مجمع الزوائد ومنبع الفوائد

سیدنا ابن کعب بن مالک رضی اللہ عنہ اپنے چچا کے حوالے سے یہ بات نقل کرتے ہیں : جب نبی اکرم صلی اللہ علیہ وسلم نے انہیں ، ابن ابوالحقیق کی طرف خیبر بھیجا تو آپ نے خواتین اور بچوں کو قتل کرنے سے منع کیا ۔
یہ روایت امام أحمد نے نقل کی ہے ۔ اس کے رجال صحیح کے رجال ہیں امام طبرانی کی روایت بھی آگے آئے گی ۔

ایوب بیان کرتے ہیں : میں نے اپنی قوم میں سے ایک شخص کو اپنے والد کے حوالے سے یہ بات نقل کرتے ہوئے سنا وہ کہتے ہیں : نبی اکرم صلی اللہ علیہ وسلم نے ایک جنگی مہم روانہ کی جس میں ، میں بھی موجود تھا اس میں آپ نے اس بات سے منع کیا کہ ہم مزدوروں ( یا انتہائی بوڑھے افراد ) اور غلاموں کو قتل کریں ۔
یہ روایت امام أحمد نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا صعب بن جثامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : میں نے آپ سے مشرکین کی اولاد کے بارے میں دریافت کیا تھا : آپ نے ارشاد فرمایا : ان لوگوں کے ساتھ انہیں بھی قتل کر دو ۔ راوی بیان کرتے ہیں : نبی اکرم صلی اللہ علیہ وسلم نے غزوہ خیبر کے موقع پر اس سے منع کر دیا تھا ۔
یہ روایت عبداللہ بن أحمد نے نقل کی ہے اور امام طبرانی نے بھی نقل کی ہے تاہم انہوں نے یہ الفاظ نقل کیے ہیں : انہوں نے نبی اکرم صلی اللہ علیہ وسلم سے ایسی جنگی مہم کے بارے میں دریافت کیا تھا ، جو بھرپور حملے کے دوران بچوں کو بھی قتل کر دیتے ہیں ۔ ” مسند “ کے رجال صحیح کے رجال ہیں ۔

سیدنا کعب بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے خواتین اور بچوں کو قتل کرنے سے منع کیا ہے ۔
یہ روایت امام طبرانی نے مختلف اسانید کے ساتھ نقل کی ہے جن میں سے ایک کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نے ایک عورت کو پکڑا اور اسے قیدی بنا لیا اس عورت نے اس کی تلوار کے قائم کے بارے میں اس سے جھگڑا کیا ، تو اس شخص نے اس عورت کو قتل کر دیا نبی اکرم صلی اللہ علیہ وسلم کا گزر اس عورت کی میت کے پاس سے ہوا آپ کو اس معاملے کے بارے میں بتایا گیا تو آپ نے خواتین کو قتل کرنے سے منع کر دیا ۔
یہ روایت امام أحمد اور امام طبرانی نے نقل کی ہے تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم کا گزر غزوہ خندق کے موقع پر ایک مقتول عورت کے پاس سے ہوا تو آپ نے دریافت کیا : اسے کس نے قتل کیا ہے ؟ ایک شخص نے عرض کی : یا رسول اللہ ! میں نے نبی اکرم صلی اللہ علیہ وسلم نے فرمایا : وہ کیوں ؟ اس نے عرض کی : یہ میری تلوار چھیننا چاہ رہی تھی تو نبی اکرم صلی اللہ علیہ وسلم خاموش رہے ۔ ان دونوں کی سند میں ایک راوی حجاج بن ارطاۃ ہے اور وہ مدلس ہے ۔

سیدنا عوف بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم عورتوں کو قتل نہ کرو “ ۔
یہ روایت امام بزار نے نقل کی ہے ۔ اس کی سند میں ایک راوی محمد بن عبداللہ بن نمران ہے اور وہ ضعیف ہے ۔

سیدنا عبداللہ بن عتیک رضی اللہ عنہ بیان کرتے ہیں : نبی اکرم صلی اللہ علیہ وسلم نے جب انہیں اور ان کے ساتھیوں کو ابن ابوحقیق کو قتل کرنے کے لئے بھیجا جو خیبر میں موجود تھا ، تو آپ نے خواتین اور بچوں کو قتل کرنے سے منع کیا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں صرف محمد بن مصفی کا معاملہ مختلف ہے اور وہ ثقہ ہے اس کے بارے میں ایسا کلام کیا گیا ہے ، جو نقصان دہ نہیں ہے ۔

