مجمع الزوائد ومنبع الفوائد

سیدنا علی بن ابوطالب رضی اللہ عنہ بیان کرتے ہیں : میں اور نبی اکرم صلی اللہ علیہ وسلم خانہ کعبہ میں آ گئے ۔ نبی اکرم صلی اللہ علیہ وسلم نے فرمایا : تم بیٹھ جاؤ نبی اکرم صلی اللہ علیہ وسلم پھر میرے کندھے پر سوار ہوئے میں نے اٹھنا چاہا ، لیکن آپ نے مجھ میں کمزوری دیکھی تو آپ نیچے اتر آئے پھر نبی اکرم صلی اللہ علیہ وسلم نیچے بیٹھ گئے ، اور آپ نے فرمایا : تم میرے کندھوں پر چڑھ جاؤ سیدنا علی رضی اللہ عنہ کہتے ہیں : میں نبی اکرم صلی اللہ علیہ وسلم کے کندھوں پر چڑھا تو نبی اکرم صلی اللہ علیہ وسلم اٹھ گئے مجھے یوں محسوس ہو رہا تھا کہ اگر میں چاہوں ، تو آسمان کے افق تک پہنچ سکتا ہوں میں بیت اللہ کے اوپری حصے پر چڑھ گیا ، وہاں پیتل یا تانبے کی کچھ تصویریں بنی ہوئی تھیں ، میں نے دائیں طرف سے بائیں طرف سے سامنے سے پیچھے سے انہیں ہٹایا یہاں تک کہ جب یہ کام مکمل کر لیا ، تو نبی اکرم صلی اللہ علیہ وسلم نے مجھ سے فرمایا انہیں پھینک دو میں نے انہیں پھینک دیا اور وہ یوں ٹوٹ گئیں ، جس طرح شیشے کی بنی ہوئی کوئی چیز ٹوٹتی ہے پھر میں نیچے اتر آیا پھر میں اور نبی اکرم صلی اللہ علیہ وسلم تیزی سے چلتے ہوئے چلے گئے ، یہاں تک کہ ہم گھروں کے درمیان نگاہوں سے اوجھل ہو گئے اس اندیشہ کے تحت لوگوں میں سے کوئی ہم سے نہ ملے ۔

ایک روایت میں یہ الفاظ ہیں : خانہ کعبہ میں بت پڑے ہوئے تھے میں نبی اکرم صلی اللہ علیہ وسلم کو اٹھانے لگا تھا لیکن میں ایسا نہیں کر پایا پھر نبی اکرم صلی اللہ علیہ وسلم نے مجھے اٹھا لیا میں نے انہیں ، توڑ دیا اگر میں چاہتا ، تو آسمان تک پہنچ سکتا تھا ۔
یہ روایت امام أحمد اور ان کے صاحبزادے نے نقل کی ہے ۔ امام ابویعلیٰ اور امام بزار نے نقل کی ہے انہوں نے روایت کے ان الفاظ ، یہاں تک کہ ہم گھروں میں چھپ گئے اس کے بعد یہ نقل کیا ہے : اس کے بعد اس میں وہ نہیں رکھے گئے یعنی وہ بت نہیں رکھے گئے ، ان تمام روایات کے رجال ثقہ ہیں ۔

سیدنا بریدہ بن حصیب رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک بت کو چھو لیا پھر آپ نے وضو کیا ۔
یہ روایت امام بزار نے نقل کی ہے ۔ اس کی سند میں ایک راوی صالح بن حیان ہے اور وہ ضعیف ہے ۔

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم مشرکین کے ساتھ ایک جنگ میں شریک ہوئے آپ نے اپنے پیچھے دو فرشتوں کی آواز سنی ان میں سے ایک دوسرے سے یہ کہہ رہا تھا تم ہمارے ساتھ چلو تاکہ ہم اللہ کے رسول کے پیچھے کھڑے ہو جائیں ، تو دوسرے فرشتے نے کہا: ہم ان کے پیچھے کیسے کھڑے ہو سکتے ہیں ، جبکہ انہوں نے تھوڑی دیر پہلے ایک بت کو چھو لیا تھا ۔ راوی کہتے ہیں : اس کے بعد نبی اکرم صلی اللہ علیہ وسلم نے کبھی بھی مشرکین کی کسی جنگ میں حصہ نہیں لیا ۔
یہ روایت امام ابویعلیٰ نے نقل کی ہے ۔ اس کی سند میں ایک راوی عبداللہ بن محمد بن عقیل ہے وہ خراب حافظے کا مالک ہے ۔ اس روایت کے بقیہ رجال صحیح کے رجال ہیں ۔