جناب ابوطالب کا انتقال ہو گیا ، تو نبی اکرم صلی اللہ علیہ وسلم طائف تشریف لے گئے ، آپ پیدل وہاں تشریف لے گئے تھے ، آپ نے ان لوگوں کو اسلام کی دعوت کی ، انہوں نے آپ کی دعوت کو قبول نہیں کیا ، جب آپ واپس تشریف لا رہے تھے ، تو آپ ایک درخت کے سائے میں آئے ، وہاں آپ نے دو رکعت نماز ادا کی ، پھر آپ نے یہ دعا کی : اے اللہ ! میں تیرے سامنے اپنی قوت کے کمزور ہونے اور لوگوں کے سامنے اپنی حیثیت کے کم ہونے کی شکایت کرتا ہوں تو سب سے زیادہ رحم کرنے والا ہے ، اے سب سے زیادہ رحم کرنے والے ! تو مجھے کس کے سپرد کرے گا ؟ دشمن کے تاکہ وہ میرے ساتھ سختی سے پیش آئے ، یا کسی قریب کے سپرد کرے گا جس کو تو میرے معاملے کا نگران بنا دے اگر تو مجھ پر غضبناک نہیں ہے ، تو پھر مجھے اس کی پرواہ نہیں ہے ، تاہم تیری عافیت میرے لئے زیادہ گنجائش والی ہے میں تیری اس ذات کی پناہ لیتا ہوں ، جس کی وجہ سے تاریکیاں روشن ہوتی ہیں ، اور جس کی وجہ سے دنیا اور آخرت کا معاملہ ٹھیک ہوتا ہے ( اس بات سے پناہ لیتا ہوں ) کہ تیرا غضب مجھ پر نازل ہو جائے ، یا تیری ناراضگی میرے لیے حلال ہو جائے ، عتاب کرنا تیرے ہی لیے مخصوص ہے ، یہاں تک کہ تو راضی ہو جائے اور اللہ تعالیٰ کی مدد کے بغیر کچھ نہیں ہو سکتا “ ۔
یہ روایت امام طبرانی نے نقل کی ہے اور اس کی سند میں ایک راوی ابن اسحاق ہے اور وہ مدلس اور ثقہ ہے ، اس روایت کے بقیہ رجال ثقہ ہیں ۔

سیدہ رقیقہ رضی اللہ عنہا بیان کرتی ہیں : نبی اکرم صلی اللہ علیہ وسلم جب طائف سے واپس تشریف لائے ، تو آپ اُن ( خاتون ) کے پاس آئے انہوں نے نبی اکرم صلی اللہ علیہ وسلم کے بارے میں ستو کا مشروب تیار کرنے کا حکم دیا ، نبی اکرم صلی اللہ علیہ وسلم نے وہ پی لیا ، پھر نبی اکرم صلی اللہ علیہ وسلم نے مجھ سے فرمایا : تم ان کے معبودوں کی عبادت نہ کرو اور نہ ہی ان کی طرف رُخ کر کے نماز پڑھو ، میں نے کہا: ایسی صورت میں وہ مجھے قتل کر دیں گے ، نبی اکرم صلی اللہ علیہ وسلم نے فرمایا : اگر وہ تمہیں اس بارے میں کچھ کہیں ، تو تم یہ کہنا کہ اس طاغہ کے پروردگار کے لئے اور جب تم نماز ادا کرو ، تو اپنی پشت اس کی طرف کر لینا ، پھر نبی اکرم صلی اللہ علیہ وسلم ان لوگوں کے پاس سے تشریف لے گئے ۔ سیدہ رقیقہ رضی اللہ عنہا کی صاحبزادی بیان کرتی ہیں : میرے دو بھائیوں ، سفیان بن قیس بن ابان اور وہب بن قیس بن ابان نے مجھے یہ بات بتائی ہے کہ جب ثقیف قبیلے کے لوگ مسلمان ہو گئے ، تو ہم نکل کر نبی اکرم صلی اللہ علیہ وسلم کے پاس گئے ، آپ نے دریافت کیا : تمہاری ماں کا کیا حال ہے ؟ ہم نے کہا: اُن کا انتقال اسی حالت میں ہوا تھا ، جس پر آپ نے انہیں چھوڑا تھا ، نبی اکرم صلی اللہ علیہ وسلم نے فرمایا : اس صورت میں ، تمہاری ماں مسلمان تھی ۔
