مجمع الزوائد ومنبع الفوائد

سیدنا عتبہ بن عبد سلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے اصحاب سے فرمایا : تم لوگ اٹھو اور جنگ کرو ۔ راوی کہتے ہیں : ایک شخص نے ایک تیر پھینکا تو نبی اکرم صلی اللہ علیہ وسلم نے فرمایا : اس نے ( جنت کو ) واجب کر لیا ہے ۔
یہ روایت امام أحمد اور امام طبرانی نے نقل کی ہے ان دونوں کی سند حسن ہے اس کے بقیہ طرق کتاب التفسیر میں سورۃ مائدہ سے متعلق باب میں آگے آئیں گے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ کی راہ میں ایک تیر پھینکتا ہے خواہ وہ نشانے تک پہنچے یا نہ پہنچے ، تو اس شخص کو سیدنا اسماعیل علیہ السلام کی اولاد میں سے چار افراد کو آزاد کرنے کی مانند اجر ملتا ہے “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی شبیب بن بشر ہے اور وہ ثقہ ہے اور اس میں ضعف پایا جاتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ کی راہ میں ایک تیر پھینکتا ہے ، تو یہ اس کے لئے قیامت کے دن نور ہو گا “ ۔ ”
یہ روایت امام بزار نے اپنے استاد عبدالرحمن بن فضل بن موفق کے حوالے سے نقل کی ہے میں اس سے واقف نہیں ہوں اس روایت کے بقیہ رجال صیح کے رجال ہیں ۔

سیدنا عتبہ بن عبد رضی اللہ عنہ روایت کرتے ہیں : نبی اکرم صلی اللہ علیہ وسلم نے قریظہ اور نضیر ( کے خلاف جنگ ) کے دن یہ ارشاد فرمایا : ” جو شخص اس قلعے میں ایک تیر پھینک دے گا اس کے لئے جنت واجب ہو جائے گی“ ۔ سیدنا عتبہ رضی اللہ عنہ بیان کرتے ہیں : میں نے ( اس موقع پر ) تین تیر ( قلعے کے اندر ) داخل کیے تھے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالوہاب بن ضحاک ہے اور وہ متروک ہے ۔

محمد بن حنفیہ بیان کرتے ہیں : میں نے سیدنا ابوعمرو انصاری رضی اللہ عنہ کو دیکھا وہ بدری بھی ہیں عقبی بھی ہیں احدی بھی ہیں ( یعنی انہیں غزوہ بدر بیعت عقبہ اور غزوہ اُحد میں شرکت کا شرف حاصل ہے ) انہوں نے روزہ رکھا ہوا تھا ، اور پیاس کی شدت کی وجہ سے وہ زبان موڑ رہے تھے ۔ انہوں نے اپنے غلام سے کہا: تمہارا ستیاناس ہو تم مجھے ترکش پکڑاؤ ان کے غلام نے انہیں ترکش پکڑایا انہوں نے تیر نکالا جس ( نکالنے ) میں کمزوری تھی اور پھر انہوں نے تین تیر پھینکے پھر انہوں نے یہ بات بیان کی : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ کی راہ میں ایک تیر پھینکتا ہے خواہ وہ نشانے تک پہنچے یا پہنچے تو یہ چیز قیامت کے دن اس شخص کے لئے نور ہو گی “ ۔ راوی بیان کرتے ہیں : وہ صحابی سورج غروب ہونے سے پہلے شہید ہو گئے تھے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن محمد بن عبیداللہ عرزمی ہے اور وہ ضعیف ہے ۔

سیدنا ابوامامہ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جس شخص کے مسلمان ہونے کے دوران بال سفید ہو جائیں ، تو یہ قیامت کے دن اس کے لئے نور ہوں گے اور جو شخص اللہ کی راہ میں ایک تیر پھینکے خوا وہ نشانے پر لگے یا نہ لگے تو یہ چیز اس کے لئے سیدنا اسماعیل علیہ السلام کی اولاد میں سے ایک غلام آزاد کرنے کی مانند ہو گی “ ۔
یہ روایت امام طبرانی نے دو اسناد کے ساتھ نقل کی ہے جن میں سے ایک کے رجال ثقہ ہیں ۔

سیدنا معاذ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کے اسلام میں بال سفید ہو جائیں ، تو یہ اس شخص کے لئے قیامت کے دن نور ہوں گے اور جو شخص اللہ کی راہ میں ایک تیر پھینکے اللہ تعالیٰ اس کی وجہ سے اس کے لئے ایک درجہ نوٹ کر لے گا“ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں صرف سالم بن ابوالجعد نے سیدنا معاذ رضی اللہ عنہ کا زمانہ نہیں پایا ہے ۔

سیدنا عمران بن حصین رضی اللہ عنہ فرماتے ہیں : آدمی کا اللہ کی راہ میں صف میں کھڑا ہونا اس کے لئے دنیا اور اس میں موجود سب چیزوں سے زیادہ بہتر ہے اور جو شخص اللہ کی راہ میں ایک تیر پھینکتا ہے اور وہ ( نشانے تک ) پہنچ جاتا ہے خواہ نشانے پر لگے یا نہ لگے تو یہ غلام آزاد کرنے کی مانند ہے اور جو شخص اللہ کی راہ میں بوڑھا ہو جائے ( یعنی اس کے بال سفید ہو جائیں ) تو یہ چیز اس کے لئے قیامت کے دن نور ہو گی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یوسف بن خالد سمتی ہے اور وہ ضعیف ہے ۔