مجمع الزوائد ومنبع الفوائد

ابووائل بیان کرتے ہیں : سیدنا عبداللہ بن مسعود رضی اللہ عنہ نے جب ابن نواحہ کو قتل کروایا تو اس وقت انہوں نے یہ فرمایا : یہ اور ابن اثال یہ دونوں مسلیمہ کذاب کے سفیروں کے طور پر نبی اکرم صلی اللہ علیہ وسلم کی خدمت میں حاضر ہوئے تھے نبی اکرم صلی اللہ علیہ وسلم نے ان دونوں سے دریافت کیا : کیا تم دونوں اس بات کی گواہی دیتے ہو ؟ کہ میں اللہ کا رسول ہوں ان دونوں نے جواب دیا : ہم یہ گواہی دیتے ہیں کہ مسیلمہ اللہ کا رسول ہے نبی اکرم صلی اللہ علیہ وسلم نے ارشاد فرمایا : اگر میں نے کسی وافد ( یعنی سفیر ) کو قتل کروانا ہوتا ، تو میں تم دونوں کی گردنیں اڑوا دیتا ۔ راوی بیان کرتے ہیں : اس کے بعد یہی سنت جاری ہوئی کہ سفیروں کو قتل نہیں کیا جاتا جہاں تک ابن اثال کا تعلق ہے ، تو اللہ تعالیٰ نے ہمارے لئے اس کے حوالے سے کفایت کر دی ( یعنی وہ موت کا شکار ہو گیا ) جہاں تک اس شخص کا تعلق ہے ( یعنی ابن نواحہ کا تعلق ہے ) تو یہ مسلسل اسی حالت میں رہا یہاں تک کہ اللہ تعالیٰ نے اب ہمیں اس پر ق ابودے دیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد نے اور امام بزار نے نقل کی ہے ۔ امام ابویعلیٰ نے اسے طویل روایت کے طور پر نقل کیا ہے ان حضرات کی سند حسن ہے ۔

ابن معیز سعدی بیان کرتے ہیں : میں سحری کے وقت اپنے گھوڑے کو پانی پلانے کے لئے نکلا میرا گزر بنوحنیفہ کی مسجد کے پاس سے ہوا وہ لوگ یہ کہہ رہے تھے مسیلمہ اللہ کا رسول ہے میں سیدنا عبداللہ بن مسعود رضی اللہ عنہ کے پاس آیا اور انہیں اس بارے میں بتایا انہوں نے سپاہیوں کو بھیجا وہ ان لوگوں کو پکڑ کر لے آئے سیدنا عبداللہ رضی اللہ عنہ نے ( ان لوگوں میں سے ) توبہ کروائی ان لوگوں نے توبہ کر لی تو سیدنا عبداللہ رضی اللہ عنہ نے انہیں چھوڑ دیا سیدنا عبداللہ رضی اللہ عنہ نے ( ان لوگوں میں سے ) ابن نواحہ کو قتل کروا دیا لوگوں نے کہا: آپ نے ایک ہی معاملے کی وجہ سے ان سب کو پکڑا تھا ، اور ان میں سے ایک کو قتل کروا دیا اور دوسروں کو چھوڑ دیا ، تو سیدنا عبداللہ رضی اللہ عنہ نے فرمایا : میں نے نبی اکرم صلی اللہ علیہ وسلم کو سنا تھا یہ شخص اور ابن اثال بن حجر ، یہ نبی اکرم صلی اللہ علیہ وسلم کی خدمت میں حاضر ہوئے تھے نبی اکرم صلی اللہ علیہ وسلم نے دریافت کیا : کیا تم دونوں اس بات کی گواہی دیتے ہو کہ میں اللہ کا رسول ہوں ، تو ان دونوں نے جواب دیا : کیا آپ اس بات کی گواہی دیتے ہیں کہ مسیلمہ اللہ کا رسول ہے نبی اکرم صلی اللہ علیہ وسلم نے فرمایا : میں اللہ تعالیٰ اور اس کے سچے ( اور حقیقی ) رسولوں پر ایمان رکھتا ہوں اگر میں نے کسی سفیر کو قتل کروانا ہوتا ، تو تم دونوں کو قتل کروا دیتا ( سیدنا عبداللہ رضی اللہ عنہ نے فرمایا : اسی وجہ سے میں نے اس شخص کو قتل کیا ہے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد نے نقل کی ہے ابن معیز نامی راوی سے میں واقف نہیں ہوں اس روایت کے بقیہ رجال ثقہ ہیں اس کا ایک اور طریق بھی ہے ، جو اس سے زیادہ مکمل ہے اور وہ کتاب الحدود میں آئے گا ۔

