مجمع الزوائد ومنبع الفوائد

سیدنا سلمان فارسی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی بھی چیز ایسی نہیں ہے ، جو اپنے جیسی ایک ہزار ( چیزوں ) سے زیادہ بہتر ہو ، البتہ انسان کا معاملہ مختلف ہے “ ۔
یہ روایت امام طبرانی نے نقل کی ہے ۔ اس کے رجال صحیح کے رجال ہیں صرف ابراہیم بن محمد بن یوسف کا معاملہ مختلف ہے اور وہ ثقہ ہے ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں جانوروں میں یہ بات پاتا ہوں کہ ایک جانور ایک سو جانوروں میں زیادہ بہتر ہوتا ہے اور مردوں میں سے ایک مرد ایک سو افراد سے زیادہ بہتر ہوتا ہے “ ۔
یہ روایت امام بزار نے نقل کی ہے ۔ اس کی سند میں ایک راوی یوسف بن خالد سمتی ہے اور وہ ضعیف ہے ۔

سیدنا سمرہ بن جندب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں جانوروں میں یہ بات نہیں پاتا ہوں کہ ایک ہی صنف کا ایک جانور اپنے جیسے ایک سو جانوروں سے زیادہ بہتر ہو البتہ تم یہ چیز پاؤ گے کہ ایک شخص ایک سو افراد سے بہتر ہو گا “ ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں اس بارے میں کچھ احادیث کتاب الایمان میں گزر چکی ہیں ۔