یہ روایت امام طبرانی نے نقل کی ہے ، اس کی سند میں ایسا راوی ہے جس سے میں واقف نہیں ہوں ۔

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم حج کے موقع پر ، مختلف لوگوں کے پاس تشریف لے جاتے تھے اور یہ فرماتے تھے : کیا کوئی شخص مجھے اپنی قوم کے پاس لے جائے گا ؟ کیونکہ قریش تو مجھے اس بات سے روکتے ہیں کہ میں اپنے پرودگار کے کلام کی تبلیغ کروں ، ہمدان قبیلے سے تعلق رکھنے والا ایک شخص آپ کے پاس آیا ، آپ نے دریافت کیا : تمہارا تعلق کہاں سے ہے ؟ اس نے جواب دیا : ہمدان سے ، نبی اکرم صلی اللہ علیہ وسلم نے دریافت کیا : کیا تمہاری قوم کے پاس مضبوط حیثیت ہے ؟ اس نے جواب دیا : جی ہاں ! پھر اس شخص کو یہ اندیشہ ہوا کہ کہیں اس کی قوم اس کی عہد شکنی نہ کرے ، تو وہ نبی اکرم صلی اللہ علیہ وسلم کے پاس آیا اور بولا: میں اُن لوگوں کے پاس جا کر انہیں اس بارے میں بتاؤں گا ، پھر میں اگلے سال آپ کے پاس آؤں گا ، نبی اکرم صلی اللہ علیہ وسلم نے فرمایا : ٹھیک ہے پھر وہ شخص چلا گیا اور پھر رجب کے مہینے میں انصار کا وفد آ گیا ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ربیعہ بن عباد رضی اللہ عنہ بیان کرتے ہیں : میں اپنے والد کے ساتھ تھا ، میں ایک نوجوان تھا ، میں نے نبی اکرم صلی اللہ علیہ وسلم کو دیکھا آپ مختلف قبائل کے پاس تشریف لے جاتے تھے ، آپ کے پیچھے ایک سرخ رنگ کا شخص موجود ہوتا تھا ، جس کا چہرہ خوبصورت تھا اور اس نے بال بڑے رکھے ہوئے تھے ، نبی اکرم صلی اللہ علیہ وسلم کسی قبیلے کے پاس ٹھہرتے اور یہ فرماتے تھے : اے بنو فلاں ! میں تمہاری طرف اللہ کا رسول ہوں ، میں تمہیں یہ حکم دیتا ہوں کہ تم اس کی عبادت کرو اور تم کسی کو اس کا شریک نہ ٹھہراؤ اور تم میری تصدیق کرو اور تم میرا بچاؤ کرو ، تاکہ اللہ تعالیٰ نے مجھے جن چیزوں کے ہمراہ بھیجا ہے ، میں اُن کا نفاذ کروا سکوں ، جب آپ اپنی گفتگو سے فارغ ہوتے تھے ، تو آپ کے پیچھے موجود شخص یہ کہتا تھا : اے بنوفلاں ! یہ شخص تم سے یہ چاہتا ہے کہ تم لوگ لات اور عزی کو چھوڑ دو ، اور بنو مالک بن اقیش سے تعلق رکھنے والے ، اپنے قبیلے کے حلیفوں کو چھوڑ دو ، اور اس چیز کی طرف آ جاؤ ، جو بدعت اور گمراہی یہ لے کر آیا ہے ، تو تم اس کی بات نہ سنو ، اور اس کی پیروی نہ کرو ، ( راوی بیان کرتے ہیں : ) میں نے اپنے والد سے دریافت کیا : یہ کون شخص ہے ؟ تو انہوں نے بتایا : یہ ان کا چچا ، ابولہب ہے ۔