سیدنا نعیم بن مسعود رضی اللہ عنہ بیان کرتے ہیں : مسیلمہ کے دو سفیر نبی اکرم صلی اللہ علیہ وسلم کی خدمت میں حاضر ہوئے نبی اکرم صلی اللہ علیہ وسلم نے ارشاد فرمایا : ” اگر یہ معمول نہ ہوتا کہ سفیروں کو قتل نہیں کیا جاتا ، تو میں نے تم دونوں کی گردنیں اڑوا دینی تھیں “ ۔ آپ نے ان دونوں کے ہمراہ یہ مکتوب بھیجا : ” یہ اللہ کے رسول سیدنا محمد صلی اللہ علیہ وسلم کی طرف سے مسیلمہ کذاب کے نام ہے اما بعد ! زمین اللہ تعالیٰ کی ملکیت ہے وہ اپنے بندوں میں سے جسے چاہتا ہے اس کا وارث بنا دیتا ہے اور اچھا انجام پرہیز گاروں کے لئے ہے “ ۔ راوی بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی جب تک تیس کذابوں کا ظہور نہیں ہو گا ، اور وہ سب یہ کہتے ہوں گے کہ وہ نبی ہیں “ ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے اختصار کے ساتھ نقل کی ہے ۔
یہ روایت امام طبرانی نے ابن اسحاق کے حوالے سے نقل کی ہے وہ کہتے ہیں : اشجع سے تعلق رکھنے والے ایک بزرگ نے مجھے یہ حدیث بیان کی ہے ۔ انہوں نے ان سے سماع نہیں کیا امام ابوداؤد نے ان بزرگ کا نام سعد بن طارق بیان کیا ہے ۔ اس روایت کے بقیہ رجال ثقہ ہیں ۔

وبر بن مشہر بیان کرتے ہیں : مسیلمہ نے مجھے ، ابن شلغاف اور ابن نواحۃ کو نبی اکرم صلی اللہ علیہ وسلم کی خدمت میں بھیجا ہم لوگ آپ کی خدمت میں حاضر ہوئے دونوں ساتھیوں نے کلام کرنے میں مجھ سے پہل کی ، کیونکہ وہ دونوں عمر میں مجھ سے بڑے تھے ان دونوں نے کلمہ شہادت پڑھا اور پھر یہ کہا: کہ ہم اس بات کی گواہی دیتے ہیں کہ آپ نبی ہیں اور آپ کے بعد مسیلمہ ( نبی ہو گا ) نبی اکرم صلی اللہ علیہ وسلم نے ( مجھ سے ) دریافت کیا : اے لڑکے ! تم کیا کہتے ہو ؟ میں نے کہا: میں اس بات کی گواہی دیتا ہوں جس کی آپ گواہی دیں اور اس بات کو جھوٹ قرار دیتا ہوں جسے آپ جھوٹ قرار دیں نبی اکرم صلی اللہ علیہ وسلم نے فرمایا : میں دہناء کی مٹی کی تعداد میں اس بات کی گواہی دیتا ہوں کہ مسیلمہ کذاب ہے پھر آپ نے فرمایا : تم لوگ ان دونوں کو پکڑ لو ان دونوں کو پکڑ لیا گیا ان دونوں کے بارے میں حکم دیا گیا کہ انہیں بہت کیسان میں رکھا جائے آپ کے اصحاب میں سے ایک نے ان دونوں کی سفارش کی تو نبی اکرم صلی اللہ علیہ وسلم نے ان دونوں کو چھوڑ دیا ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