سیدنا عبداللہ بن عباس رضی اللہ عنہما بیان کرتے ہیں میں نے نبی اکرم صلی اللہ علیہ وسلم سے سوال کیا میں نے عرض کی : مسلمانوں کے شہسوار کسی قوم پر حملہ آور ہو جاتے ہیں اور انہیں اور ان کے بچوں کو قتل کر دیتے ہیں ، تو نبی اکرم صلی اللہ علیہ وسلم نے فرمایا : وہ ) ( بچے ) اپنے آباء و اجداد کے ساتھ ہوں گے ۔
یہ روایت امام طبرانی نے نقل کی ہے ۔ اس کی سند میں ایک راوی ابراہیم بن اسماعیل بن ابوحبیبہ ہے جسے امام أحمد نے ثقہ قرار دیا ہے اور جمہور نے اسے ضعیف کہا: ہے ۔ اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے خواتین اور بچوں کو قتل کرنے سے منع کیا ہے ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا اسود بن سریع رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا میں نے آپ کے ہمراہ جنگ میں حصہ لیا مجھے ایک ظفر ( شاید چھری مراد ہے ) ملا ، اس دن لوگ قتل ہوئے تھے ، یہاں تک کہ لوگوں نے ( دشمن کے ) بچوں کو بھی قتل کر دیا ( یہاں عربی کے لفظ کے بارے میں ، راوی کو شک ہے ) ایک صاحب نے عرض کی : یا رسول اللہ ! یہ تو مشرکین کے بچے تھے پھر آپ نے ارشاد فرمایا : تمہارے بہترین لوگ بھی مشرکین کے بچے ہیں پھر آپ نے فرمایا : خبردار تم بچوں کو قتل نہ کرو خبردار تم بچوں کو قتل نہ کرو خبردار تم بچوں کو قتل نہ کرو ہر جان فطرت پر پیدا ہوتی ہے ، یہاں تک کہ وہ بولنے کے قابل ہو جائے تو اس کے ماں باپ اسے یہودی یا عیسائی بنا دیتے ہیں ۔
یہ روایت امام أحمد نے مختلف اسانید کے ساتھ نقل کی ہے ۔ امام طبرانی نے معجم کبیر اور معجم اوسط میں اس طرح نقل کی ہے اور انہوں نے نقل کیا ہے : نبی اکرم صلی اللہ علیہ وسلم کو اس بات کی اطلاع ملی تو آپ نے ارشاد فرمایا : لوگوں کو کیا ہو گیا ہے کہ انہوں نے قتل کے معاملے میں حد سے تجاوز کیا یہاں تک کہ بچوں کو بھی قتل کر دیا ؟ تو ایک صاحب نے عرض کی : اس کے بعد حسب سابق حدیث ہے ۔ امام أحمد کی مختلف اسانید میں سے بعض کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب اپنے لشکر روانہ کرتے تھے تو یہ فرماتے تھے : اللہ کا نام لے کر روانہ ہو جاؤ ، اور ان لوگوں کے ساتھ اللہ کی راہ میں جنگ کرو جنہوں نے اللہ تعالیٰ کا انکار کیا ہے تم عہد شکنی نہ کرو تم مالِ غنیمت میں خیانت نہ کرو کسی کا مثلہ نہ کرو بچوں کو قتل نہ کرو ، اور نہ ہی عبادت گزار لوگوں کو قتل کرو ۔
یہ روایت امام أحمد امام ابویعلیٰ امام بزار نے اور امام طبرانی نے معجم کبیر اور معجم اوسط میں نقل کی ہے تاہم انہوں نے یہ الفاظ نقل کیے ہیں : ” تم کسی بچے یا عورت یا بوڑھے آدمی کو قتل نہ کرو“ ۔ امام بزار کے رجال میں سے ابراہیم بن اسماعیل بن ابوحبیبہ نامی ایک راوی ہے جسے امام أحمد نے ثقہ قرار دیا ہے جمہور نے اسے ضعیف کہا: ہے ۔ امام بزار کے بقیہ رجال صحیح کے رجال ہیں ۔

