مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے قیامت سے پہلے تلوار کے ہمراہ مبعوث کیا گیا ہے تاکہ صرف اللہ تعالیٰ کی عبادت کی جائے جس کے علاوہ اور کوئی معبود نہیں ہے اور کوئی اس کا شریک نہیں ہے اور میرا زرق میرے نیزے کے سائے کے نیچے رکھا گیا ہے اور ذلت اور حقارت اس شخص پر مسلط کر دی گئی ہے ، جو میرے حکم کی خلاف ورزی کرتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن ثابت بن ثوبان ہے جسے ابن مدینی ابوحاتم اور دیگر حضرات نے ثقہ قرار دیا ہے ۔ امام أحمد اور دیگر حضرات نے اسے ضعیف قرار دیا ہے ۔ اس روایت کے بقیہ رجال ثقہ ہیں ۔

سیدنا عویم بن ساعدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو دیکھا جس کے پاس فارسی کمان تھی آپ نے فرمایا : اسے رکھ دو ! پھر آپ نے عربی کمان کی طرف اشارہ کر کے ارشاد فرمایا : ” یہ اور قنا کے نیزے ان کے ذریعے اللہ تعالیٰ تمہیں شہروں پر تسلط عطا کرے گا ، اور تمہارے دشمن کے خلاف تمہاری مدد کرے گا “ ۔
یہ روایت امام طبرانی نے نقل کی ہے ۔ اس کی سند میں مستور راوی ہیں ، جنہیں نہ ہی ضعیف قرار دیا گیا ہے اور نہ ان کی توثیق گئی ہے ۔

سیدنا عبدالله بن بسر رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی بن ابوطالب رضی اللہ عنہ کو خیبر کی طرف بھیجا تو انہیں سیاہ عمامہ باندھا اور اس کا شملہ پیچھے کی طرف لٹکایا راوی کو شک ہے شاید یہ الفاظ ہیں : بائیں کندھے پر ڈالا پھر نبی اکرم صلی اللہ علیہ وسلم لشکر کے پیچھے چلتے ہوئے تشریف لے گئے آپ نے کمان کے ساتھ ٹیک لگائی ہوئی تھی آپ کے پاس سے ایک شخص گزرا جس نے فارسی کمان اٹھائی ہوئی تھی نبی اکرم صلی اللہ علیہ وسلم نے فرمایا : اسے رکھ دو کیونکہ یہ ملعون ہے اور جو شخص اسے اٹھائے وہ ملعون ہے تم پر قنا اور عربی کمانیں استعمال کرنا لازم ہے ، کیونکہ ان کے ذریعے اللہ تعالیٰ تمہارے دین کو غلبہ عطا کرے گا ، اور تمہارے لئے شہروں کو فتح کر دے گا ۔ یحیی بن حمزہ کہتے ہیں : یہ بات نبی اکرم صلی اللہ علیہ وسلم نے ارشاد فرمائی تھی اس کی وجہ یہ ہے کہ یہ نبی اکرم صلی اللہ علیہ وسلم کے زمانے کے ساتھ مخصوص ہے جہاں تک آج کی بات ہے ، تو آج یہ کمانیں اہل اسلام کے ہتھیاروں اور قوت کا حصہ بن چکی ہیں ۔
یہ روایت امام طبرانی نے اپنے استاد بکر بن سہل دمیاطی کے حوالے سے نقل کی ہے ۔ امام ذہبی کہتے ہیں : یہ مقارب الحدیث ہے ۔ امام نسائی رحمہ اللہ کہتے ہیں : یہ ضعیف ہے ۔ اس روایت کے بقیہ رجال صحیح کے رجال ہیں البتہ میں نے ابوعبیدہ عیسیٰ بن سلیم نامی راوی کے عبداللہ بن بشر سے سماع کے بارے میں کوئی روایت نہیں پائی ہے ۔

