مجمع الزوائد ومنبع الفوائد

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم ظلم سے بچ کے رہو ! کیونکہ ظلم ، قیامت کے دن ، تاریکیوں کی شکل میں ہو گا ، اور کنجوسی سے بچ کے رہو ! کیونکہ کنجوسی نے تم سے پہلے کے لوگوں کو ہلاکت کا شکار کر دیا ، اس نے رشتہ داری کے حقوق پامال کرنے پر مجبور کیا ، تو اُن لوگوں نے رشتہ داری کے حقوق پامال کیے ، اس نے انہیں خون بہانے کا حکم دیا ، تو ان لوگوں نے خون بہائے ، ایک شخص کھڑا ہوا ، اُس نے عرض کی : یا رسول اللہ ! کون سا اسلام زیادہ فضیلت رکھتا ہے ؟ نبی اکرم صلی اللہ علیہ وسلم نے ارشاد فرمایا : ” جس شخص کے ہاتھ اور زبان سے لوگ سلامت رہیں “ ۔
یہ روایت امام طبرانی نے معجم اوسط میں نقل کی ہے ، اس میں رادیوں کی ایک جماعت ایسی ہے ، جن سے میں بھی واقف نہیں ہوں ۔

سیدنا ہرماس بن زیاد رضی اللہ عنہ بیان کرتے ہیں : میں نے نبی اکرم کو اپنی اونٹنی پر خطبہ دیتے ہوئے دیکھا ، آپ صلی اللہ علیہ وسلم نے ارشاد فرمایا : تم لوگ خیانت سے بچ کے رہو ! کیونکہ یہ بری ساتھی ( یا عادت ) ہے ، اور تم ظلم سے بچ کے رہو ! کیونکہ وہ قیامت کے دن تاریکیوں کی شکل میں ہو گا ، اور تم کنجوسی سے بچ کے رہو ! کیونکہ اس نے تم سے پہلے کے لوگوں کو ہلاکت کا شکار کیا ، یہاں تک کہ انہوں نے خون بہائے اور رشتہ داری کے حقوق پامال کیے “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی عبداللہ بن عبدالرحمن بن ملیحہ ہے اور وہ ضعیف ہے ۔

سیدنا مسور بن مخرمہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ ظلم سے بچ کے رہو ! کیونکہ ظلم ، قیامت کے دن تاریکیوں کی شکل میں ہو گا “ ۔
یہ روایت امام طبرانی نے معجم اوسط اور معجم کبیر میں نقل کی ہے اس کی سند میں ایک راوی یحیی بن عبدالحمید حمانی ہے اور وہ ضعیف ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم ظلم نہ کرو ! کہیں ایسا نہ ہو کہ تم دعا کرو اور وہ قبول نہ ہو ، تم بارش کی دعا مانگو اور بارش نہ ہو ، تم مدد مانگو اور تمہاری مدد نہ کی جائے “
یہ روایت امام طبرانی نے معجم اوسط میں نقل کی ہے اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عمر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ظلم سے بچو ! کیونکہ وہ قیامت کے دن تاریکیوں کی شکل میں ہو گا “ ۔
یہ روایت امام طبرانی نے نقل کی ہے ، اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ، اس روایت کے بقیہ رجال صحیح کے رجال ہیں ۔