مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آخری زمانے میں ، ظالم حکمران ہوں گے ، فاسق وزراء ہوں گے ، خیانت کرنے والے قاضی ہوں گے ، جھوٹ بولنے والے علماء ہوں گے ، تم میں سے جو شخص وہ زمانہ پائے ، وہ اُن کے لیے جابی ، یا عریف ، یا سپاہی ، ( یعنی سرکاری اہلکار ) ہرگز نہ بنے “ ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی داؤد بن سلیمان خراسانی ہے ، امام طبرانی کہتے ہیں : اس میں کوئی حرج نہیں ہے ، ازدی کہتے ہیں : یہ انتہائی ضعیف ہے ، اس میں ایک راوی معاویہ بن ہیثم ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

ابوولید قریشی بیان کرتے ہیں : میں بلال بن ابوبردہ کے پاس موجود تھا ، عبدالقیس قبیلے سے تعلق رکھنے والا ، ایک شخص ان کے پاس آیا اور بولا: اللہ تعالیٰ امیر کو ٹھیک رکھے ” طف “ کے رہنے والے لوگ اپنے اموال کی زکوۃ ادا نہیں کرتے ہیں ، راوی کہتے ہیں : اس نے جو بات بیان کی تھی ، مجھے اُس کا علم تھا ، میں نے اس بارے میں امیر کو بتایا ، انہوں نے دریافت کیا : تمہارا تعلق کس سے ہے ؟ اس نے جواب دیا : عبدالقیس قبیلے سے ، انہوں نے فرمایا : تمہارا نام کیا ہے ؟ اس نے بتایا : فلاں بن فلاں ، انہوں نے وہاں کے کوتوال کو خط لکھا اور فرمایا : تم عبدالقیس قبیلے میں کسی کو بھیج کر فلاں بن فلاں کے بارے میں دریافت کرو کہ اُن کے درمیان اس شخص کا حسب کیسا ہے ؟ قاصد واپس آیا اور اس نے بتایا : میں نے یہ بات پائی ہے کہ اُس کے حسب پر اعتراض کیا جاتا ہے ، تو بلال بن ابوبردہ نے فرمایا : اللہ اکبر ! میرے والد نے ، میرے دادا سیدنا ابوموسی اشعری رضی اللہ عنہ کے حوالے سے مجھے یہ حدیث بیان کی ہے ، نبی اکرم صلی اللہ علیہ وسلم نے ارشاد فرمایا ہے : ” لوگوں کے خلاف سرکشی وہ شخص کرے گا ، جو سرکشی کے نتیجے میں پیدا ہوا ہو گا یا اس ( کی پیدائش ) میں اُس ( سرکشی ) کا حصہ ہو گا “ ۔ ابوولید نامی راوی نے یہ لفظ نقل کیے ہیں : ” وہ ( لوگوں کے خلاف ) کوشش کرے گا“ ۔
یہ روایت امام طبرانی نے نقل کی ہے ، ابوولید قرشی نامی راوی مجہول ہے ، اس روایت کے بقیہ رجال ثقہ ہیں ۔

مسعود بن قبیصہ یا شاید قبیصہ بن مسعود بیان کرتے ہیں : انہوں نے محارب قبیلے کے علاقے میں ، صبح کی نماز ادا کی ، جب اُن لوگوں نے نماز ادا کر لی ، تو اُن میں سے ایک نوجوان نے یہ بات بتائی : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عنقریب زمین کے مشرقی اور مغربی علاقے تمہارے لیے فتح ہو جائیں گے اور وہاں کے اہلکار جہنم میں جائیں گے البتہ اُن لوگوں کا معاملہ مختلف ہے ، جو اللہ سے ڈریں اور امانت ادا کریں “ ۔
یہ روایت امام أحمد نے نقل کی ہے ، اس کی سند میں ایک راوی شقیق بن حیان ہے ، ابوحاتم کہتے ہیں : وہ مجہول ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اُس وقت تک قائم نہیں ہو گی ، جب تک اللہ تعالیٰ جھوٹے حکمرانوں ، گناہگار وزیروں ، خیانت کرنے والے امینوں اور فاسق علماء کو نہیں بھیجے گا ، جن کا ظاہری حلیہ راہبوں جیسا ہو گا اور انہیں کوئی رغبت نہیں ہو گی ۔ یہاں ایک لفظ کے بارے میں راوی کو شک ہے ۔ پھر اللہ تعالیٰ انہیں تاریک ، غبار آلود فتنے کا شکار کر دے گا ، جس میں وہ یوں بھٹکتے پھریں گے ، جس طرح یہودی ، ظلم کرنے میں بھٹکتے پھرتے تھے “ ۔
یہ روایت امام بزار نے نقل کی ہے اس کی سند میں ایک راوی حبیب بن عمران کلاعی ہے اور میں اُس سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اس امت میں آخری زمانے میں ۔ راوی کو شک ہے ، یا شاید یہ الفاظ ہیں ۔ آخری زمانے میں ، اس امت میں ، ایسے لوگ نکلیں گے ، جن کے ساتھ گائے کی دموں کی طرح کے کوڑے ہوں گے ، وہ اللہ تعالیٰ کی ناراضگی میں صبح کریں گے اور اُس کے غضب میں شام کریں گے “ ۔
یہ روایت امام أحمد نے نقل کی ہے اور امام طبرانی نے معجم اوسط اور معجم کبیر میں نقل کی ہے ۔