یہ روایت عبداللہ بن أحمد نے اور امام طبرانی نے نقل کی ہے اس کی سند میں ایک راوی حسین بن عبداللہ بن عبیداللہ ہے اور وہ ضعیف ہے ، یحیی بن معین نے ایک روایت کے مطابق اسے ثقہ قرار دیا ہے ، اس سے پہلے اس روایت کے مختلف طرق گزر چکے ہیں جو نبی اکرم صلی اللہ علیہ وسلم کو اذیت پہنچانے سے متعلق باب میں گزرے ہیں ، اس کی بعض اسناد صحیح ہیں ۔

سیدنا محمود بن لبید رضی اللہ عنہ ، جن کا تعلق بنوعبداشہل سے ہے ، وہ بیان کرتے ہیں : جب ابوحیسر انس بن نافع مکہ آیا ، تو اس کے ساتھ بنوعبداشہل سے تعلق رکھنے والے کچھ نوجوان بھی تھے ، جن میں ایک ایاس بن معاذ تھے ، وہ لوگ خزرج قبیلے سے تعلق رکھنے والے افراد کے خلاف قریش سے حلیف بننے کا معاہدہ کرنا چاہتے تھے ، نبی اکرم صلی اللہ علیہ وسلم نے ان لوگوں کے بارے میں سنا ، تو آپ ان کے پاس تشریف لائے ، آپ ان کے پاس آ کر بیٹھے اور ان سے فرمایا : تم جس چیز کی طرف آئے ہو ، کیا تمہیں اس سے زیادہ بہتر چیز میں دلچسپی ہے ؟ انہوں نے دریافت کیا : وہ کیا ہے ؟ نبی اکرم صلی اللہ علیہ وسلم نے فرمایا : میں اللہ کا رسول ہوں ، اللہ تعالیٰ نے مجھے بندوں کی طرف مبعوث کیا ہے ، تاکہ میں ان لوگوں کو اس بات کی طرف دعوت دوں کہ وہ اللہ تعالیٰ کی عبادت کریں اور وہ کسی کو اس کا شریک نہ ٹھہرائیں اور اللہ تعالیٰ نے مجھ پر کتاب بھی نازل کی ہے ، پھر نبی اکرم صلی اللہ علیہ وسلم نے اسلام کی تعلیمات کا ذکر کیا ، اور قرآن کی تلاوت ان لوگوں کے سامنے کی ، تو ایاس بن معاذ ، جو ایک نوجوان تھے ، انہوں نے یہ کہا: اے قوم ! اللہ کی قسم یہ چیز اس سے زیادہ بہتر ہے جس کی خاطر تم آئے ہو ، تو ابوحیسر انس بن نافع نے مٹھی میں مٹی لی اور وہ ایاس بن معاذ کے چہرے پر ماری اور بولے : تم ہمیں چھوڑ دو ! مجھے اپنی زندگی کی قسم ! ہم کسی اور کام کے لئے آئے ہیں ، تو ایاس خاموش ہو گئے ، نبی اکرم صلی اللہ علیہ وسلم ان لوگوں کے پاس سے اٹھ گئے ، پھر وہ لوگ مدینہ منورہ چلے گئے ، اس کے بعد اوس اور خزرج قبیلے کے درمیان جنگ بعاث کا معاملہ پیش آیا ، اس کے کچھ عرصے بعد ایاس بن معاذ ہلاکت کا شکار ہو گئے ۔ سیدنا محمود بن لبید رضی اللہ عنہ بیان کرتے ہیں : میری قوم کے جو افراد ان کے آخری وقت میں ان کے پاس موجود تھے ، انہوں نے یہ بات بتائی ہے کہ وہ مسلسل اللہ تعالیٰ کی معبودیت اور اس کی کبریائی کا اعتراف کرتے رہے ، اس کی حمد اور پاکی بیان کرتے رہے یہاں تک کہ ان کا انتقال ہو گیا ، انہیں اس بارے میں کوئی شک نہیں تھا کہ اُن کا انتقال مسلمان ہونے کے عالم میں ہوا تھا ، کیونکہ جب انہوں نے نبی اکرم صلی اللہ علیہ وسلم کی زبانی آپ کی تبلیغ سنی تھی ، تو انہیں اسلام کا شعور حاصل ہو گیا تھا ۔
یہ روایت امام أحمد اور امام طبرانی نے نقل کی ہے اور اس کے رجال ثقہ ہیں ۔