سیدنا سعد بن ابی وقاص رضی اللہ عنہ ” مرفوع “ حدیث کے طور پر یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : ” تم پر تیراندازی لازم ہے ، کیونکہ یہ تمہارے کھیل میں سب سے بہتر ہے ( یہاں ایک لفظ کے بارے میں راوی کو شک ہے ، لیکن مفہوم یہی ہے ) “ ۔
یہ روایت امام بزار نے نقل کی ہے اور امام طبرانی نے معجم اوسط میں نقل کی ہے اور اس کے الفاظ یہ ہیں : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تم پر تیر اندازی لازم ہے ، کیونکہ یہ تمہارے کھیلوں میں سب سے بہتر ہے “ ۔ امام بزار کے رجال صحیح کے رجال ہیں صرف حاتم بن لیث کا معاملہ مختلف ہے اور وہ ثقہ ہے ۔ امام طبرانی کے رجال کا معاملہ بھی اس طرح ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” فرشتے تمہارے مقابلوں میں کسی میں شامل نہیں ہوتے البتہ گھڑ دوڑ اور تیراندازی کا معاملہ مختلف ہے “ ۔
یہ روایت امام بزار نے اور امام طبرانی نے نقل کی ہے ۔ اس کی سند میں ایک راوی عمرو بن عبدالغفار ہے اور وہ متروک ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر کچھ لوگوں کے پاس سے ہوا جو تیراندازی کر رہے تھے نبی اکرم صلی صلی اللہ علیہ وسلم نے ارشاد فرمایا : ” تم لوگ تیراندازی کرو ! اے اولاد اسماعیل ! کیونکہ تمہارے جدامجد بھی تیرانداز تھے “ ۔
یہ روایت امام بزار نے نقل کی ہے ۔ اس کی سند میں ایک راوی محمد بن عمرو بن علقمہ ہے اس کی نقل کردہ حدیث حسن ہے ۔ اس روایت کے بقیہ رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر کچھ لوگوں کے پاس سے ہوا جو تیراندازی کر رہے تھے ۔ آپ نے فرمایا : اے اولاد اسماعیل ! تم تیراندازی کرو تمہارے جد امجد بھی تیرانداز تھے ۔
یہ روایت امام بزار نے نقل کی ہے ۔ اس کی سند میں ایک راوی اسماعیل بن مسلم مکی ہے اور وہ ضعیف ہے ۔

سیدنا حمزہ بن عمرو اسلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے اسلم قبیلے کے لوگوں سے فرمایا : اے اولاد اسماعیل ! تم تیراندازی کرو ، کیونکہ تمہارے جدامجد بھی تیرانداز تھے نبی اکرم صلی اللہ علیہ وسلم نے فرمایا : میں محجن بن ادرع کے ساتھ ہوں ، تو لوگ رک گئے ۔ نبی اکرم صلی اللہ علیہ وسلم نے فرمایا : تمہیں کیا ہوا ہے ؟ انہوں نے عرض کی : آپ جس کے ساتھ ہوں گے وہ غالب آ جائے گا ۔ نبی اکرم صلی اللہ علیہ وسلم نے فرمایا : تم لوگ تیراندازی کرو میں تم سب لوگوں کے ساتھ ہوں ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن یزید بکری ہے اور وہ ضعیف ہے ۔

سیدنا عمرو بن عطیہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عنقریب زمین تمہارے لئے فتح کر دی جائے گی اور دنیا کے حوالے سے تمہارے لئے کفایت ہو جائے گی تو تم میں سے کوئی ایک شخص اپنے تیروں کے ذریعے کھیلنے کے حوالے سے عاجز نہ آ جائے ( یعنی اسے ترک نہ کر دے ) “ ۔
یہ روایت امام طبرانی نے اپنے استاد بکر بن سہل کے حوالے سے نقل کی ہے ۔ امام ذہبی کہتے ہیں : یہ مقارب الحدیث ہے ۔ امام نسائی رحمہ اللہ کہتے ہیں : یہ ضعیف ہے اس کی سند میں ایک راوی ابن لہیعہ بھی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تم میں سے کسی شخص پر کوئی حرج نہیں ہو گا کہ جب اسے پریشانی ( یا دشمن کی طرف سے خوف ) لاحق ہو ، تو وہ اپنی کمان گلے میں ڈالے اور اس کے ذریعے اپنی پریشانی کو ختم کر دے “ ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی محمد بن زبیر زبیدی ہے اور وہ انتہائی ضعیف ہے ۔

قیس بن ابوحازم بیان کرتے ہیں : میں نے سیدنا خالد بن یزید رضی اللہ عنہ کو جنگ یرموک کے دن دیکھا کہ وہ دو ہدفوں کے درمیان تیراندازی کر رہے تھے ان کے ساتھ نبی اکرم صلی اللہ علیہ وسلم کے اصحاب سے تعلق رکھنے والے کچھ افراد بھی تھے ۔ انہوں نے یہ بات بیان کی ۔ ہمیں یہ حکم دیا گیا ہے کہ ہم اپنی اولاد کو تیر اندازی اور قرآن کی تعلیم دیں ۔
یہ روایت امام طبرانی نے نقل کی ہے ۔ اس کی سند میں ایک راوی منذر بن زیادطائی ہے اور وہ متروک ہے ۔