سیدنا ثوبان رضی اللہ عنہ جو نبی اکرم صلی اللہ علیہ وسلم کے غلام ہیں وہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص کمسن بچے یا بڑی عمر کے فرد کو قتل کر دے یا کھجور کا درخت جلا دے یا کوئی پھل والا درخت کاٹ دے یا کسی بکری کو اس کی کھال حاصل کرنے کے لئے ذبح کر لے تو وہ برابری کی بنیاد پر واپس نہیں آتا “ ۔
یہ روایت امام أحمد نے نقل کی ہے ۔ اس کی سند میں ایسا راوی ہے جس کا نام بیان نہیں کیا گیا اور ایک راوی ابن لہیعہ ہے ، جس میں ضعف پایا جاتا ہے ۔

سیدنا جریر بن عبداللہ بجلی رضی اللہ عنہ بیان کرتے ہیں : نبی اکرم صلی اللہ علیہ وسلم جب کوئی جنگی مہم روانہ کرتے تھے ، تو یہ ارشاد فرماتے تھے : اللہ تعالیٰ کے نام سے برکت حاصل کرتے ہوئے اللہ تعالیٰ کی راہ میں اللہ تعالیٰ کے رسول کے دین پر ( رہتے ہوئے اس جنگ میں حصہ لو ) تم خیانت نہ کرنا عہد شکنی نہ کرنا مثلہ نہ کرنا بچوں کو قتل نہ کرنا “ ۔
یہ روایت امام ابویعلیٰ نے اور امام طبرانی نے تینوں کتابوں میں نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اور اس میں ضعف پایا جاتا ہے ۔ اس روایت کے بقیہ رجال ثقہ ہیں معجم کبیر میں اس کا اور طریق ہے ، جو ضعیف ہے ۔

سیدنا ابوموسی اشعری رضی اللہ عنہ بیان کرتے ہیں : نبی اکرم صلی اللہ علیہ وسلم جب کوئی جنگی مہم روانہ کرتے تھے تو یہ فرماتے تھے : ” اللہ تعالیٰ کے نام سے برکت حاصل کرتے ہوئے جنگ میں حصہ لو ، اور جو لوگ اللہ تعالیٰ کا انکار کرتے ہیں ان کے ساتھ لڑائی کرو تم مثلہ نہ کرنا خیانت نہ کرنا عہد شکنی نہ کرنا کسی بچے یا عمر رسیدہ بوڑھے کو قتل نہ کرنا “ ۔
یہ روایت امام بزار نے اور امام طبرانی نے معجم صغیر اور معجم کبیر میں نقل کی ہے ۔ امام بزار کے رجال صحیح کے رجال ہیں صرف عثمان بن سعید مری کا معاملہ مختلف ہے اور وہ ثقہ ہے ۔