ان کی نقل کردہ ایک روایت میں یہ الفاظ ہیں : ” تم اس بات سے بچنا کہ تم ان کے ساتھی بنو“ ۔ امام أحمد کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اگر تمہاری زندگی طویل ہوئی ، تو تم عنقریب ایسے لوگوں کو دیکھو گے ، جو اللہ تعالیٰ کی ناراضگی میں صبح کریں گے اور اُس کی لعنت میں شام کریں گے ، اُن لوگوں کے ہاتھوں میں گائے کی دموں کی طرح کے کوڑے ہوں گے “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : ہم نے ہر وہ چیز دیکھ لی ، جو نبی اکرم صلی اللہ علیہ وسلم نے ہمارے سامنے بیان کی تھی ، البتہ آپ صلی اللہ علیہ وسلم نے یہ بھی ارشاد فرمایا تھا : ” کچھ لوگ ایسے ہوں گے ، جنہیں قیامت کے دن یہ کہا: جائے گا : تم اپنے کوڑے کو رکھ دو ! اور جہنم میں داخل ہو جاؤ ! “
یہ روایت امام بزار نے نقل کی ہے ، اس کی سند میں ایک راوی ہشام بن زیاد ہے اور وہ متروک ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کیا تم میں سے کوئی ایک یہ استطاعت نہیں رکھتا کہ وہ رات کے وقت سورۂ اخلاص پڑھ لے ؟ کیونکہ یہ پورے قرآن کے برابر ہے “ ۔ آپ صلی اللہ علیہ وسلم نے یہ بھی ارشاد فرمایا : ” لوگوں کے لیے عریف ( یعنی سرکاری اہلکار ) کا ہونا ضروری ہے اور عریف ، جہنم میں جائے گا ، قیامت کے دن کوتوال کو لایا جائے گا اور اس سے یہ کہا: جائے گا : تم اپنا کوڑا رکھ دو اور جہنم میں داخل ہو جاؤ ! “
یہ روایت امام ابویعلیٰ نے نقل کی ہے اس کی سند میں ایک راوی عبید بن میمون ہے اور وہ متروک ہے ۔

امام شعبی بیان کرتے ہیں : سیدنا ابوہریرہ رضی اللہ عنہ نے ایک شخص کو دیکھا اُس کی ہیئت انہیں اچھی لگی ، انہوں نے دریافت کیا : یہ شخص کس سے تعلق رکھتا ہے ؟ تو اس نے بتایا : یہ ان لوگوں میں سے ہے ، جن پر اللہ تعالیٰ نے انعام کیا ہے ، سیدنا ابوہریرہ صلی اللہ علیہ وسلم نے فرمایا : ہم سب اُن لوگوں میں سے ہیں ، جن پر اللہ تعالیٰ نے انعام کیا ہے ، تمہارا تعلق کس سے ہے ؟ اس نے جواب دیا : اہل زمین سے ، سیدنا ابوہریرہ رضی اللہ عنہ نے فرمایا : ہم سب اہل زمین سے ہیں ، تمہارا تعلق کس سے ہے ؟ اس نے کہا: نبطیوں ( یہ عراق اور اردن کے درمیان رہنے والی ایک قوم ہے ) سے سیدنا ابوہریرہ رضی اللہ عنہ نے فرمایا : تم مجھ سے دور ہو جاؤ ! کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” یہ لوگ انبیاء کے قاتل اور ظالموں کے مددگار ہیں ، جب یہ لوگ زمینیں کھانا شروع کریں ، اور عمارتیں قائم کریں ، تو ان سے دور ) بھاگ جانا ، بھاگ جانا ! “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالرحمن بن مغوول ہے اور وہ متروک ہے ۔

خالد بن حکیم بن حزام بیان کرتے ہیں : سیدنا ابوعبیدہ رضی اللہ عنہ نے ایک شخص کو برا بھلا کہا: ، سیدنا خالد بن ولید رضی اللہ عنہ نے اس سے منع کیا تو وہ بولے : تم نے امیر کو غضبناک کر دیا ہے ؟ وہ اُن کے پاس آئے اور بولے : میں نے آپ کو غضبناک کرنے کا ارادہ نہیں کیا تھا لیکن میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن ، سب سے زیادہ سخت عذاب ، اُن لوگوں کو ہو گا ، جو دنیا میں لوگوں کو زیادہ سخت عذاب دیتے ہوں گے “ ۔
یہ روایت امام أحمد نے اور امام طبرانی نے نقل کی ہے ، انہوں نے یہ الفاظ نقل کیے ہیں : ” اُن سے کہا: گیا : آپ نے امیر کو غضبناک کر دیا ہے ؟ “ اور یہ الفاظ بھی زائد ہیں : ” تم جاؤ اور ان لوگوں کو چھوڑ دو ! “ اس روایت کے رجال صحیح کے رجال ہیں ، صرف خالد بن حکیم کا معاملہ مختلف ہے اور وہ ثقہ ہے ، اس سے پہلے حکمرانوں کی خیر خواہی کے بارے میں حدیث گزر چکی ہے ۔