عطاء بن ابی رباح بیان کرتے ہیں : میں نے سیدنا جابر بن عبداللہ رضی اللہ عنہ اور سیدنا جابر بن عبیداللہ رضی اللہ عنہ کو دیکھا کہ وہ دونوں تیراندازی کر رہے تھے ان میں سے ایک تھک گیا تو بیٹھ گیا تو دوسرے صاحب نے ان سے کہا: کیا تم تھک گئے ہو ؟ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر وہ چیز جس کا تعلق اللہ کے ذکر سے نہ ہو ، تو وہ لہو ہے ( راوی کو شک ہے شاید یہ الفاظ ہیں : ) وہ سہو ہے البتہ چار چیزوں کا معاملہ مختلف ہے آدمی کا دو نشانوں کے درمیان چلنا آدمی کا اپنے گھوڑے کی تربیت کرنا آدمی کا اپنی بیوی کے ساتھ کھیلنا اور تیراکی کی تعلیم “ ۔
یہ روایت امام طبرانی نے معجم کبیر اور معجم اوسط میں نقل کی ہے اور امام بزار نے نقل کی ہے ۔ امام طبرانی کے رجال صحیح کے رجال ہیں صرف عبدالوہاب بن بخت کا معاملہ مختلف ہے اور وہ ثقہ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دنیا کے لہو سے تعلق رکھنے والی ہر چیز باطل ہے البتہ تین چیزوں کا معاملہ مختلف ہے تمہارا اپنی کمان کے ذریعے تیراندازی کرنا تمہارا اپنے گھوڑے کی تربیت کرنا اور تمہارا اپنی بیوی کے ساتھ کھیلنا ، کیونکہ یہ حق میں سے ہیں“ ۔ نبی اکرم صلی اللہ علیہ وسلم نے ارشاد فرمایا ہے : ” تیراندازی کرو ! گھڑ سواری کرو ، اور تمہارا تیر اندازی کرنا میرے نزدیک زیادہ پسندیدہ ہے اللہ تعالیٰ ایک تیر کی وجہ سے تین افراد کو جنت میں داخل کرے گا اسے بنانے والا جو اسے بنانے میں ثواب کی امید رکھتا ہو اسے پکڑانے والا اور اسے پھینکنے والا “ ۔ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری روایت ذکر کی ہے اور یہ روایت مکمل روایت نفلی صدقہ سے متعلق باب میں گزر چکی ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سوید بن عبدالعزیز ہے ۔ امام أحمد کہتے ہیں : یہ متروک ہے جمہور نے اسے ضعیف قرار دیا ہے دحیم اسے ثقہ کہتے ہیں : اس روایت کے بقیہ رجال ثقہ ہیں ۔

سیدنا عمر بن خطاب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر لہو کو مکروہ قرار دیا گیا ہے البتہ آدمی کے اپنی بیوی کے ساتھ کھیلنے اور دو ہدفوں کے درمیان اس کے چلنے اور اس کے اپنے گھوڑے کی تربیت کرنے کا معاملہ مختلف ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی منذر بن زیادطائی ہے اور وہ ضعیف ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص دو نشانوں کے درمیان چلتا ہے اسے ہر قدم کے عوض میں ایک نیکی ملتی ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عثمان بن مطر ہے اور وہ ضعیف ہے ۔

مجاہد بیان کرتے ہیں : میں نے سیدنا عبداللہ بن عمر رضی اللہ عنہما کو دیکھا کہ وہ دو نشانوں کے درمیان دوڑ رہے تھے اور یہ کہہ رہے تھے : مجھے اس کے عوض میں یہ ملے گا مجھے اس کے عوض میں یہ ملے گا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص تیراندازی سیکھنے کے بعد اسے بھول جائے تو یہ ایک نعمت تھی جس کا اس نے انکار کیا “ ۔
یہ روایت امام بزار نے اور امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی قیس بن ربیع ہے جسے شعبہ ، ثوری اور دیگر حضرات نے ثقہ قرار دیا ہے ایک جماعت نے اسے ضعیف کہا: ہے ۔ اس روایت کے بقیہ رجال ثقہ ہیں ۔