عطاء بن ابی رباح بیان کرتے ہیں : ہم لوگ سیدنا عبداللہ بن عمر رضی اللہ عنہما کے ساتھ تھے اہل بصرہ سے تعلق رکھنے والا ایک نوجوان آیا اس نے سیدنا عبداللہ بن عمر رضی اللہ عنہما سے کسی چیز کے بارے میں دریافت کیا : تو انہوں نے فرمایا : میں تمہیں اس بارے میں بتاتا ہوں ایک مرتبہ میں نبی اکرم صلی اللہ علیہ وسلم کے پاس موجود تھا مجھ سمیت دس افراد تھے ہم لوگ مسجد نبوی میں تھے ۔ سیدنا ابوبکر رضی اللہ عنہ تھے ۔ سیدنا عمر رضی اللہ عنہ تھے ۔ سیدنا عثمان رضی اللہ عنہ تھے ۔ سیدنا علی رضی اللہ عنہ تھے ۔ سیدنا عبداللہ بن مسعود رضی اللہ عنہ تھے ۔ سیدنا حذیفہ رضی اللہ عنہ تھے ۔ سیدنا ابوسعید خدری رضی اللہ عنہ تھے ( راوی کہتے ہیں : ایک اور صاحب کا انہوں نے نام لیا تھا ) اور میں تھا انصار سے تعلق رکھنے والا ایک نوجوان آیا اس نے نبی اکرم صلی اللہ علیہ وسلم کو سلام کیا اور پھر وہ بیٹھ گیا اس نے عرض کی : یا رسول اللہ ! اہل ایمان میں کون زیادہ فضیلت رکھتا ہے ۔ نبی اکرم صلی اللہ علیہ وسلم نے فرمایا : جس کے اخلاق زیادہ اچھے ہوں اس نے عرض کی : اہل ایمان میں کون زیادہ سمجھدار ہے نبی اکرم صلی اللہ علیہ وسلم نے فرمایا : جو موت کو کثرت سے یاد رکھے اور اس کے نازل ہونے سے پہلے اس کی بکثرت تیاری رکھے یہی لوگ سمجھدار ہیں پھر آپ خاموش ہو گئے پھر نبی اکرم صلی اللہ علیہ وسلم ہماری طرف متوجہ ہوئے اور آپ نے ارشاد فرمایا : جب بھی کسی قوم میں فحاشی ظاہر ہوتی ہے ، تو ان کے درمیان طاعون اور مختلف قسم کی ایسی بیماریاں ظاہر ہوتی ہیں ، جو ان سے پہلے لوگوں میں نہیں تھیں اور جب بھی کوئی قوم ماپنے اور وزن کرنے میں کمی کرتی ہے ، تو انہیں قحط سالی گرفت میں لے لیتی ہے حالات میں سختی آ جاتی ہے حکمرانوں کا ظلم ان پر ہونے لگتا ہے اور جو لوگ اپنے اموال کی زکوۃ نہیں دیتے ہیں ان پر آسمان سے بارش نازل نہیں ہوتی ، یہاں تک کہ اگر جانور نہ ہوں ، تو ان پر بارش ہی نازل نہ ہو اور جو لوگ اللہ تعالیٰ کے نام کے عہد یا اس کے رسول کے نام کے عہد کو توڑتے ہیں اللہ تعالیٰ ان پر ان کے دشمن کو مسلط کر دیتا ہے ، یہاں تک کہ وہ ان کی کچھ چیزوں کو اپنے قبضے میں لے لیتا ہے اور جب کسی قوم کے حکمران اللہ کی کتاب کے مطابق فیصلہ نہیں کرتے ہیں ، تو اللہ تعالیٰ ان کے درمیان مشکل ( یا اختلافات ) ڈال دیتا ہے “ ۔ راوی بیان کرتے ہیں : پھر نبی اکرم صلی اللہ علیہ وسلم نے سیدنا عبدالرحمن بن عوف رضی اللہ عنہ کو یہ حکم دیا کہ وہ ایک جنگی مہم کے لئے تیاری کریں ، جس کا امیر نبی اکرم صلی اللہ علیہ وسلم نے سیدنا عبدالرحمن رضی اللہ عنہ کو مقرر کیا تھا اگلے دن جب وہ صبح آئے تو انہوں نے سیاہ رنگ کا ، موٹے اونی کپڑے کا عمامہ باندھا ہوا تھا ۔ نبی اکرم صلی اللہ علیہ وسلم نے انہیں بلوایا ان کا عمامہ کھولا انہیں دوبارہ عمامہ باندھا اور پیچھے کی طرف چار انگل کا شملہ چھوڑا پھر آپ نے فرمایا : اے ابن عوف اس طرح عمامہ باندھا کرو ، کیونکہ یہ عربوں کے رواج کے مطابق ہے اور زیادہ اچھا ہے پھر نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا کہ وہ انہیں جھنڈا دیں ۔ انہوں نے اللہ تعالیٰ کی حمد بیان کی پھر یہ فرمایا : تم سب لوگ اللہ کی راہ میں جنگ میں حصہ لو ، اور جو لوگ اللہ تعالیٰ کا انکار کرتے ہیں ان کے ساتھ جنگ کرو تم خیانت نہ کرنا عہد شکنی نہ کرنا مثلہ نہ کرنا اور کسی بچے کو قتل نہ کرنا ۔ یہ اللہ کے رسول کا عہد ہے اور تمہارے درمیان ان کی سنت ہے ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا ابوثعلبہ خشنی رضی اللہ عنہ بیان کرتے ہیں : نبی اکرم صلی اللہ علیہ وسلم نے خواتین اور بچوں کو قتل کرنے سے منع کیا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مسلم بن میمون خواص ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے خواتین اور بچوں کو قتل کرنے سے منع کیا ہے آپ نے ارشاد فرمایا ہے : یہ دونوں اسے ملیں گے ، جو غالب آئے گا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عطیہ عوفی ہے اور وہ ضعیف ہے ۔